ދުނިޔޭގެ އިގުތިސޯދަށް އަންނަމުންދާ ލޮޅުންތަކާއި، ހާއްސަކޮށް މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ރާއްޖޭގެ އިގުތިސޯދަށް ވަނީ ނޭދެވޭ އަސަރުތަކެއް ކުރަން ފަށާފައެވެ.
މިފަދަ ދަތި ދަނޑިވަޅެއްގައި ސަރުކާރުން އެންމެ ބޮޑު އިސްކަމެއް ދެނީ ދައުލަތުގެ ހަރަދުތައް ކުޑަކޮށް، އާމްދަނީއާ އެއްވަރަށް ކަންކަން ތަރުތީބު ކުރުމަށެވެ. ނަމަވެސް، މި ހާލަތުގައި ވެސް ރައްޔިތުންނަށް ބޭނުންވާ އަސާސީ ހިދުމަތްތަކާއި ތަރައްގީގެ މަޝްރޫއުތައް މުޅިން ހުއްޓާލުމުގެ ބަދަލުގައި، އެ ކަންކަން މެނޭޖުކޮށްގެން ކުރިއަށް ގެންދިއުމަކީ ސަރުކާރުގެ މައިގަނޑު ސިޔާސަތެވެ.
މެދުއިރުމަތީގެ ހަމަނުޖެހުންތަކުގެ ސަބަބުން ރާއްޖެއަށް ފަތުރުވެރިން އަންނަ މައިގަނޑު ބައެއް ރޫޓުތަކަށް ބުރޫއަރައި، އާމްދަނީއަށް ވަނީ އަސަރުކޮށްފައެވެ. މިކަމުގެ ސަބަބުން ދައުލަތުގެ ކޭޝްފްލޯ މެނޭޖުކުރުމުގައި ދަތިތަކެއް ކުރިމަތިވެފައިވާތީ، ސަރުކާރުން ވަނީ ހާއްސަ ކެބިނެޓް ކޮމިޓީއެއް އެކުލަވާލާފައެވެ.
ކޮމެޓީގެ ފަރާތުން އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ފިނޭންސް މިނިސްޓަރު މޫސާ ޒަމީރު ވިދާޅުވި ގޮތުގައި، މި ދަނޑިވަޅުގައި ސަރުކާރުގެ ވިސްނުމަކީ މަޝްރޫއުތައް މުޅިން ހުއްޓާލުމެއް ނޫނެވެ. އޭގެ ބަދަލުގައި، ދައުލަތަށް ލިބޭ އާމްދަނީއަށް ބަލައި، މަޝްރޫއުތަކުގެ ވަގުތު ދަންމާލައިގެން ނުވަތަ ޝެޑިއުލަށް ބަދަލު ގެނެސްގެން ކުރިއަށް ގެންދިއުމެވެ.
ކިތަންމެ ދަތި ހާލަތެއްގައި ވެސް ރައްޔިތުންގެ ދިރިއުޅުމާ ސީދާ ގުޅުންހުރި މުހިންމު މަޝްރޫއުތައް ހުއްޓާނުލުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ އިރުޝާދު ދެއްވާފައެވެ. މީގެ ތެރޭގައި ހިމެނެނީ:
– ސިއްހީ ހިދުމަތް ކަށަވަރުކުރުމަށް ރާވާފައިވާ ޕްރޮގްރާމްތައް
– ސިއްހީ ދާއިރާ ތަރައްގީކުރުމަށް ފަށާފައިވާ މަޝްރޫއުތައް
– ބޯހިޔާވަހިކަމުގެ މުހިންމު މަޝްރޫއުތައް
މި ދާއިރާތަކަކީ ރައްޔިތުންގެ އަސާސީ ބޭނުންތަކާ ގުޅިފައިވާ ކަންކަމަށް ވާތީ، މި މަޝްރޫއުތައް މެދުކަނޑާނުލައި ކުރިއަށް ގެންދެވޭނެ ގޮތްތައް ސަރުކާރުން ދަނީ ހޯދަމުންނެވެ.
ސަރުކާރުން މަޝްރޫއުތައް ކުރިއަށް ގެންދިއުމުގައި ގެންގުޅޭ އަނެއް އުސޫލަކީ ފައިސާ ހަމަޖެހިފައިވާ މަޝްރޫއުތަކަށް އިސްކަންދިނުމެވެ. ބޭންކް އޮފް މޯލްޑިވްސް އާއި އަމިއްލަ ފަރާތްތަކުން ’ކޮންޓްރެކްޓާ ފައިނޭންސް‘ އުސޫލުން ހިންގާ މަޝްރޫއުތަކަކީ މިހާރުވެސް ފައިސާ ކަށަވަރުވެފައިވާ ކަންކަމަށް ވާތީ، އެފަދަ މަޝްރޫއުތައް ހުއްޓާލަން ނުޖެހޭނެ ކަމަށް ފިނޭންސް މިނިސްޓަރު ފާހަގަކުރެއްވިއެވެ. އެހެން މަޝްރޫއުތަކުގެ ޝެޑިއުލް ލަސްކޮށްލުމަކީ ކޭޝްފްލޯ މެނޭޖުކުރުމަށް ލިބޭ ބޮޑު ލުޔެކެވެ.
ސަރުކާރުގެ އަމާޒަކީ އިގުތިސޯދީ ގޮންޖެހުންތަކާ އެކުވެސް ތަރައްގީގެ ދުވެލި މުޅިން މަޑުޖައްސާނުލުމެވެ. ހަރަދުތައް ކުޑަކުރުމަށްޓަކައި މަޝްރޫއުތަކުގެ މުއްދަތު އިތުރުކުރި ނަމަވެސް، ރައްޔިތުންނަށް އެންމެ ފައިދާހުރި ދާއިރާތަކުން ކުރިއަށްދިއުމަކީ ދައުލަތުގެ ދެމެހެއްޓެނިވި ތަރައްގީއަށް އެޅޭ މުހިންމު ފިޔަވަޅެކެވެ. މީގެ ސަބަބުން ދައުލަތުގެ މާލީ ހާލަތު ރަނގަޅުވަމުންދާ ވަރަކަށް، މަޝްރޫއުތައް އަވަސްކުރުމުގެ ފުރުސަތު ލިބިގެންދާނެއެވެ.
