ރާއްޖޭގެ އާންމު އިޖްތިމާއީ މިންގަނޑާއި ހިލާފަށް ހެދުންއަޅާ ބިދޭސީންނާ ހަވާލުވެތިބި ފަރާތްތަކަށާއި އެފަދަ ގޮތްތަކަށް ހެދުން އަޅާ ފަތުރުވެރިންނަށް ހިދުމަތްދޭ ފަރާތްތަކަށް ގާނޫނީ ފިޔަވަޅު އަޅާނެ ކަމަށް ފުލުހުން ބުނެފިއެވެ.
ފުލުހުން ނެރުނު ބަޔާނެއްގައި ބުނެފައިވަނީ، ދިވެހި މުޖުތަމައުގެ އިޖްތިމާއީ އަދި އާންމު އަހުލާގީ މިންގަނޑު ހިފެހެއްޓުމަކީ ދިވެހިރާއްޖޭގައި ދިރިއުޅޭ އެންމެހާ ފަރާތްތަކުން އަދާކުރަންޖެހޭ އާންމު މަސްއޫލިއްޔަތެއް ކަމަށެވެ.
އެހެންކަމުން، ދިވެހިރާއްޖޭގައި ދިރިއުޅޭ ބިދޭސީނބިދް ދިވެހި މުޖުތަމައުގެ ސަގާފަތާއި އާދަކާދައަށް އިހްތިރާމްކޮށް، އާންމު ތަންތަނާއި މަގުމަތީގައި އުޅޭ އުޅުމުގައި މުޖުތަމައުގެ އާންމު އިޖްތިމާއީ އަދި އަހުލާގީ މިންގަނޑު ހިފެހެއްޓުމުގެ ޒިންމާ އަދާކުރުމަށް ފުލުހުން ހަނދާންކޮށްދީފައިވެއެވެ.
ރާއްޖޭގައި ދިރިއުޅޭ ބައެއް ބިދޭސީން އާންމު އިޖްތިމާއީ މިންގަނޑާ ހިލާފަށް ނިވާކަން ކުޑަކޮށް ހެދުން އަޅައިގެން އާންމު ތަންތަނުގައި އުޅޭކަން އެ ހިދުމަތަށް ފާހަގަކުރެވިފައިވާކަމަށް އެ ބަޔާނުގައިވެއެވެ. ބައެއް ބިދޭސީންގެ އެ އަމަލުތަކަކީ މުޖުތަމައުގެ އާންމު އަހްލާގީ އަދި ސުލޫކީ މިންގަނޑާ ހިލާފު އަމަލުތަކެއް ކަމަށް ފުލުހުން ބުނެފައިވެއެވެ.
އޭގެ ސަބަބުން މުޖުތަމައުގެ އަމާންކަމާއި ސުލްހަމަސަލަސްކަމަށް ނޭދެވޭ އަސަރުތަކެއް ކޮށްފާނެ ހާލަތްތަކެއް ކުރިމަތުވުމުގެ ކުރިން އެފަދަ ކަންކަން ހުއްޓުވުމަށް ފުލުހުންނަށް މަތިކޮށްފައިވާ ގާނޫނީ ޒިންމާ އަދާކޮށް، އާންމު އިޖްތިމާއީ މިންގަނޑާ ހިލާފު އަމަލުތައް ހުއްޓުވުމުގެ ގާނޫނުގެ ދަށުން އެޅެންހުރި ފިޔަވަޅުތައް އަޅާނެ ކަމަށް ފުލުހުންގެ ބަޔާނުގައިވެއެވެ.
އެފަރާތެއްގެ ބެލެހެއްޓުމުގެ ދަށުން ދިވެހިރާއްޖޭގައި ދިރިއުޅޭ ބިދޭސީންގެ ކިބައިން އެފަދަ އަމަލުތައް ނުފެންނާނެ ގޮތަށް އެ ބިދޭސީންގެ އަމަލުތައް ބެހެއްޓުމަށް ހާއްސަ ސަމާލުކަމެއް ދިނުމަށް ބިދޭސީންނާ ހަވާލުވެ ތިބޭ ފަރާތްތަކަށް އިލްތިމާސްކޮށް ހަނދާންކޮށްދޭކަމަށް އެ ބަޔާނުގައިވެއެވެ.
އޭގެ އިތުރުން ފަތުރުވެރިންނަށް ހާއްސަކޮށްފައިވާ ސަރަހައްދުތައް ފިޔަވައި، އެ ނޫން އާންމު ތަންތަނާއި މަގުތަކުގައި ފަތުރުވެރިން އުޅޭ އުޅުމުގައި ދިވެހި މުޖުތަމައުގެ ސަގާފަތާއި އާދަކާދައަށް އިހްތިރާމްކޮށް، މުޖުތަމައުގެ އާންމު އިޖްތިމާއީ މިންގަނޑާ އެއްގޮތަށް ހެދުން އެޅުމަށް އެ ފަރާތްތަކަށް ހިދުމަތްދޭ ފަރާތްތަކުން ހާއްސަ ސަމާލުކަމެއް ދިނުމަށް ވެސް އިލްތިމާސްކޮށް ހަނދާންކޮށްދީފައިވެއެވެ.
ފުލުހުން ބުނެފައިވަނީ އެއާ ހިލާފަށް އަމަަލުކުރާ ފިޔަވަޅުތަކަށް ގާނޫނީ ފިޔަވަޅު އަޅަމުންދާނެ ކަމަށެވެ.
