ގުރައިދޫ ބައި އިލެކްޝަންގެ ނަތީޖާއިން އެނގިގެންދަނީ ރައީސް އިބްރާހިމް މުހައްމަދު ސާލިހަށް ދެވަނަ ދައުރެއް ލިބިވަޑައިނުގަންނަވާނެކަން ކަމަށް މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.
އެމްޑީޕީގެ ކެނޑިޑޭޓަށް ގުރައިދޫ ބައި އިލެކްޝަން ކާމިޔާބު ކުރެވިފައިވާއިރު، އެ ކާމިޔާބީ ހާސިލު ކުރެވިފައިވަނީ ނުފޫޒުގެ ބޭނުންކޮށްގެންކަމަށް އިދިކޮޅާއި އެހެނިހެން ޕާޓީތަކުންވެސް ދަނީ ތުހުމަތުކުރަމުންނެވެ. އެގޮތުން ކިއުގައި އިތުރަށް ވޯޓު އަޅާނެ ބަޔަކު ނެތް އިރު، އިލެކްޝަންސް ކޮމިޝަނުން ވަގުތު އިތުރުކޮށްފައިވާކަމަށާއި އެކަން ކުރުމުގެ މަގުސަދަކީ ވޯޓު އޮޅުވާލުންކަމަށް ބައެއް ފަރާތްތަކުންދަނީ ފާހަގަކުރައްވަމުންނެވެ.
ޝިޔާމް ވިދޅާުވީ، ގުރައިދޫ ބައި އިލެކްޝަނުން ބޮޑު ހަގީގަތެއް ބުނެދޭކަމަށެވެ. އަދި އެއީ އެންމެހާ ބާރާއި ނުފޫޒު އޮތް އިރުވެސް ސަރުކާރަށް ލިބުނީ 48 އިންސައްތަކަންކަމަށް އޭނާ އިޝާރާތްކުރެއްވިއެވެ. ޝިޔާމް ވިދާޅުވީ، އެކަމުގެ ސަބަބުން ރައީސް ސާލިހަށް ދެވަނަ ދައުރެއް ލިބިވަޑައިނުގަންނަވާނެކަން ކަށަވަރު ކުރެއްވޭކަމަށެވެ. އެހެންކަމުން ކުރިއަށް އޮތް ރިޔާސީ އިންތިހާބުގައި ރައީސް ޔާމީންއަށް އުންމީދު އިތުރުވެގެންދާކަމަށްވެސް ވިދާޅުވިއެވެ.
ގުރައިދޫ ބައި-އިލެކްޝަން ބުނެދޭ އެންމެބޮޑު ހަޤީގަތަކީ ހުރިހާ ބާރަކާ ނުފޫޒާއެކު ސަރުކާރަށް ލިބުނީ %48 ކަން. މިއީ ރައީސް @ibusolih ގެ 2 ވަނަ ދައުރެއްގެ ހުވަފެންފުޅުގައި ކުލަނުޖެހޭނެކަން ކަށަވަރުކޮށްދޭ ނަތީޖާއެއް . ރައީސް ޔާމީނަށް 2023 ގެ އުންމީދު އިތުރުވި ނަތީޖާއެއް إن شاء الله pic.twitter.com/zc0mjU5WR0
— Ahmed Shiyam (@Shiyamaldives) April 16, 2023
ޝިޔާމްގެ ނުރުހުންވުން ފާޅުކުރެއްވިއިރު، ގުރައިދޫ ބައި އިލެކްޝަން އެމްޑީޕީއަށް ކާމިޔާބު ކުރެވިފައިވަނީ ފުރަތަމަ ފަހަރަށެވެ. ރައީސް ސާލިހުވަނީ އެއީ ބޮޑު ކާމިޔާބީއެއްކަމަށް ސިފަކުރައްވާފައެވެ. އަދި އެކަމުގެ ސަބަބުން ސަރުކާރަށް ތާއީދު އޮތްކަން ދޭހަވާކަމަށްވެސް އެމަނިކުފާނު ވަނީ ވިދާޅުވެފައެވެ.
advertisment