ދިވެހިރާއްޖޭގައި ޤަވާއިދާ ޚިލާފަށް އުޅޭ ބިދޭސީންގެ މައްސަލައަކީ ދިވެހި މުޖުތަމަޢަށް ކުރިމަތިވެފައިވާ އެންމެ ބޮޑު އެއް ގޮންޖެހުމެވެ. މި މައްސަލަ ޙައްލުކުރުމަށްޓަކައި ސަރުކާރުން ވަނީ ހަރުދަނާ ފިޔަވަޅުތަކެއް އަޅަން ފަށާފައެވެ. އެގޮތުން 17 ނޮވެމްބަރު 2023 އިން ފެށިގެން 13 ޖޫން 2024 އާ ހަމައަށް 12,552 އަށްވުރެ ގިނަ ބިދޭސީން ވަނީ ރާއްޖެއިން ފޮނުވާލާފައެވެ.
ޤަވާއިދާ ޚިލާފަށް އުޅޭ ބިދޭސީން ދެނެގަތުމަށްޓަކައި މޯލްޑިވްސް އިމިގްރޭޝަނުން ދަނީ މާލެ ސަރަހައްދާއި އަތޮޅުތަކުގައި ޚާއްސަ ރެއިޑްތަކެއް ހިންގަމުންނެވެ. މި އޮޕަރޭޝަންތަކުގައި މައިގަނޑު ގޮތެއްގައި ބަލަމުންދަނީ ޞައްޙަ ލިޔެކިޔުން ނެތި އުޅޭ މީހުންނާއި، ދީފައިވާ ހުއްދައިގެ ބޭރުން މަސައްކަތްކުރާ މީހުންނަށެވެ. މީގެ އިތުރުން، އަމިއްލައަށް ވިޔަފާރި ހިންގާ ބިދޭސީންނާއި، ދިވެހިންގެ ނަމުގައި ކުދި ވިޔަފާރިތައް ހިންގާ ފަރާތްތައް ހޯދައި ފިޔަވަޅު އެޅުމަކީ މި އޮޕަރޭޝަންތަކުގެ މުހިންމު ބައެކެވެ.
ބިދޭސީންގެ މައްސަލަތައް ރިޕޯޓްކުރުމަށްޓަކައި ”އިމިގްރޭޝަން ވޮޗް“ ގެ ނަމުގައި އޮންލައިން ޕްލެޓްފޯމެއް ވަނީ ތައާރަފްކޮށްފައެވެ. މިއީ ރައްޔިތުންނަށް ފަސޭހަކަމާއެކު ޝަކުވާ ހުށަހެޅުމަށް ހުޅުވާލެވުނު ދޮރެކެވެ. މި ޕްލެޓްފޯމް މެދުވެރިކޮށް، ޤަވާއިދާ ޚިލާފަށް އުޅޭ މީހުންނާއި، އެފަދަ މީހުން ހިންގާ ވިޔަފާރިތަކުގެ މަޢުލޫމާތު ސިއްރުކަމާއެކު ފޯރުކޮށްދިނުމުގެ ފުރުޞަތު އާންމުންނަށް ލިބިގެންދެއެވެ. މިއީ މި މައްސަލަ ޙައްލުކުރުމުގައި ރައްޔިތުންގެ އެހީތެރިކަން ހޯދުމަށް އެޅުނު މުހިންމު ފިޔަވަޅެކެވެ.
ރާއްޖޭގައި މިހާރު ޞައްޙަ ވޯކް ޕާމިޓާއެކު މަސައްކަތްކުރާ ބިދޭސީންގެ އަދަދު 2 ލައްކައަށްވުރެ މައްޗަށް އަރާފައިވާއިރު، އެންމެންގެ މަޢުލޫމާތު ފުރިހަމައަށް ބެލެހެއްޓުމަކީ މުހިންމު ކަމެކެވެ. މިކަމަށްޓަކައި ރަށްރަށާއި، ރިސޯޓުތަކާއި، ސިނާޢީ ރަށްތަކުގައި އުޅޭ ބިދޭސީންގެ މަޢުލޫމާތު އެއްކުރުމުގެ ބޮޑު މަޝްރޫޢެއް ސަރުކާރުން ދަނީ ހިންގަމުންނެވެ. މި މަސައްކަތުގެ ސަބަބުން ކޮންމެ ރަށެއްގައި އުޅެނީ ކޮން ބައެއްކަމާއި، އެމީހުންގެ ޤާނޫނީ ހާލަތަކީ ކޮބައިކަން ދެނެގަތުމަށް ފަސޭހަވެގެންދާނެއެވެ.
ޤަވާއިދާ ޚިލާފަށް އުޅޭ ބިދޭސީންގެ މައްސަލައަކީ ޤައުމީ ސަލާމަތާއި އިޤްތިޞާދާ ގުޅިފައިވާ ކަމެކެވެ. ސަރުކާރުން މިހާރު ކުރިއަށްގެންދާ ހަރުދަނާ މަސައްކަތްތަކާއި، ގިނަ އަދަދެއްގެ ބިދޭސީން އަނބުރާ ފޮނުވާލުމަކީ މި މައްސަލައަށް ދާއިމީ ޙައްލެއް ހޯދުމަށް ކުރެވޭ އުއްމީދީ މަސައްކަތްތަކެކެވެ. މި މަސައްކަތުގައި ހުރިހާ މުއައްސަސާތަކާއި ރައްޔިތުންގެ އެއްބާރުލުން ލިބުމަކީ ޤައުމުގެ އަމާންކަމާއި ތަރުތީބު ހިފެހެއްޓުމަށް ކޮންމެހެން ބޭނުންތެރި ކަމެކެވެ. މިއަދުގެ ހާލަތަށް ބަލާއިރު ގަވާއިދާއި ހިލާފަށް އުޅޭ ބިދޭސީންގެ މައްސަލަ ހައްލު ނުކުރެވިއްޖެނަމަ ދިވެހިންގެ އަތުން ދިވެހިންގެ އިގްތިސާދީ ބާރުވެރިކަން ގެއްލިގެން ދިއުމަކީ ދުރުގައިވާ ކަމެއް ނޫނެވެ.
