“ކޮތަޅު ގާނޫނު” އިސްލާހުނުކޮށް މަޖިލީސް ޗުއްޓީއަށް ނުދިއުމަށް ޕީއެންސީގެ ނައިބު ރައީސް، މަޑުއްވަރީ ދާއިރާގެ މެންބަރު އަދަމް ޝަރީފް އުމަރު ގޮވާލައިފިއެވެ.
ކޮތަޅުން ނަގާ ފީ 2 ރުފިޔާއަށް ބޮޑުކުރުމާއި ގުޅިގެން ގިނަ ބަޔަކު ކަންބޮޑުވުން ފާޅުކުރަމުންދާ މި ދަނޑިވަޅުގައި ޓުވީޓެއް ކުރައްވާ އާދަމް ޝަރީފް ގޮވާލީ ކޮތަޅުގެ މައްސަލައިގައި ސަރުކާރުގެ ސްޓޭންޑް އަވަހަށް ބަދަލުކޮށް، ގާނޫނު އިސްލާހުކުރުމަށެވެ. އަދި ގާނޫނު އިސްލާހުނުކޮށް ރައްޔިތުންގެ މަޖިލީސް ޗުއްޓީއަށް ނުދިއުމަށްވެސް އޭނާ ވަނީ އިލްތިމާސްކޮށްފައެވެ.
އޭނާ ވިދާޅުވެފައިވާ ގޮތުގައި ރައްޔިތުންނަށް ކޮތަޅު ގާނޫނު ސިފަވަނީ ޑްރެކިއުލާއެއްގެ ގޮތުގައެވެ.
Kothalhuge massalaigai @governmentmv ge stand avahah badhlukoh, qaanoon islaah kurumah govaalan! Adhi qaanoon islaah nukoh @mvpeoplesmajlis chuttee ah nudhiumah ilthimaas kuran.
"Kothalhu Qaanoon" rayyithunnah sifavanee Dracula akah!
https://t.co/HVuhxx9Oi1 via @DhiyaresNews— Adam Shareef Umar (@Adamshareefz) April 22, 2023
ކުނި މެނޭޖުކުރުމުގެ ޤާނޫނުގެ ބިލު ސަރުކާރުން ރައްޔިތުންގެ މަޖިލީހަށް ހުށަހެޅިއިރު ޕްލާސްޓިކް ކޮތަޅުން ފީ ނެގުމުން އިސްތިސްނާ ވާ ހާލަތްތަކުގެ ތެރޭގައި 50 (ފަންސާސް) ނުވަތަ އެއަށްވުރެ ގިނަ ޕްލާސްޓިކް ކޮތަޅު ހިމެނޭ ކޮތަޅު ބޮނޑި ވާނީ ހިމަނާފައި ކަމަށާއި ނަމަވެސް، ކުނި މެނޭޖުކުރުމުގެ ބިލް މަޖިލީހުން ފާސްވެގެން އައިއިރު މި މައްދާ ވަނީ އުނިކުރެވިފައިކަމަށް ބުނެ އެންވައިރަމެންޓް މިނިސްޓްރީއިން ނެރުން ބަޔާނުގައި ވަނީ ކޮތަޅުގެ އަގު ބޮޑުވި މައްސަލައިގައި ރައްޔިތުންގެ މަޖިލީސް ކުށްވެރިކޮށްފައެވެ.
ވިޔަފާރި ހަރަކާތަކުން ޕޮއިންޓް އޮފް ސޭލްގައި ކަސްޓަމަރަށް ވިއްކާ ނުވަތަ ފޯރުކޮށްދޭ ކޮންމެ ޕްލާސްޓިކް ކޮތަޅަކަށް ކަސްޓަމަރުގެ އަތުން 2 (ދޭއް) ރުފިޔާގެ ފީއެއް ނަގަން ފެށުމާއި ގުޅިގެން ކޮތަޅު ބޮނޑީގެ އަގު ކުރިއަށްވުރެ ވަރަށް ބޮޑުތަން އުފުލިފައިވާ މައްސަލައާ ގުޅިގެން މިނިސްޓްރީއިން ނެރެފައިވާ ބަޔާނެއްގައި ބުނެފައިވަނީ، ކޮތަޅު ބޮނޑި ގަންނަ ފަރާތްތަކަށް އެހާ ބޮޑުތަނުން އަގު ބޮޑުވާން ދިމާވި ސަބަބަކީ، ކުނި މެނޭޖުކުރުމުގެ ޤާނޫނުގައި މިހާރު ބުނެފައިވާ ގޮތުން، ކޮތަޅު ބޮނޑި ގަންނަ ފަރާތްތަކުން ހޯލްސޭލް ރޭޓުގައި ކޮތަޅު ބޮނޑި ގަތަސް އެ ބޮނޑީގެ އަގުގެ އިތުރުން އެ ބޮނޑީގައިވާ ކޮންމެ ކޮތަޅަކަށް 2 ރުފިޔާގެ ފީ އެއް ދައްކަން ޖެހުންކަމަށެވެ. އާންމު ގޮތެއްގައި ބޮނޑި ޕެކްކޮށްފައި ހުންނަނީ 100 ކޮތަޅުން ކަމަށްވެފައި ކޮންމެ ކޮތަޅަކަށް 2 ރުފިޔާގެ ރޭޓުން ޖުމްލަ 200 ރުފިޔާ، ފީ ގެ ގޮތުގައި ދައްކަން ޖެހޭކަން މިނިސްޓްރީއިން ވަނީ ފާހަގަކޮށްފައެވެ.
ބަޔާނުން ދޭހަވާ ގޮތުގައި މިނިސްޓްރީއިން މި މައްސަލައިގައި ކުށްވެރިކޮށްފައިވަނީ މަޖިލީހެވެ. މި މައްދާ އުނިކުރެވިފައިވީ ނަމަވެސް، އެ ބިލަކީ ކުނީގެ އަސާސީ ޚިދުމަތް ދިނުމަށް މުހިއްމު ބިލަކަށްވާތީވެ، ސަރުކާރުން ނިންމީ ތަޞްދީޤުނުކޮށް ފޮނުވާލުމުގެ ބަދަލުގައި އެހެން ހުރި މައްސަލަތަކަށް ހައްލު ހޯދައި ދިނުމަށް ހުށަހަޅަންޖެހޭ އިސްލާހުތައް ވަކިން ހުށައެޅުމަށް މިނިސްޓްރީއިން ބުނިއެވެ. އެގޮތުން، އިސްވެ ދެންނެވުނު މައްސަލަ ވެސް ހައްލުކުރެވޭ ގޮތަށް ކުނި މެނޭޖުކުރުމުގެ ޤާނޫނަށް ސަރުކާރުން ވާނީ ފާއިތުވީ މާރިޗް މަހު އިސްލާހް ހުށަހަޅާފައެވެ. މި އިސްލާހް މަޖިލީހުން ފާސްވުމުން މިހާރު ދިމާވެފައިވާ މައްސަލައަށް ޙައްލު ލިބިގެންދާނެކަމަށް ސަރުކާރުން ގަބޫލުކުރެއެވެ.
މިނިސްޓްރީއިން ބުނެފައިވާ ގޮތުގައި ޕްލާސްޓިކް ކޮތަޅުން ފީއެއް ނަގަން ސަރުކާރުން ނިންމީ އެއީ އާންމު ދިރިއުޅުމުގެ ތެރޭގައި އުފެދޭ ޕްލާސްޓިކް ކުނި މަދުކުރުމަށް ދުނިޔޭގެ ޤައުމުތަކުގައި އެންމެ ކާމިޔާބުކަމާއެކީ ޢަމަލުކުރާ އެއް ސިޔާސަތު ކަމަށްވެފައި، އެ ސިޔާސަތު ތަންފީޛުކޮށްފިނަމަ ރާއްޖެއަށް ދިމާވެފައިވާ ޕްލާސްޓިކް ކުނީގެ މައްސަލައަށް އެދެވޭ ހައްލެއް ލިބޭނެތީއެވެ. އަދި ރާއްޖެއަކީ ނާޒުކު ތިމާވެށްޓެއް ލިބިފައިވާ އަދި ފަތުރުވެރިކަމުގެ ސިނާއަތަށް މުޅި އިޤްތިޞާދު ބިނާވެފައިވާ ޤައުމަކަށްވެފައި ޕްލާސްޓިކުން ވެށި ހިމާޔަތްކުރުމަކީ ކޮންމެހެން ކުރަންޖެހިފައިވާ ޤައުމީ މަސައްކަތަކަށް ވާތީކަމަށްވެސް މިނިސްޓްރީއިން ވަނީ ބުނެފައެވެ.
ފްލާސްޓިކް މަދުކުރުމުގައި ހިންގޭ މިފަދަ ޤައުމީ ހަރަކާތްތަކުގައި ވީހާވެސް ގިނަ ފަރާތްތަކެއްގެ އެއްބާރުލުމާއި ބައިވެރިވުން ލިބުމަށް އެދޭކަމަށް މިނިސްޓްރީއިން ވަނީ ބުނެފައެވެ. އަދި އާންމު ދިރިއުޅުމުގައި، ވީވަރަކުން އެއްފަހަރު ބޭނުންކޮށްފައި އުކާލެވޭ ސިންގަލް ޔޫސް ޕްލާސްޓިކްގެ ބާވަތްތައް މަދުކުރުމަށްވެސް މިނިސްޓްރީއިން ވަނީ އެދިފައިވާއިރު، ސިންގަލް ޔޫސް ޕްލާސްޓިކް ކޮތަޅުގެ ބަދަލުގައި ގިނަ ފަހަރު ބޭނުންކުރެވޭ ތިމާވެށްޓާއި ރައްޓެހި ކޮތަޅު ބޭނުންކުރުމަށްވެސް އެދިފައެވެ. ވިޔަފާރި ކުރައްވަން ވަޑައިގަންނަވާއިރުވެސް ގެއިން މިފަދަ ކޮތަޅެއް ހިއްޕަވައިގެން ވަޑައިގަތުމަށް މިނިސްޓްރީއިން ވަނީ އިލްތިމާޒްކޮށްފައެވެ.