ރަސްމާލެއިން ބައެއް ޔޫއޭއީގެ އީގަލް ހިލްސް ކުންފުންޏަށް ދިނުމުގެ އެއްބަސްވުމުގެ ތަފްސީލުތަކާ ބެހޭގޮތުން ގަލޮޅު އުތުރު ދާއިރާގެ މެމްބަރު މުހައްމަދު އިބްރާހިމް (ކުޑޫ) ހައުސިން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބަށް ގިނަ އަދަަދެއްގެ ސުވާލު ހުށަހަޅުއްވައިފިއެވެ.
މެމްބަރު ކުޑޫ މިނިސްޓަރު ޑރ. މުއްތަލިބަށް ފޮނުއްވި ސިޓީގައި އެދިވަޑައިގަތީ، އީގަލް ހިލްސްގެ މަޝްރޫއާ ގުޅޭގޮތުން ރައްޔިތުންގެ މެދުގައި އުފެދިފައިވާ ކަންބޮޑުވުންތަކަށް ހައްލު ހޯދުމުގެ ގޮތުން އޭނާ ކުރެއްވި ސުވާލުތަކަށް ޖަވާބު ދެއްވުމަށެވެ. އެ ސިޓީގައި ކުޑޫ ވަނީ މަޝްރޫއާ ގުޅޭގޮތުން ގިނަ އަދަދެއްގެ ސުވާލުތަކެއް މިނިސްޓަރަށް ހުށަހަޅުއްވައިފައެވެ.
އެގޮތުން އެ މަޝްރޫއު ދޫކުރުމުގެ ކުރިން އާންމު ބީލަމަކަށް ނުދިޔައީ ކީއްވެގެންތޯ އާއި މަޝްރޫއު ހަވާލުކުރަން އީގަލް ހިލްސް ކުންފުނި އިހްތިޔާރުކުރީ ކީއްވެގެންތޯ ކުޑޫ ސުވާލުކުރެއްވިއެވެ.
އަދި ވިދިވިގެން ސަބްލީސްކުރުމުން އެއްބަސްވުން ހަދާ ކޮންމެ ފަހަރަކު 99 އަހަރަށް އެހެން ބަޔަކަށް ބިން ލިބުމުގެ ފުރުސަތު އޮންނާނެތޯ ވެސް އޭނާ ސުވާލު އުފެއްދެވިއެވެ. އޭގެ އިތުރުން، 10 އަހަރު ދުވަހުގެ ތެރޭގައި މަޝްރޫއު ފުރިހަމަނުކުރެވިއްޖެނަމަ އެ ބިން އަނބުރާ ދައުލަތަށް ނެގުމުގެ ޝަރުތެއް ނުވަތަ ގާނޫނީ ރައްކާތެރިކަމެއް ހިމެނިފައިވޭތޯ އެ ސިޓީގައި އެއްސެވިއެވެ.
މަޝްރޫއު ނިމުމަކަށް އަންނާނެ މުއްދަތު ސާފުކޮށްދެއްވުމަށާއި، އީގަލް ހިލްސްއިން އެ ބިން ގައުމީ ސަލާމަތައް ނުވަތަ ކަނޑުގެ ސިޔާދަތަށް ނުރައްކާވާނެ ގޮތަށް ސެކިއުރިޓައިޒްކުރުމަށް ނުވަތަ ދަރަންޏަށް ބޭނުންކުރުމަށް ނުވަތަ ސަބްލީސްކުރުމަށް ހުއްޓުވަން އޮތް ގާނޫނީ ހުރަސްތަކަކީ ކޮބާތޯ ސާފުކޮށްދެއްވުމަށް ވެސް ކުޑޫ އެދިވަޑައިގަތެވެ.
އޭގެ އިތުރުން، ރަސްމާލެއަކީ ރައްޔިތުންގެ ބޯހިޔާވަހިކަމުގެ މައްސަލަ ހައްލުކުރުމަށް ހިއްކި ބިމަކަށް ވާއިރު، ލަގްޒަރީ ވިޔަފާރިތަކާއި މުއްސަނދިންނަށް 500 ހެކްޓަރު ދީފައި ބާކީ ބައި ރައްޔިތުންނަށް ދިނުމަކީ ސަރުކާރުން ވައުދާ ހިލާފުވުން ނޫންތޯ އާއި އެއީ އާންމު ރައްޔިތުން ބާކީކުރުން ނޫންތޯ އޭނާ ސުވާލުކުރައްވާފައިވެއެވެ.
ދައުލަތުން އެތައް ހަރަދެއް ކޮށްގެން ހިއްކާ ބިމަކުން ސީދާ އެޑްވާންސް ފައިސާއެއް ނުލިބޭގޮތަށް ބިން ދޫކޮށްލުމަކީ އެންމެ ފައިދާ ހުރި ގޮތް ކަމަށް ދެކެވަޑައިގަންނަވާ ސަބަބާއި އެ އެއްބަސްވުމުގެ ސަބަބުން ސީދާކޮށް އަދި ނުސީދާކޮށް ލިބޭނެ އާމްދަނީއަކީ ކޮަބާކަން ސާފުކޮށްދިނުމަށް އޭނާ އެދިވަޑައިގަތެެވެ.
ރަސްމާލޭގެ ބިން ދޫކުރުމުގެ ބަދަލުގައި އީގަލް ހިލްސްއިން އަޅައިދޭ 5000 ފްލެޓާއެކު ރާއްޖެއަށް 400-500 މިލިއަން ޑޮލަރު ވަންނާނެ ކަމަށާއި އެ ހަރަދު އުނިކުރާނީ ސަރުކާރަށް ލިބޭ 10 ޕަސެންޓު އާމްދަނީން ކަމަށް މީގެ ކުރިން މިނިސްޓަރު މުއްތަލިބު ވިދާޅުވެފައިވެއެވެ. އެކަމާ ގުޅިގެން ކުޑޫ ސުވާލުކުރެއްވީ އެ 5000 ފްލެޓަކީ ހިލޭ އަޅައިދޭ އެއްޗެއްތޯ ނުވަތަ އަނބުރާ ދައްކަންޖެހޭ ލޯނެއްތޯއެވެ. އަދި ފަހުން އަންދާޒާކުރި ވަރަށް އާމްދަނީ ނުލިބި، ސަރުކާރުން އެ ބޯހިޔާވަހިކަމަށް ސަބްސިޑީ ދޭންޖެހޭ ހާލަތެއް އަތުވެދާނެތޯ ސުވާލުކުރެއްވިއެވެ.
އެ މަޝްރޫއާ ގުޅިގެން އުފެދިފައިވާ ކަންބޮޑުވުންތައް ނައްތާލުމަށް ޓަކައި އެއްބަސްވުމުގެ މާއްދާތައް މަޖިލީހަށާއި އާންމު ރައްޔިތުންނާ ހިއްސާކުރުމުގެ ވިސްނުމެއް ގެންގުޅެންތޯ ވެސް އެ ސިޓީގައި އޭނާ އެއްސެވިއެވެ.
އެ މަޝްރޫއުގެ ސަބަބުން 54،000 ވަޒީފާ އުފެދޭނެ ކަމަށް ސަރުކާރުން ބުނާއިރު، އޭގެ ތެރެއިން ދިވެހީންނަށް ހާއްސަވަނީ ކިހާ މިންވަރެއްގެ ދާއިމީ މަތީ ފެންވަރުގެ ވަޒީފާތަކެއްތޯ އާއި އޭގެ ތެރެއިން ވަގުތީ ކޮންސްޓްރަކްޝަން ވަޒީފާތަކުގެ އަދަދު ސާފުކޮށްދެއްވުމަށް ވެސް ކުޑޫ އެދިވަޑައިގަތެވެ.
އެ މަޝްރޫއުގެ ތަފްސީލުތަކާއި ދުރު މުއްދަތެއްގައި ކުރާނެ އަސަރުތަކާ ގުޅޭގޮތުން އިތުރު ތަފްސީލުތައް ހާމަކުރައްވައި، ރައްޔިތުންގެ ކަންބޮޑުވުންތަކަށް ހައްލު ހޯއްދެވުމަށް އެ ސިޓީގައި އިލްތިމާސްކުރައްވާފައިވެއެވެ.
