2023ވަނަ އަހަރުގެ ފަހުން މޯލްޑިވިއަންގެ ހިންގުމަށް ގެނައި ބަދަލުތަކާ ގުޅިގެން އެ އެއާލައިންގެ ހާލަތު ބަދަލުވެފައިވާ ކަމަށާއި މިހާރު އެ އެއާލައިނަށް ފައިދާވަމުން އަންނަ ކަމަށް އޭވިއޭޝަން މިނިސްޓަރ މުހައްމަދު އަމީން ވިދާޅުވެއްޖެއެވެ.
ޤައުމީ އެއާލައިން މޯލްޑިވިއަންގެ އައު ސީޕްލޭން ޓާމިނަލް ހުޅުވުމުގެ ރަސްމިއްޔާތުގައި މިނިސްޓަރު އަމީން ވިދާޅުވީ މީގެ ކުރިން މޯލްޑިވިއަނަކީ އެއް ދުވަހުން އަނެއް ދުވަހަށް އަމިއްލަ ބާރުގައި ކުރިއަރައި ދިޔަ އެއާލައިނެއް ކަމަށެވެ. އެގޮތުން 2018ވަނަ އަހަރުގެ ނިޔަލަށް ހުރިހާ އަހަރެއްގައި ވެސް މޯލްޑިވިއަނަށް އައީ ފައިދާވަމުން ކަމަށް، އަމީން ވިދާޅުވިއެވެ. އަމީން ވިދާޅުވި ގޮތުގައި ސީޕްލޭންގެ ޚިދުމަތް ދޭން މޯލްޑިވިއަނުން އޭރު ފެށީ އަމިއްލަ ޚަރަދުގައެވެ.
އެއަށްފަހު 2023ވަނަ އަހަރުގެ ފަހުން މޯލްޑިވިއަންގެ ހިންގުމަށް ގެނައި ބަދަލުތަކާ ގުޅިގެން އެ އެއާލައިންގެ ހާލަތު ބަދަލުވެފައިވާ ކަމަށް ފާޙަގަކުރައްވާ އަމީން ވިދާޅުވީ، ފަސް އަހަރުވަންދެން ބޮޑު ދަރަންޏެއްގައި މޯލްޑިވިއަން ހިންގުމަށް ފަހު މިހާރު އެ އެއާލައިނަށް ފައިދާވަމުން އަންނަ ކަމަށެވެ. އަމީން ވިދާޅުވީ އެކަން މިދިޔަ އަހަރުގެ ހިސާބުތަކުން ފެނުނު ކަމަށެވެ.
”2018އިން ފެށިގެން 2023އާ ހަމައަށް އައިއިރުގައި އެނގިވަޑައިގަންނަވާނެ ކުންފުނި އޮތީ ވަރަށް ބޮޑު ދަރަންޏެއްގެ ތެރެއަށް ވެއްޓިފައި، އަދި ޚާއްސަކޮށް ސީޕްލޭން މުޅި އޮޕަރޭޝަންސް ހުއްޓުމަކަށް އައިސް އޭރު ސާވިސްކުރަމުން ދިޔަ ކޮންޓްރެކްޓްތަކެއް ގެއްލި ވަރަށް ބަލިކަށި ހާލަތަކަށް ކުންފުނި އައިސްފަ“
ސަރުކާރުގެ އަމާޒަކީ ކުރިއަށް އޮތްތަނުގައިވެސް ކުންފުނި އިތުރަށް ހަރުދަނާކުރުންކަމަށާއި، މޯލްޑިވިއަންއަކީ ދިވެހިންގެ ފަޚުރެއްކަން ފާހަގަކުރައްވައި، މިނިސްޓަރު ވިދާޅުވީ، މިދިޔަ 3 އަަހަރު ތެރޭ ސީޕްލޭންގެ ޚިދުމަތް އައު މޮޑެލްއަކަށް ބަދަލުކުރުމަށް މަސައްކަތްކުރަމުންދާކަމަށެވެ. އަދި ކުންފުންޏަށް އުމްރާނީ އަދި ރައުސުލްމާލުތައް ހޯދުމުގެ އިތުރުން މުވައްޒަފުންގެ މާހައުލު ރަނގަޅުކުރުމަށް އިސްކަންދެއްވާކަމަށް މިނިސްޓަރު ވިދާޅުވިއެވެ. އަދި ކުންފުނީގެ ތެރެއިން މުވައްޒަފުންނަށް ބޭނުންވާ އަސާސީ ޚިދުމަތްތައް ފޯރުކޮށްދިނުމަކީ ސަރުކާރުގެ އަމާޒެއްކަމަށް މިނިސްޓަރު ވިދާޅުވިއެވެ.
މިނިސްޓަރު އަމީން ވަނީ މޯލްޑިވިއަންގެ މުވައްޒަފުންނަށް ދިމާވެފައިވާ ގެދޮރުވެރިކަމުގެ މައްސަލައަށް ހައްލެއް ހޯދައިދެއްވުމަށް ސަރުކާރުން ޚާއްސަ އިސްކަމެއްދެއްވާކަމަށް ފާހަގަކުރައްވާފައެވެ. ހައުސިންގެ މަސައްކަތަށް ބޭނުންވާ ދެ ބިން ހަވާލުކޮށްފައިވާކަމަށާއި، އެ ތަނުގެ އަމަލީ މަސައްކަތް ވަރަށް އަވަހަށް ފެށޭނެކަމަށް މިނިސްޓަރު ވިދާޅުވިއެވެ.
