ޖުމްހޫރީ ޕާޓީއިން ޕީޕީއެމް ޕީއެންސީ ކޯލިޝަނުން ކުރަންވީ އުންމީދުތައް ކިޔައިދެއްވުމަށް ނުހެއްދެވުމަށް ޕީޕީއެމްގެ ނައިބު ރައީސް މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.
އެމްއެންޕީ، ޖޭޕީ އަދި ޑިމޮކްރެޓްސްއިން ގުޅިފައިވާ ޕާޓީތަކުގެ ކެނޑިޑޭޓަކު ނެރުމަށް އެއްބަސްވެވިފައިވާކަަމަށާއި، ކުރިއަށް އޮތް ދުވަސްތަކުގެ ތެރޭގައި ޕީޕީއެމް އާއިއެކުވެސް މަޝްވަރާތައް ކުރެވެންދާނެކަމަށް ރިޕޯޓުކުރެވެމުމްދާއިރު، ޖޭޕީ ލީޑަރުގެ ތަރުޖަމާނު ކުރީގެ މިނިސްޓަރު އަމީންވަނީ އެ ޕާޓީގެ ހަރަކާތެއްގައި ޕީޕީއެމްއިންވެސް ކޯލިޝަން ހެދުމަށް އެއްބަސްވުމަށް އެދިވަޑައިގެންފައެވެ. އޭނާ ވިދާޅުވީ، ޕީޕީއެމްއަށްވެސް އޮތް އުންމީދަކީ ގާސިމްކަމަށެވެ.
އަމީންގެ ވާހަކަތަކަށް ރައްދުދެއްވައި ޝިޔާމް ސޯޝަލްމީޑިއާގައި ކުރެއްވި ޕޯސްޓެއްގައި ވިދާޅުވީ، ޕީޕީއެމްގެ އުންމީދުތައް އަމީން ވިދާޅުވެދެއްވުމަކީ ކުރައްވަން ހެޔޮ ނުވާނެވަރުގެ ކަމެއްކަމަށެވެ. ޝިޔާމް ވިދާޅުވީ، ޖުމްހޫރީ ޕާޓީ މިއަދުވެސް އޮތީ “ދިވެހިންގެ ކަނޑުވިއްކާލާ” ކޮވިޑުގައި އެތައް ވައްކަމެއް ކޮށް ދިވެހި ދައުލަތް ދަރުވާލި “ޣައްދާރު” ސަރުކާރާއިއެކުކަމަށެވެ. އޭނާ ވިދާޅުވީ، އަމީންގެ ރިމޯޓުވެސް އޮތީ ރައީސް އިބްރާހިމް މުހައްމަދު ސާލިހުގެ އަތުގައިކަމަށެވެ. އަދި އޭނާއަށް އެ ވިދާޅުވެވެނީ “ވަރަށް ވާހަކަ” ކަމަށްވެސް ވިދާޅުވިއެވެ.
ހެޔޮނުވާނެ ޕީ.ޕީ.އެމްގެ އުންމީދު އަމީން އަޅުގަނޑުމެންނަށް ކިޔައިދެއްވަން ނަހައްދަވާ. އަދިވެސް ތިޔަތިއްބެވީ ދިވެހިންގެ ކަނޑުވިއްކާލާ ކޮވިޑުގައި އެތައް ވައްކަމެއްކޮށް ދިވެހި ދައުލަތް ދަރުވާލި މިޣައްދާރު ސަރުކާރާއެކު. މަނިކުފާނުގެ ރިމޯޓުވެސް އޮތީ ސޯލިހު އަތުގައި. މީވަރަށް ވާހަކަ. pic.twitter.com/YuwjZj5dV5
— Ahmed Shiyam (@Shiyamaldives) July 21, 2023
ޖޭޕީއިން ކޯލިޝަން ހެދުމަށް ޝައުގުވެރިކަން ހުރިކަން ތަކުރާރުކުރަމުންދާއިރު، އެ ވާހަކަތައް އެންމެ ފުރަތަމަ ފެންމަތިވުމާއިއެކުވެސް އިދިކޮޅު ކޯލިޝަނުންވަނީ ބަޔާނެއް ނެރެފައެވެ. އެގޮތުން ރައީސް ސާލިހުގެ ވެރިކަން ނިމުމަކަށް ގެނައުމަށް ކުރަމުންދާ މަސައްކަތްތަކަށް ޝުކުރުވެރިވާކަމަށާއި އެހެންނަމަވެސް ގުޅިފައިވާ ޕާޓީތަކުގެ ކެނޑިޑޭޓަކީ ރައީސް ޔާމީންކަމަށް އެ ޕާޓީއިން ބުނެފައިވެއެވެ. އެ ޕާޓީގެ އެކި މެމްބަރުންވަނީ އެހެން ޕާޓީއެއްގެ ފަހަތަށް އެރުމާއި ދެކޮޅަށް ހުރިކަމުގެ ޝުއޫރުތައް ސޯޝަލްމީޑިއާ މެދުވެރިކޮށް ފާހަގަކޮށްފައެވެ.