އިންޑިއާގެ އުއްތަރު ޕްރަދޭޝްގެ ކައުޝަމްބީ ޑިސްޓްރިކްޓުގެ ގެއެއްގައި ގެރިމަސް ކެއްކި ކަމަށް ކުރެވުނު ތުހުމަތަކާއި ގުޅިގެން ފުލުހުން ހިންގި އޮޕަރޭޝަނެއްގައި ތިން މުސްލިމް އަންހެނަކު ހައްޔަރުކޮށްފިއެވެ.
މި މައްސަލައިގައި ހައްޔަރުކޮށްފައިވާ ޝަމާ ޕަރުވީން، ޝާއިސްތާ އަދި ފާތިމާގެ ގެއިން އަތުލައިގަތް މަހަކީ ގެރިމަސްކަން ފޮރެންސިކް ތަހުލީލުތަކުން އަދި ކަށަވަރު ނުކުރެވޭއިރުވެސް، އެ ތިން އަންހެނުން ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
ފުލުހުން މައުލޫމާތު ދޭ ގޮތުގައި، އެ ސަރަހައްދުގެ އާއިލާއަކުން ގެރިމަސް ހޯދައިގެން ގޭތެރޭގައި ކައްކަމުންދާކަމުގެ މައުލޫމާތު އިންޓެލިޖެންސްއަށް ލިބުނީ މިދިޔަ ބުދަ ދުވަހުއެވެ.
ލިބުނު މައުލޫމާތުގެ ސައްހަކަން ކަށަވަރު ކުރުމަށްފަހު، ޑެޕިއުޓީ ސުޕްރިންޓެންޑެންޓް އޮފް ޕޮލިސް އަބީޝެކް ސިންގްގެ އިރުޝާދުގެ ދަށުން ފުލުހުންގެ ޓީމަކުން ވަނީ އެ ގެ ބަލައިފާސްކުރުމުގެ އޮޕަރޭޝަނެއް ކުރިއަށް ގެންގޮސްފައެވެ.
އިންޑިއާގައި ގެރިމަސް ކެއްކުމާއި ބޭނުންކުރުމާ ގުޅޭގޮތުން އަމަލުކުރާ ގާނޫނުތައް އެކި ސްޓޭޓްތަކުގައި ތަފާތެވެ. އިންޑިއާގެ ގާނޫނުއަސާސީގެ ދަށުން މިފަދަ ގާނޫނުތައް ހެދުމުގެ އިޚްތިޔާރު ލިބިގެންވަނީ އެ ސްޓޭޓެއްގެ ސަރުކާރަށެވެ.
މިގޮތުން ބަލާއިރު، އިންޑިއާގެ އުތުރު، މެދުތެރޭ އަދި ހުޅަނގުގެ ގިނަ ސްޓޭޓްތަކެއްގައި (މިސާލަކަށް: އުއްތަރު ޕްރަދޭޝް، މަހާރާޝްތުރަ، އަދި ދިއްލީ) ގެރި މަސް ކެއްކުމާއި ގެރިމަސް ގެންގުޅުމަކީ ގާނޫނީ ގޮތުން މަނާ، އަދި އަދަބުދެވޭނެ ކުށެކެވެ. މީގެ މައިގަނޑު ސަބަބަކީ އެ ގައުމުގެ އަގުލަބިއްޔަތު އޮންނަ ހިންދޫ ދީނުގެ މީހުން ގެރިއަކީ މުގައްދަސް އެއްޗެއްގެ ގޮތުގައި ދެކޭތީއެވެ.
ނަމަވެސް، އިންޑިއާގެ ދެކުނުގެ ބައެއް ސްޓޭޓްތަކާއި (މިސާލަކަށް: ކެރެލާ)، އިރުއުތުރުގެ ސްޓޭޓްތަކާއި، އަދި ހުޅަނގު ބެންގާލް ފަދަ ސަރަހައްދުތަކުގައި ގެރިމަސް ކެއްކުމާއި ކެއުމަކީ ގާނޫނީ ގޮތުން ހުއްދަ ކަމެކެވެ. އެހެންކަމުން، އިންޑިއާގައި ގެރިމަސް ބޭނުންކުރެވޭނީ އެމީހަކު ހުރި ސަރަހައްދެއްގެ ގާނޫނުގެ ދަށުންނެވެ.
