ހުޅުމާލެ ދެވަނަ ފިޔަވަހީގެ ހިތިގަސް މަގުން ދުއްވާފައިދިޔަ ސައިކަލެއް ކޮންޓްރޯލުން ނެއްޓި، ކަފިހިހުރަހުން މަގު ހުރަސްކުރި މީހެއްގެ ގައިގައި ޖެހި ނުރައްކާތެރި އެކްސިޑެންޓެއް ހިނގައިފިއެވެ.
މި ހާދިސާ ހިނގާފައިވަނީ މިދިޔަ އާދިއްތަ ދުވަހުގެ ރޭ 21:26 އެހައިކަންހާއިރުއެވެ.
ފުލުހުން މައުލޫމާތު ދޭ ގޮތުގައި، މި އެކްސިޑެންޓް ހިނގާފައިވަނީ ހިތިގަސް މަގުން އުތުރުން ދެކުނަށް ދުއްވާފައިދިޔަ ސައިކަލެއް ކޮންޓްރޯލް ނުވެ ކަހާލައިގެން ގޮސް، އެ ވަގުތު ކަފިހިހުރަހުން މަގު ހުރަސްކުރަމުންދިޔަ މީހެއްގެ ގައިގައި ޖެހިގެންނެވެ.
އެ އެކްސިޑެންޓްގައި އަނިޔާވެފައިވަނީ މަގު ހުރަސްކުރަން އުޅުނު ދިވެހި ފިރިހެނަކަށެވެ. އޭނާއަށް އެކި ވަރުގެ އަނިޔާ ލިބިފައިވާއިރު، މިހާރު ދަނީ އައިޖީއެމް ހޮސްޕިޓަލުގައި ފަރުވާދެމުންނެވެ. ނަމަވެސް އޭނާއަށް ލިބުނު އަނިޔާގެ ތަފްސީލެއް އަދި ހާމަކޮށްފައެއް ނުވެއެވެ. މި މައްސަލަ ފުލުހުން މިހާރު ގެންދަނީ އިތުރަށް ތަހުގީގުކުރަމުންނެވެ.
ހުޅުމާލޭގެ މަގުތަކަކީ ބާރު ސްޕީޑުގައި އުޅަނދުތައް ދުއްވާ ސަރަހައްދަކަށް ވުމާއެކު، މަގު ބޭނުންކުރާ ފަރާތްތަކުން ސަމާލުވުމަށް ފުލުހުން އަބަދުވެސް އިލްތިމާސް ކުރެއެވެ. އަދި ގަވައިދާ ހިލާފަށް ދުއްވާ ފަރާތްތަކާމެދު ދަނީ ފިޔަވަޅު އަޅަމުންނެވެ.
