1 މިލިއަން ރުފިޔާގެ ބަޖެޓަކުން މާލޭގެ 45 މިސްކިތް މަރާމާތު ނުކުރެވޭނެ ކަމަށް މާލޭ ސިޓީ ކައުންސިލްގައި ބޭއްވި ހާއްސަ ޕްރެސް ކޮންފަރެންސް އެއްގައި މާލެ ސިޓީގެ މޭޔަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މުޢިއްޒު ވިދާޅުވީ، މާލޭގެ މިސްކިތްތަށް މަރާމާތުކުރުމަށް ފަންޑް ރެއިޒް ކުރުމަށް މި މަހުގެ 10 އަދި 11 ވަނަ ދުވަހަށް ބޮޑު ހަރަކާތެއް ކުރިޔަށް ގެންދަން ނިންމާފައިވާ ކަމަށެވެ. ނަމަވެސް މަސައްކަތަށް ވަގުތު ބޭނުންވާކަމަށް ގިނަ ބަޔަކު ބުނަމުން ގެންދާތީ ހަރަކާތް ފަސްކޮށްފައިވާ ކަމަށް މުއިއްޒު ވިދާޅުވި އެވެ.
މިސްކިތްތައް މަރާމާތުކުރުމުގެ މަސައްކަތް ސިޓީ ކައުންސިލާއި ހަވާލުކޮށްފައިވީ ނަމަވެސް ސަރުކާރުން ކައުންސިލަށް ދީފައިވަނީ އެއް މިލިއަން ރުފިޔާގެ ބަޖެޓެއްކަމަށް މުޢިއްޒު ވިދާޅުވި އެވެ. އަދި އެއް މިލިއަން ރުފިޔާއިން މާލޭގެ 45 މިސްކިތް މަރާމާތު ނުކުރެވޭނެ ކަމަށާއި، މިއީ ނަމެއްގައި ދީފައިވާ ބަޖެޓެއްގެ ގޮތުގައި މޭޔަރު ސިފަ ކުރެއްވި އެވެ.
މީގެ އިތުރުން އިސްލާމިކް މިނިސްޓްރީއަށް އެ ޝަކުވާތައް ހުށަހެޅުމުން ވެސް ބަޖުޓުގެ މައްސަލައިގައި އެދެވޭ ހައްލެއް ލިބިފައި ނުވާކަމަށް މޭޔަރު ވިދާޅުވި އެވެ.
ސިޓީ ކައުންސިލުން މިސްކިތްތަކަށް ހާއްސަ އިސްކަމެއް ދޭކަން ފާހަގަކޮށް މޭޔަރު ވިދާޅުވީ، ރައްޔިތުންގެ އެހީތެރިކަމާއި އެކު ވިޔަސް ނުވަތަ ވިޔަފާރިވެރިންގެ ފަނޑުގެ އެހީގައި ނަމަވެސް މިސްކިތްތަކަށް ގެންނަން ޖެހޭ ބަދަލު ގެންނާނެ ކަމަށެވެ.
