ކާބަން ކްރެޑިޓް ފަދަ ގޮތްތައް ބޭނުންކޮށްގެން ރާއްޖޭގައި ހިމާޔަތްކޮށްފައިވާ ތަންތަނުން މަންފާ ހޯދޭނެ ގޮތްތަކުގެ ވާހަކަ އޮންނަނީ ގައުމީ ބޮޑު ސިއްރަކަށް ވެފައި ކަމަށާއި އެފަދަ ކަންކަމުގެ މަންފާ ކައުންސިލްތަކަށް ހޯދައިދޭންޖެހޭކަމަށް އައްޑޫ ސިޓީގެ މޭޔަރު އަލީ ނިޒާރު ވިދާޅުވެއްޖެއެވެ.
އެމްޑީޕީގެ ކޮންގްރެސްގެ އިންވެސްޓްމެންޓް ފޯރަމްގެ ޕެނަލް ޑިސްކަޝަންގައި ވާހަކަ ދައްކަވަމުން ނިޒާރު ވިދާޅުވީ، އައްޑޫ ސިޓީގައި ހިމާޔަތްކުރެވިފައި ހުރި އެއްވެސް ތަނަކަށް އިތުރު އެއްވެސް ބަދަލެއް ގެނައުމުގެ ވިސްނުމެއް ނެތް ކަމަށެވެ. އެހެންނަމަވެސް، އެހެން ހަމައެކަނި ބުނެގެން ތިބުމުގެ ބަދަލުގައި އެތަންތަނުން މަންފާއެއް ލިބެންޖެހޭނެ ގޮތްގޮތް އެނގެންޖެހޭނެ ކަމަށް އޭނާ ވިދާޅުވިއެވެ.
އެ މަޝްރޫއަކުން ޖައްވުން ކާބަން ނައްތާލެވޭ މިންވަރަށް ބިނާކޮށް، އެ މަޝްރޫއަކަށް ފައިނޭންސް ހޯދޭނެ ފަދަ ގޮތަކަށް އޮންނަ ކާބަން ކްރެޑިޓްގެ މޮޑެލް އާއި ކްލައިމެޓް ފައިނޭންސް ފަދަ ކަންކަމުން މަންފާ ލިބޭ ގޮތްތަކަކީ ގައުމީ ބޮޑު ސިއްރެއްގެ ގޮތުގައި އޮންނަ ކަމެއް ކަމަށް އޭނާ ސިފަކުރެއްވިއެވެ. އެފަދަ ގޮތްތައް ބޭނުންކޮށްގެން، ހިމަޔާތްކޮށްފައިވާ ތަންތަނުން މަންފާ ލިބޭނެ ގޮތަށް މަޝްވަރާދޭ އެއްވެސް ބަޔަކު ސަރުކާރުގައި ވެސް ނޫޅޭކަމަށް އޭނާ ވިދާޅުވިއެވެ.
”އަޅުގަނޑުމެންނަށް ދެން އިވޭ އެ ވާހަކަތައް ކާބަން ކްރެޑިޓްގެ ވާހަކަ ކްލައިމެޓް ފައިނޭންސިންއަށް ހުންނަ އޮޕޮޗުނިޓީތަކުގެ ވާހަކަ. އެހެންނަމަވެސް، އެ ސޯސްތަކަށް ދިޔުން ނުވަތަ އަޅުގަނޑުމެންނާ ހަމައަށް އަންނާނެ ގޮތަކަށް މަޝްވަރާދޭ އެއްވެސް ބަޔަކު ނޫޅޭ ސަރުކާރު ތެރެއަކު،“
އެމްޑީޕީގެ މިދިޔަ ސަރުކާރުގެ ތެރޭގައި ވެސް އެފަދަ ކަންކަމުގެ ތެރެއިން މަންފާއެއް ލިބިދާނެކަމުގެ ވާހަކައެއް ނުދެކެވޭ ކަމަށް ވެސް ނިޒާރު ވިދާޅުވިއެވެ.
ހިމާޔަތްކޮށްފައި ތަންތަނަށް އެއްވެސް ކަހަލަ ގެއްލުމެއް ވިޔަނުދީ، ބަލަހައްޓަން ބޮޑެތި ގުރުބާނީތަކެއް ވާންޖެހޭކަން ފާހަގަކުރައްވައި، އެ ވާހަކަތައް ސިއްރެއްގެ ގޮތުގައި ނުބާއްވައި، ކާބަން ކްރެޑިޓް ފަދަ ކަންކަމުގެ މަންފާތައް ކައުންސިލުތަކަށް ހޯދައިދޭންޖެހޭ ކަމަށް އޭނާ ވިދާޅުވިއެވެ.
”މި ވާހަކަތައް ސިއްރެއްގެ ގޮތުގައި ނުބާއްވައި މި މަންފާތައް ކައުންސިލްތަކަށް ހޯދައިދިނުމަށް މަސައްކަތްކުރަންޖެހޭ،“
ނިޒާރު އިތުރަށް ފާހަގަކުރެއްވީ، އައްޑޫގައި ހިމާޔަތްކޮށްފައި ހުރި ތަނެއް ޑީޒޯންކޮށް ނޭޗާ ޕާކުގެ ސަރަހައްދުގެ ތެރެއަށް ވެލި އަޅައި ހިއްކަމުންދާ ކަމަަށާއި އެކަން ކުރަމުންދަނީ ސަރުކާރުން ކަމެވެ. އަދި މަގެއް ހަދަން އެކަން ކުރަމުންދަނީ ކައުންސިލުން އެކަމާ ދެކޮޅަށް ނުކުމެ މުޒާހަރާކުރަމުން ދަނިކޮށް ސިޔާސީ ބޭނުމެއްގައި ކަމަށް އޭނާ ވިދާޅުވިއެވެ.
