އީރާނާ ދެކޮޅަށް ދޭން ރާވާފައިވާ އަސްކަރީ ހަމަލާތައް މަޑުޖައްސާލައި، ހަނގުރާމަ ހުއްޓާލުމުގެ މުއްދަތު އިތުރުކުރަން އެމެރިކާގެ ރައީސް ޑޮނަލްޑް ޓްރަމްޕް ނިންމަވައިފިއެވެ. މި ނިންމެވުމަކީ މެދުއިރުމަތީގެ މަސްރަހު އިތުރަށް ގޯސްވިޔަނުދީ ހިފެހެއްޓުމަށް އެޅުނު ފިޔަވަޅެއް ކަމަށް ބެލެވެއެވެ.
މި ނިންމެވުމާ ގުޅޭގޮތުން ރައީސް ޓްރަމްޕް ވިދާޅުވީ، ހަމަލާތައް މަޑުޖައްސާލަން ނިންމެވީ ޕާކިސްތާނުގެ މެދުވެރިންގެ އެދުމުގެ މަތިން ކަމަށެވެ. ”މީގެ ބޭނުމަކީ ސުލްހައިގެ ހުށަހެޅުމެއް ތައްޔާރުކުރުމަށް އީރާނަށް އިތުރު ވަގުތު ދިނުން،“ ކަމަށްވެސް ޓްރަމްޕް ވިދާޅުވިއެވެ.
ހަނގުރާމަ ހުއްޓާލުމުގެ މުއްދަތު އިތުރުކުރި ނަމަވެސް، އެމެރިކާއިން ވަނީ އީރާނުގެ ބަނދަރުތައް ބަންދުކޮށްފައި އޮތް އޮތުން ކުރިއަށް ގެންދިއުމަށް ނިންމާފައެވެ. އަދި އެމެރިކާގެ އަސްކަރިއްޔާ ކޮންމެ ވަގުތަކުވެސް ހަމަލާއަކަށް ތައްޔާރުވެފައިވާ ”ހައި އެލާޓް“ ހާލަތުގައި ބޭއްވުމަށް ޓްރަމްޕް ވަނީ އަމުރުކުރައްވާފައެވެ.
ކުރިން ހަނގުރާމަ ކުރިއަށް ގެންދާނެ ކަމުގެ ހަރުކަށި އިންޒާރުތަކެއް ދެއްވުމަށްފަހު، އެމެރިކާގެ ސިޔާސަތަށް ކުއްލިއަކަށް އައި މި ބަދަލަށް ޕާކިސްތާނުގެ ބޮޑުވަޒީރު ޝެހްބާޒް ޝަރީފް ވަނީ މަރުހަބާ ވިދާޅުވެފައެވެ. ޕާކިސްތާނުން ދަނީ މި މައްސަލައިގައި ދެ ގައުމުގެ ދެމެދުގައި ސުލްހަ ގާއިމުކުރުމަށް މުހިންމު ދައުރެއް އަދާކުރަމުންނެވެ.
މިކަމާ ގުޅިގެން އީރާނުން ބުނެފައިވަނީ، ހަނގުރާމަ ހުއްޓާލާފައި އޮތް ނަމަވެސް އެ ގައުމުގެ ބަނދަރުތައް ބަންދުކޮށްފައި ބެހެއްޓުމަކީ ހަނގުރާމައިގެ އަމަލެއް ކަމަށެވެ. އަދި މި ހާލަތާ މެދު އީރާނުން ގެންގުޅޭނެ ރަސްމީ ސިޔާސަތެއް ކުރިއަށް އޮތް ތަނުގައި ހާމަކުރާނެ ކަމަށްވެސް އެ ގައުމުން ބުނެފައިވެއެވެ.
މި ނިންމުމާއެކު މެދުއިރުމަތީގެ މަސްރަހަށް ކޮންމެވެސް ވަރެއްގެ ލުޔެއް ލިބިގެންދާނެ ކަމަށް ބެލެވުނު ނަމަވެސް، ދެ ގައުމުގެ ދެމެދުގައި އޮތް ނުތަނަވަސްކަން އަދިވެސް އޮތީ ނުހަނު މަތީގައެވެ. ބައިނަލްއަގުވާމީ މުޖުތަމައުން ދަނީ މި ހާލަތު ވަރަށް ގާތުން ބަލަމުންނެވެ.
