އިންޑިއާގެ މެގަލާޔާ ސްޓޭޓުގައި މިހާރު ކުރިއަށްދާ ބޮޑު އަސްކަރީ ތަމްރީނު ”ޕްރަގަތީ 2026“ ގައި ދިވެހިރާއްޖެ ހިމެނޭހެން 13 ގައުމަކުން ބައިވެރިވެއްޖެއެވެ.
އިންޑިއާގެ އުމްރޯއި މިލިޓަރީ ސްޓޭޝަނުގައި ބާއްވާ މި ތަމްރީނުތަކަކީ ކައުންޓަރ ޓެރަރިޒަމް އޮޕަރޭޝަންތަކާއި، ސުލްހަ ބެލެހެއްޓުމުގެ މަސައްކަތްތަކުގެ އިތުރުން އިންޑިއާ ކަނޑުގެ ސަރަހައްދުގެ ސަލާމަތީ ކަންކަމުގައި ގުޅުން ބަދަހިކުރުމަށް ބާއްވާ ހަރަކާތެކެވެ.
މި ތަމްރީނުތަކުގައި ރާއްޖޭގެ އިތުރުން ބޫޓާން، ކެމްބޯޑިއާ، އިންޑޮނޭޝިއާ، ލާއޯސް، މެލޭޝިއާ، މިއަންމާ، ނޭޕާލް، ފިލިޕީންސް، ސީޝެލްސް، ސްރީލަންކާ އަދި ވިއެޓްނާމްގެ ސިފައިން ބައިވެރިވެއެވެ.
”ޕްރަގަތީ“ (PRAGATI) ގެ މާނައަކީ ”ޕާޓްނަޝިޕް އޮފް ރީޖަނަލް އާމީސް ފޯ ގްރޯތް އެންޑް ޓްރާންސްފޯމޭޝަން އިން ދަ އިންޑިއަން އޯޝަން ރީޖަން“ އެވެ. އިންޑިއާގެ ޑިފެންސް އޮފިޝަލުން ހާމަކުރައްވާ ގޮތުގައި، މި ތަމްރީނުތަކުގެ މައިގަނޑު މަގުސަދަކީ ސަރަހައްދީ ސަލާމަތީ ނުރައްކާތަކާއި، އިންސާނީ އެހީތެރިކަން ބޭނުންވާ ކުއްލި ހާލަތްތަކުގައި ގައުމުތަކުގެ އަސްކަރިއްޔާތައް ގުޅިގެން މަސައްކަތް ކުރުމުގެ ގާބިލްކަން އިތުރުކުރުމެވެ.
މި ތަމްރީނުތައް ކުރިއަށްދަނީ ވަރަށް ދަތި އުނދަގޫ ޖަންގަލިތަކާއި ފަރުބަދަމަތީ ސަރަހައްދުތަކުގައެވެ. މީގެ ތެރޭގައި ޖަންގަލީގައި ކުރާ ހަނގުރާމައިގެ އުކުޅުތަކާއި، ސިޓީތަކުގައި ކުރިމަތިލާ ހަނގުރާމައިގެ ތަމްރީނުތަކާއި، ރަހީނުން ސަލާމަތްކުރުމުގެ އޮޕަރޭޝަންތަކުގެ އިތުރުން ކާރިސާތަކުގައި އެހީތެރިވުމުގެ ހަރަކާތްތައް ހިމެނެއެވެ. އަދި އިންޓެލިޖެންސް މައުލޫމާތު ބަދަލުކުރުމާއި، ގުޅިގެން ޓެކްޓިކަލް ޕްލޭންތައް އެކުލަވާލުމުގެ ސެޝަންތައް ވެސް ކުރިއަށްދާނެއެވެ.
އިންޑިއާގެ ކަމާބެހޭ ފަރާތްތަކުން ފާހަގަކުރި ގޮތުގައި، މި ތަމްރީނުތަކަކީ ދެކުނު އޭޝިއާ އާއި ދެކުނު އިރުމަތީ އޭޝިއާގެ ގައުމުތަކުގެ މެދުގައި އޮތް ދިފާއީ ގުޅުން ދައްކުވައިދޭ ކަމެކެވެ. އަދި މިއީ އިންޑިއާ ކަނޑުގެ ސަރަހައްދުގެ ސުލްހަޔާއި ހަމަޖެހުން ގާއިމުކުރުމަށްޓަކައި އެޅޭ މުހިންމު ފިޔަވަޅެކެވެ.
މި ތަމްރީނުތަކުގައި ބައިވެރިވުމަކީ މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އަށް ސަރަހައްދީ އެހެން އަސްކަރިއްޔާތަކާ އެކު ތަމްރީނުވެ، ތަޖުރިބާ ހޯދުމަށް ލިބޭ ރަނގަޅު ފުރުސަތެކެވެ. މިއީ ރާއްޖެއާއި އަވަށްޓެރި ގައުމުތަކުގެ މެދުގައި އޮތް ދިފާއީ އަދި ސިޔާސީ ގުޅުން އިތުރަށް ހަރުދަނާވެގެންދާނެ ކަމެކެވެ. އިންޑިއާއިން ބުނި ގޮތުގައި މި ތަމްރީނުތައް ކުރިއަށްދަނީ އެކުވެރިކަމާއި، ހަމަހަމަކަމާއި، އަދި އެއް ގައުމު އަނެއް ގައުމަށް ކުރާ އިހުތިރާމާ އެކުގައެވެ.
