ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބަށް ކުރިމަތިލީ ކެންޑިޑޭޓުންގެ ތެރެއިން 32 ކެންޑިޑޭޓަކު ނަން އަނބުރާ ގެންގޮސްފައިވާ ކަމަށް އިލެކްޝަންސް ކޮމިޝަނުން (އީސީ) ހާމަކޮށްފިއެވެ.
މިކަން ހާމަކުރެއްވީ ކެންޑިޑޭޓުންގެ ނަންތައް ތަރުތީބުކުރުމަށް މިއަދު ބޭއްވި ރަސްމިއްޔާތުގެ ތެރެއިންނެވެ.
އިލެކްޝަންސް ކޮމިޝަނުގެ ރައީސް މުޙައްމަދު ޒާހިދު ވިދާޅުވީ، ނަން އަނބުރާ ގެންދިއުމަށް ދީފައިވާ މުއްދަތުގައި ނަން ގެންދިޔަ 32 ކެންޑިޑޭޓުންގެ ތެރެއިން 31 ފަރާތަކީ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް ކުރިމަތިލީ ކެންޑިޑޭޓުން ކަމަށެވެ. ލޯކަލް ކައުންސިލް އިންތިޚާބުން ނަން އަނބުރާ ގެންދިޔައީ އެންމެ ކެންޑިޑޭޓެކެވެ. ނަން އަނބުރާ ގެންދިއުމުގެ ފުރުޞަތު އޮތީ މިއަދު ކެންޑިޑޭޓުންގެ ނަން ތަރުތީބުކުރުމާ ހަމައަށެވެ.
މި އިންތިޚާބުތަކުގައި ވާދަކުރުމަށް ޖުމްލަ 2,994 ކެންޑިޑޭޓުން ފޯމު ހުށަހެޅި ނަމަވެސް، ނަން އަނބުރާ ގެންދިޔަ ކެންޑިޑޭޓުންގެ އަދަދު އުނިކުރުމުން މިހާރު އިންތިޚާބުގައި ވާދަކުރާނީ 2,962 ކެންޑިޑޭޓުންނެވެ. ނަން ތަރުތީބުކޮށްފައިވާ ކެންޑިޑޭޓުންގެ ދާއިމީ ލިސްޓު އަންނަ ހޮނިހިރު ދުވަހު ރަސްމީކޮށް އިޢުލާނު ކުރާނެ ކަމަށްވެސް އީސީން މަޢުލޫމާތު ދެއެވެ.
އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ މި އިންތިޚާބުގައި ރަށު ކައުންސިލްތަކަށް 626 ކައުންސިލަރުން އަދި ސިޓީ ކައުންސިލްތަކަށް 52 ކައުންސިލަރުން އިންތިޚާބު ކުރާނެއެވެ. މީގެ އިތުރުން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށްވެސް އެ އަދަދަށް މެންބަރުން އިންތިޚާބު ކުރުމަށް ވަނީ ހަމަޖެހިފައެވެ.
މިފަހަރުގެ އިންތިޚާބުގައި ވޯޓުލުމުގެ ޙައްޤު ޖުމްލަ 294,937 މީހުންނަށް ލިބިގެންވާ ކަމަށް އިލެކްޝަންސް ކޮމިޝަނުގެ ތަފާސްހިސާބުތަކުން ދައްކައެވެ.
