ބޭރުގެ ޓުއާ އޮޕަރޭޓަރުންނާއި އެޖެންޓުން އަތުން ޖީއެސްޓީ ނެގުމަށް ރާއްޖޭގެ ޖީއެސްޓީގެ ގާނޫނަށް ގެނައި އިސްލާހަށް އަމަލުކުރަން ފެށުމާއެކު އިޓަލީގެ ”ކިއާ އޯރާ ވިއާޖީ“ ކުންފުނިން ރާއްޖެ ވިއްކުން ހުއްޓާލަން ނިންމައިފިއެވެ.
އެ ކުންފުނީގެ ވެބްސައިޓުގައި އިޓަލީ ބަހުން ނެރުނު ބަޔާނެއްގައި ވަނީ، އޮކްޓޯބަރު 1 އިން ފެށިގެން، ދިވެހިރާއްޖެއަށް ކުރާ ދަތުރުތައް ވިއްކުމާއި، އާ ބުކިންގްތައް ހެދުން ވަގުތީގޮތުން މެދުކަނޑާލުމަށް ނިންމާފައިވާ ކަމަށެވެ. އެއާއެކު އެ ކުންފުނީގެ ވެބްސައިޓުން ވެސް ވަނީ ރާއްޖޭގެ މަންޒިލްތައް ނަގާފައެވެ. އެއީ އެ ކުންފުނީގެ މަސައްކަތާއި ފަތުރުވެރިންގެ ހައްގުތައް ހިމާޔަތްކުރުމުގެ ގޮތުން، ދިވެހި ސަރުކާރުގެ އާ ޓެކުހެއްގެ ސިޔާސަތާ ދެކޮޅަށް އިހުތިޖާޖުކުރުމުގެ ގޮތުން ނިންމި ނިންމުމެއް ކަމަށް ކިއާ އޯރާ ވިއާޖީން ބުނެފައިވެއެވެ.
އެ ކުންފުނިން ބުނެފައިވާ ގޮތުގައި ބޭރުގެ ޓުއާ އޮޕަރޭޓަރުން އަތުން ވެސް ޖީއެސްޓީ ނަގަން ދިވެހި ސަރުކާރުން ނިންމާފައި ވަނީ އެއްވެސް ގާނޫނީ އަސާސެއް ނެތިއެވެ. އެގޮތުން ރާއްޖެއިން ބޭރުގެ އެޖެންސީތަކުން، އެ ޓެކްސް ދެއްކުމަށްޓަކައި ރާއްޖޭގެ ޓެކްސް އިދާރާ މީރާގައި ރަޖިސްޓްރީވާން ޖެހޭނެ ކަމަށް ކަނޑައަޅާފައިވާއިރު، އެއީ ބަލައިގަނެވޭނެ ފިޔަވަޅެއް ނޫން ކަމަށް ބުނެފައިވެއެވެ.
އިޓަލީގައި ހިންގާ އެ ކުންފުނީގެ މައްޗަށް ދިވެހި ސަރުކާރުގެ ބާރު ނުހިނގާނެ ކަމަށް ކިއާ އޯރާ ވިއާޖީން ބުނެފައިވެއެވެ. އެގޮތުން ބޭރުގެ ކުންފުނިތަކުގެ މައްޗަށް ޓެކުހުގެ ޒިންމާތައް އުފުލުމަކީ ބައިނަލްއަގްވާމީ ގާނޫނުތަކާ ހިލާފު ކަމެއް ކަމަށާއި ބޭރު ގައުމެއްގެ ސަރުކާރަކަށް، އެ ގައުމުގެ ބޯޑަރުން ބޭރުގައި ގާނޫނީގޮތުން ހިންގާ ވިޔަފާރިތަކެއްގެ މައްޗަށް އެކައުންޓިން އަދި ޓެކުހުގެ ވާޖިބުތައް ލާޒިމުކުރުމުގެ ގާނޫނީ ބާރެއް ލިބިގެނެއް ނުވާކަމަށް ބުނެފައިވެއެވެ.
އެ ކުންފުނީގެ ކޮންސަލްޓެންސީ، ޑިޒައިނިންގް، އަދި މަންޒިލްތައް ވިއްކުމުގެ މަސައްކަތް ހިންގަނީ މުޅިންވެސް އިޓަލީގެ ބިމުގައިކަން ފާހަގަކޮށް ކިއާ އޯރާ ވިއާޖީން ބުނެފައިވަނީ، އިޓަލީގެ ގާނޫނުތައް ބުނާ ގޮތުން ޔޫރަޕިއަން ޔުނިއަންއިން ބޭރުގެ ދަތުރުތަކާ ގުޅިގެން އިންތިޒާމުކުރާ ޚިދުމަތްތަކަކީ، އީޔޫގެ ބޭރުގައި އެކަމުގެ ޓެކްސް ނެގޭނެ ކަންކަމެއް ނޫން ކަމަށެވެ.
ބުކްކޮށްފައިވާ ޚިދުމަތްތަކުން މިހާރުވެސް އިޓަލީގައި ޓެކްސް ދައްކާ ކަމަށާއި، ރިސޯޓުތަކާއި، ޓްރާންސްފަރތަކާއި އަދި ސީދާ ދިވެހިރާއްޖޭގައި ލިބިގަންނަ ހުރިހާ ޚިދުމަތްތަކަކުން މިހާރުވެސް ގްރީން ޓެކްސް ގަވައިދުން ދައްކަމުންދާކަމަށް އެ ކުންފުނިން ބުނެފައިވެއެވެ. އިޓަލީގައި އުފައްދާ އިތުރު އަގެއްގެ މައްޗަށް ޓެކްސް ނަގަން އުޅުމަކީ، ދިވެހިރާއްޖެއާ އެއްވެސް ގުޅުމެއް ނެތް މަސައްކަތެއްގެ މައްޗަށް، ނުހައްގުން ޓެކުހެއް ނަގަން ލާޒިމްކުރުން ކަމަށް ކިއާ އޯރާ ވިއާޖީން ބުނެފައިވެއެވެ.
ރާއްޖެއަށް ލިބޭ ޓެކުހުގެ އާމްދަނީ އިތުރުކުރަން ދިވެހި ސަރުކާރުން ބޭނުންނަމަ، ސީދާ ރިސޯޓުތަކާއި މަންޒިލުގައި ތިބެ ހިދުމަތް ފޯރުކޮށްދޭ ފަރާތްތަކުން ނަގާ ލޯކަލް ޖީއެސްޓީގެ ރޭޓު މައްޗަށް ޖެއްސުމުން އެކަން ހާސިލުކުރެވޭނެކަން ވެސް އެ ކުންފުނިން ފާހަގަކޮށްފައިވެއެވެ.
އެ ނިންމުމަކީ އެއަށްވުރެ ފުޅާ އިހުތިޖާޖެއްގެ ބައެއްކަން ފާހަގަކޮށް އެ ކުންފުނިން ބުނެފައިވަނީ، އެ ކުންފުނިން ވިއްކާ ކޮންމެ މަންޒިލަކަށް ބޭރުގެ ގައުމުތަކުގެ ޓެކުހުގެ ފައިސާ ބަލަހައްޓަން ޖެހިއްޖެނަމަ އެހެން ސަރުކާރުތަކުންވެސް ދިވެހިރާއްޖޭގެ ނަމޫނާއަށް ތަބާވާން ފަށައިފާނެ ކަމަށެވެ.
އެގޮތުން، ދިވެހި ސަރުކާރުގެ ފިޔަވަޅާ ދެކޮޅަށް، ޔޫރަޕިއަން ޓްރެވަލް އެޖެންޓްސް އެންޑް ޓުއާ އޮޕަރޭޓާސް އެސޯސިއޭޝަން (ECTAA) އިން ބްރަސެލްސްގައި ހުންނަ ދިވެހި އެމްބަސީއަށް ރަސްމީ ސިޓީއެއް ފޮނުވާފައިވާ ކަމާއި، އިނގިރޭސިވިލާތުގެ ޓުއާ އޮޕަރޭޓަރުންގެ އެސޯސިއޭޝަން ABTA އިން ވެސް އެ ގާނޫނަށް އަމަލުކުރުން ވަގުތީގޮތުން މެދުކަނޑާލުމަށް ދިވެހި ޓޫރިޒަމް މިނިސްޓަރަށް ގޮވާލާފައިކަން އެ ކުންފުނިން ފާހަގަކުރިއެވެ.
