ކޮވިޑް-19 އިން އަރައިގަތުމަށްޓަކައި، ރާއްޖެއާއި ޗައިނާއާއި ދެ ޤައުމު ގުޅިގެން ކުރެވިދާނެ ކަންތައްތަކާއި ބެހޭގޮތުން މަޝްވަރާކުރައްވައިފިއެވެ.
ވީޑިއޯގެ ޒަރީޢާއިން ފޮރިން މިނިސްޓަރު ޢަބްދުﷲ ޝާހިދާއި، ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖަންގް ލޮޖޮންގް އާއި ދެ ބޭފުޅުން ކުރެއްވި މަޝްވަރާގައި، ދެ ޤައުމު ގުޅިގެން މިހާރު ކުރިއަށްދާ މަސައްކަތްތަކާއި ޗައިނާއިން ރާއްޖޭގައި ހިންގަމުން އަންނަ މަޝްރޫޢުތަކާއި ބެހޭގޮތުން މަޝްވަރާ ކުރެއްވިއެވެ.
މީގެ އިތުރުން، މުސްތަޤުބަލުގައި ކުރިއަށް ގެންދިއުމަށް ރޭވިފައިވާ ބައެއް ކަންތައްތަކާ ބެހޭގޮތުން ވެސް، މަޝްވަރާކުރެއްވިއެވެ.
މި ބައްދަލުވުމުގައި ޗައިނާގެ ސަފީރު ދެއްކެވި ވާހަފުޅުގައި، ކޮވިޑް-19 އިން ރައްކާތެރިވުމަށްޓަކައި ރާއްޖެއިން ކުރަމުން އަންނަ މަސައްކަތްތަކުގައި އެހީތެރިކަން ފޯރުކޮށްދިނުމަށް ޗައިނާގެ ޝައުޤުވެރިކަން އެބައޮތްކަމަށް ވިދާޅުވިއެވެ.
https://twitter.com/MoFAmv/status/1264199259483602944?s=19
މި މަޝްވަރާ ބައްދަލުވުމުގައި، ފޮރިން މިނިސްޓަރު ޢަބްދުﷲ ޝާހިދާއި، ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖަންގް ލޮޖޮންގް ގެ އިތުރުން، މިނިސްޓަރ އޮފް ސްޓޭޓް ފޯރ ފޮރިން އެފެއަރޒް އަޙްމަދު ޚަލީލާއި، ފޮރިން ސެކްރެޓަރީ އަބްދުލްޣަފޫރު މުޙައްމަދާއި،ސެކްރެޓަރީ މަލްޓިލޭޓަރަލް ޑރ.ޢަލީ ނަޞީރު މުޙައްމަދާއި، ޖޮއިންޓް ސެކްރެޓަރީ މަރްޔަމް ސީނާ ވެސް ބައިވެރިވެވަޑައިގަތެވެ.
މީގެ އިތުރުން، ފޮރިން މިނިސްޓްރީއާއި، ޗައިނާ އެމްބަސީގެ އިސް ބައެއް ބޭފުޅުން ވެސް ބައިވެރިވެވަޑައިގަތެވެ.
