އިންޑޮނޭޝިޔާގެ ވައިސް މިނިސްޓަރ އޮފް ފޮރިން އެފެއާޒް މުޙައްމަދު އަނިސް މައްޓާ، ރާއްޖޭގެ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދުގެ އަރިހަށް ކުރެއްވި އިޙްތިރާމްގެ ޒިޔާރަތާއެކު، ދެ ޤައުމުގެ ދެމެދުގައިވާ ދީނީ އަދި ސަގާފީ ގުޅުންތައް އާ ހަރުފަތަކަށް ގެންދިއުމުގެ މަޝްވަރާ ވަނީ ކުރެވިފައެވެ.
މި ބައްދަލުކުރެއްވުމުގައި ވަޒީރު ޑރ. ޝަހީމް ވަނީ އިންޑޮނޭޝިޔާގެ ވަފުދަށް މަރުޙަބާ ދަންނަވައި، އިސްލާމީ އުންމަތުގެ ކުރިއެރުމަށް ދެ ޤައުމު ގުޅިގެން ކުރެވިދާނެ މުހިއްމު މަސައްކަތްތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރައްވާފައެވެ.
އެގޮތުން، މި ބައްދަލުވުމުގެ އެންމެ މުހިންމު އެއްބަޔަކީ ރާއްޖޭގައި އިސްލާމީ ވަޤްފު ފަންޑު ތަރައްޤީކޮށް، އޭގެ މަންފާ މުޖުތަމަޢަށް އެންމެ ފުރިހަމަ ގޮތުގައި ލިބޭނެ އިންތިޒާމުތައް ހަމަޖެއްސުމަށް އިންޑޮނޭޝިޔާގެ ތަޖުރިބާ ހޯދުމެވެ.
މި ބައްދަލުކުރެއްވުމުގައި ވުޒާރާއިން ކުރަމުންދާ މުހިއްމު މަސައްކަތްތަކާއި، ވުޒާރާގެ ދަށުން މަސައްކަތްކުރާ އެކި އިދާރާތަކުގެ މަސައްކަތްތަކުގެ ތަފްސީލް ވައިސް މިނިސްޓަރ އޮފް ފޮރިން އެފެއާޒް މުޙައްމަދު އަނިސް މައްޓާއަށް އަރުވާފައިވެއެވެ.
މީގެ އިތުރުން، މިސްކިތްތަކުގެ އިމާމުންނާއި ޚަޠީބުންގެ ފެންވަރު މަތިކޮށް، އެ ފަރާތްތަކަށް ބޭނުންވާ ތަމްރީނާއި ތަޢުލީމީ ފުރުޞަތުތައް ފޯރުކޮށްދިނުމުގައި ދެ ޤައުމުގެ ދެމެދުގައި އެއްބާރުލުން އިތުރުކުރުމަށް ވަނީ އެއްބަސްވެފައެވެ. މިއީ ރާއްޖޭގެ ދީނީ ދާއިރާ ހަރުދަނާކުރުމަށް ސަރުކާރުން ކުރަމުންދާ މަސައްކަތަށް ލިބިގެންދިޔަ ބޮޑު ކުރިއެރުމެކެވެ.
ވައިސް މިނިސްޓަރުގެ މި ދަތުރުފުޅުގައި އިސްލާމީ ކަންތައްތަކާ ބެހޭ ވުޒާރާގެ އިސް ބޭފުޅުންނާ ބައްދަލުކުރައްވައި، ރާއްޖޭގެ ދީނީ ކަންކަން ބަލަހައްޓާ ނިޒާމާއި، ވުޒާރާގެ ދަށުން ހިންގާ އެކި މުއައްސަސާތަކުގެ މަސައްކަތްތައް އޮޅުންފިލުއްވާފައިވެއެވެ. މި ބައްދަލުވުންތަކަށްފަހު، އެމަނިކުފާނު ވަނީ މާލޭގެ އިސްލާމީ މަރުކަޒަށާއި، ދިވެހިންގެ ފަޚުރެއް ކަމުގައިވާ އާސާރީ ހުކުރު މިސްކިތަށް ޒިޔާރަތްކުރައްވާފައެވެ.
މި ޒިޔާރަތުގެ ސަބަބުން ރާއްޖޭގެ އިސްލާމީ ތާރީޚާއި ސަގާފަތަށް އިންޑޮނޭޝިޔާގެ ވަފުދުން ކުރާ އިޙްތިރާމް ހާމަވެގެންދިޔައިރު، މިއީ ދެ ޤައުމުގެ ދެމެދުގައި އޮތް ޒަމާންވީ އެކުވެރިކަން ރަމްޒުކޮށްދޭ މުހިއްމު ދަތުރުފުޅެކެވެ.
