ރައީސް ޔާމީން ވެރިކަމަށް ގެންނަން ދައްކަން ޖެހުނު ކޮންމެ ވާހަކައެއް ދައްކާނަން: އާދަމް ޝަރީފް

އިދިކޮޅުގެ ރިޔާސީ ކެނޑިޑޭޓު ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވެރިކަމަށް ގެނައުމަށް ދައްކަން ޖެހުނު ކޮންމެ ވާހަކައެއް ދައްކާނެކަމަށް މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވިދާޅުވެއްޖެއެވެ.

އާދަމް ޝަރީފް ކުރެއްވި ޓުވީޓެއްގައި ވިދާޅުވެފައިވަނީ ޕާޓީއާއި ލީޑާރޝިޕް ބައިބައިކޮށް، ރައީސް ޔާމީންގެ ސަޕޯޓަރުން މާޔޫސްކުރުމުގެ ނިޔަތުގައި ކުރަމުންދާ މަސައްކަތް ކާމިޔާބުނުވާނެކަމަށެވެ.

ރައީސް ޔާމީން މިނިވަންކޮށް ޕީޕީއެމް/ޕީއެންސީ ގެ ވެރިކަމެއް ގެނައުމަށްޓަކައި ކުރަންޖެހޭ ކޮންމެ ކަމެއް، އަދި ދައްކަންޖެހުނު ކޮނެމް ވާހަކައެއް ދައްކާނެކަމަށް އާދަމް ޝަރީފް ވަނީ ވިދާޅުވެފައެވެ

Party aai leadership baibaikoh, RY ge supporters maayoos kuruvumuge niyathugai kuramundhaa masakkaiy kaamiyaabeh nuvaane,IA.
RY minivankoh, PPMPNC verikamah genaumattakai kuranjehey komme kameh, dhakkanjehey komme vaahakaeh dhakkaanan!
Saabithukamaai azumaaeku dhaanee kuriah! pic.twitter.com/QFQcVFwF7v

— Adam Shareef Umar (@Adamshareefz) April 19, 2023

އެކި ފުރުސަތުތަކުގައި ރައީސް ޔާމީން މިނިވަންކުރުމަށް ގޮވާލަމުންދާ އާދަމް ޝަރީފް ވަނީ މީގެ ކުރިން މި ރަމަޟާން މަސް ފެށުނުއިރުވެސް ރައީސް ޔާމީން ނުހައްގުން ޖަލުގައި ހުންނަވަން ޖެހުނީތީ ހިތާމަކުރައްވާކަމަށް ވިދާޅުވެފައެވެ.

ބަދަލު ހިފުމާއި ސިޔާސީ ބޭނުމުގައި ސަރުކާރުން ރައީސް ޔާމީން އަށް ދެމުންދާ އަނިޔާއިން ހާމަވަނީ ސަރުކާރުގެ ޖައްބާރުކަމާއި، ރަހުމު ކުޑަކަންކަމަށް އާދަމް ޝަރީފް ވިދާޅުވެފައިވެއެވެ. އަދި ރައީސް ޔާމީން ގެއަށް ބަދަލުކުރުމަށް ކުރަމުންދާ މަސައްކަތް ހުއްޓާނުލައްވާނެކަށްވެސް ވިދާޅުވިއެވެ.

ރައީސް ޔާމީން ޖަލު ހުކުމެއްގައި ހުންނެވި ނަމަވެސް އިދިކޮޅުން ގަބޫލުކުރާ ގޮތުގައި ރައީސް ޔާމީންގެ ނަންފުޅު ރިޔާސީ އިންތިހާބުގެ ކަރުދާހުގައި އޮންނާނެއެވެ. އަދި ރިޔާސީ އިންތިހާބަށް ވާއިރަށް ރައީސް ޔާމީން މިނިވަންކުރެވޭނެކަމުގެ ޔަގީންކަން އިދިކޮޅަށް އެބައޮތެވެ.

ރައީސް ޔާމީން އަށް 11 އަހަރުގެ ޖަލު ހުކުމެއް އިއްވާފައިވަނީ މިދިޔަ އަހަރުގެ ޑިސެމްބަރު 25 ގައެވެ. ރައީސް ޔާމީން މައްޗަށް ހުކުމް ކޮށްފައިވަނީ ރިޝްވަތު ގަބޫލުކުރުމާއި މަނީ ލޯންޑަ ކުރިކަމުގެ ކުށް ސާބިތުވެގެންނެވެ.

ޝަރުއީ ކޯޓުތަކުން ރައީސް ޔާމީންގެ މައްޗަށް ކުށް ސާބިތުކޮށް ހުކުމް އިއްވި ނަމަވެސް، އިދިކޮޅުން ބުނަމުން ދަނީ އެއީ ބާތިލް ހުކުމެއްކަމަށެވެ. ރައީސް ޔާމީންގެ މައްޗަށް ހުކުމް އިއްވާފައިވަނީ ކޯޓުތަކަށް އަތް ބާނާގެންކަމަށް އިދިކޮޅުން ތުހުމަތުކުރެއެވެ.