އައްޑޫގައި ހިއްކާ ފަސް ރަށާއިއެކު ފަތުރުވެރިކަން ފުޅާކުރެވޭނެ: އިބްރާހިމް ޝަރީފް

އައްޑޫ ސަރަހައްދުގައި ފަސް ރަށެއް ހިއްކުމަށް ސަރުކާރުން ނިންމާފައިވާ ނިންމުމަކީ އެ ސަރަހައްދުގެ ފަތުރުވެރިކަމުގެ ސިނާއަތު ފުޅާ ކުރުމަށް އެޅި މުހިންމު ފިޔަވަޅެއްކަމަށް މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.

އައްޑޫ ތަރައްގީ ކުރުމަށާއި، އެއަރޕޯޓާއި ސީޕޯޓު ޕްރައިވެޓައިޒްކުރުމަށް ގޮވާލާ ގަރާރެއް ހުށައެޅިފައިވަނިކޮށް އިބްރާހިމް ޝަރީފް ވަނީ ސަރުކާރުން އައްޑޫގައި ހިންގަމުންދާ މަސައްކަތްތަކަށް އަލިއަޅުއްވާ ވާހަކަދައްކަވާފައެވެ. އޭނާ ވިދާޅުވީ، ގަން އިންޓާރނެޝަނަލް އެއަރޕޯޓު ރަނގަޅު ގޮތުގައި ހިންގޭނީ އެ ސަރަހައްދުގެ ގެސްޓް ހައުސް އާއި ރިސޯޓުގެ އެނދުގެ ޖާގަ އިތުރުކޮށްގެންކަމަށެވެ.

ޝަރީފް ވިދާޅުވީ، ސަރުކާރުން މަސައްކަތްކުރަމުންދަނީ އެއަރޕޯޓު ތަރައްގީ ކުރުމަށާއި އެނދުގެ ޖާގަވެސް އިތުރުކުރުމަށްކަމަށެވެ. އެގޮތުގެ މަތިން ފަސް ރަށެއް ހިއްކުމަށް ރައީސް ސާލިހު ކަނޑައަޅުއްވާ ދެއްވާފައިވާކަމަށާއި، އެކަމުގެ ސަބަބުން އައްޑޫއަށް ކުރިއެރުންތަކެއް ލިބިގެންދާނެކަމަށް ޝަރީފް ފާހަގަކުރެއްވިއެވެ.

Guest House adhi resort bed capacity ithuru kohgen GIA ragalhah hingeynee. Airport tharaggee kurumaa eku bed capacity ithurukurah @ibusolih ge sarukaarun 5 rah kikkumuge project kuriyah gendhiumakee akee tourism dhemehetteni gothakah Addu ga kuriyah elhi muhimmu fiyavalheh

— Ibrahim Shareef (@AdduShareef) March 5, 2023

އޭނާ ވިދާޅުވީ، އައްޑޫގެ ހަނކެޑެ އަދި ހިއްކަމުންދާ ފަސް ރަށުގައިވެސް ރިސޯޓު ބިނާކުރުމުން، އެ ސަރަހައްދުގެ ފަތުރުވެރިކަމަށް ދިރުމެއް ލިބިގެންދާނެކަމަށެވެ. އަދި އެކަމުގެ ސަބަބުން ގެސްޓްހައުސް ވިޔަފާރި އިތުރަށް ފުޅާކުރުމަށްވެސް ހިތްވަރެއް ލިބިގެންދާނެކަމަށާއި، ގެސްޓްހައުސްތައް ރަނގަޅަށް ހިނގާނީވެސް ރިސޯޓުތައް ކައިރީގައި ހުރެގެންކަމަށް ޝަރީފް ފާހަގަކުރެއްވިއެވެ.

މީގެ އިތުރުން ޝަރީފް ވިދާޅުވީ، އެއަރޕޯޓު އިތުރަށް ތަރައްގީ ކުރުމަށް ކޮންޓްރެކްޓުގައި ސޮއިކުރުމުގެ ވަގުތުވެސް ކަނޑައެޅިފައިވާކަމަށެވެ. އެހެންކަމުން އެ މަސައްކަތްތައް ނިމުމާއިއެކު، ގަން އެއަރޕޯޓުން އަހަރަކު 1.5 މިލިއަން ޕެސެންޖަރުންނަށް ހިދުމަތް ދެވޭނެކަމަށް އޭނާ ވިދާޅުވިއެވެ.