މާލޭގައި ކޮމިއުނިޓީ ސްޕްރެޑްއަކަށް ބަދަލުވެފައިވާ ކޮރޯނާ ވައިރަސް، ކޮންޓްރޯލް ކުރުމަށް ކުރަމުން އަންނަ މަސައްކަތްތަކާއި ފިޔަވަޅުތަކުގެ ދަށުން މާލެ ސަރަހައްދުގެ ލޮކްޑައުން އިތުރު 14 ދުވަހަށް ދަންމަން ޑިރެކްޓަ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ނިންމަވައިފި އެވެ.
މި މަހުގެ 15 ވަނަ ދުވަހު، މާލޭގައި އެއްވެސް ޓްރެވެލް ހިސްޓްރީއެއް ނެތް މީހެއްގެ ގައިން ކޮރޯނާ ވައިރަސް ފެނި ހަފްތާއަކަށް ވުރެ ގިނަ ދުވަސްތައް ފާއިތުވެގެންދިޔައިރު ދުވަހުން ދުވަހަށް ކޭސްތައް ދަނީ އިތުރުވަމުންނެވެ. އަދި އެ ދުވަހުން ފެށިގެން މާލެ ލޮކްޑައުންކޮށް، ފިޔަވަޅުތައް އަންނަނީ ވަރުގަދަ ކުރަމުންނެވެ.
ރާއްޖޭގައި ފުރަތަމަ ފަހަރަށް ސިއްހީ ކުއްލި ނުރައްކަލުގެ ހާލަތު އިއުލާނުކޮށް، އޭގެ ދަށުން ފިޔަވަޅުތައް އަޅާފައި ވެއެވެ.
