މި ސަރުކާރާއި ރައީސް އިބްރާހިމް މުހައްމަދު ސާލިހް އަށް ހެޔޮ ބަހެއް ބުނަނީ ސިޔާސީ ވަޒީފާތަކުގައި ތިބި މަދު ބައެއް ކަމަށް މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެއެވެ.
އާޒިމް ވިދާޅުވީ ބައެއް ދިވެހިން ތިބީ ރައީސް ސާލިހަށް ދެވަނަ ދައުރެއް ދޭކަށް ނޫން ކަމަށެވެ.
މިހާރު ރައީސް ސޯލިހަށް، ސޯލިހްގެ ސަރުކާރަށް
ހެޔޮބަހެއް ބުނާއަޑު އިވެނީ ސިޔާސީ ވަޒީފާގައި ތިބި މަދު
ބައެއް. ދިވެހިން ތިބީ ރައީސް ސޯލިހަށް ދެވަނަ ދައުރެއް
ދޭކަށެއް ނޫން !
— 𝐀𝐥𝐢 𝐀𝐳𝐢𝐦 (@aliaazim) May 13, 2023
އާޒިމް އަކީ އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު އިސްވެ އުފައްދަވާފައިވާ ފިކުރެއްގެ ދިރުމަށް ނިސްބަތްވެ ވަޑައިގަންނަވާ އެމްޑީޕީގެ މެމްބަރެކެވެ. ފިކުރެއްގެ ދިރުމުން ރައީސް ސާލިހާއި ދެކޮޅަށް މަސައްކަތް ތަކެއް ކުރަމުން ގެންދާއިރު ދާދިފަހުން ޗާގޮސްގެ މައްސަލަ އާއި ގުޅިގެން އިދިކޮޅު ކޯލިޝަނުން ވަނީ ރައީސް ސާލިހް އަޒުލު ކުރުމަށް މަޖިލީހަށް ހުށަހެޅުމަށް ނިންމާފައެވެ. ފިކުރެއްގެ ދިރުމުގެ ފަރާތުން އެކަމުގައި ބައިވެރިވެ އާޒިމް ބުނެފައިވަނީ ރައީސް އާއި ހާރިޖީ ވަޒީރު އަބްދުﷲ ޝާހިދުގެ އިތުބާރު ނެތްކަމުގެ މައްސަލަ މަޖިލީހަށް އިދިކޮޅުން ހުށަހަޅަނީ އެ ފެކްޝަންގެ ތާއީދާއި އެކުގައި ކަަމަށެވެ.
އާޒިމް އާއި ފިކުރެއްގެ ދިރުމަށް ރައީސް ސާލިހްގެ ފެކްޝަންގެ ފަރާތުން ބަހުގެ ހަމަލާތައް އަމާޒުވެފައިވާއިރު، ދާދި ފަހުން އެމްޑީޕީގެ ޗެއަރޕާސަންގެ ނައިބު އިބްރާހިމް ވަހީދު (އިބްރޭ) ވަނީ ވިދާޅުވެފައެވެ.
އެމްޑީޕީގެ ޕާލިމެންޓަރީ ގްރޫޕްގެ ވިޕްލައިން އާއި ހިލާފުވެގެން މީގެ ކުރިންވެސް ވަނީ ބައެއް މެމްބަރުންނަށް ފިޔަވަޅު އަޅާފައެވެ. ޕާޓީގެ ފަރާތުން މެމްބަރުންނަށް އަޅާ ފިޔަވަޅު ތަކުގެ ތެރޭގައި ނަސޭހަތް ތެރި ވުމާއި، ޕާޓީގެ ހަރަކާތްތަކުން އެކަހެރި ކުރުމާއި އެތެެރޭގެ އިންތިހާބު ތަކުަގައި ވާދަ ނުކުރެވޭ ގޮތް ހެދުމުގެ އިތުުރުން ޕާޓީން ވަކި ކުރުން ހިމެނެއެވެ.
ޗާގޮސްގެ މައްސަލައިގައި ބަންޑާރަ ނައިބު އިބްރާޙިމް ރިފްއަތު ހިމެނޭހެން ރައީސް އާއި ހާރިޖީ ވަޒީރުގެ އިތުބާރު ނެތް ކަމަށް އިދިކޮޅުން މަޖިލީހަށް ހުށަހަޅާފައިވަނީ ހުސްވި ހަފްތާގެ ތެރޭގައެވެ. އިދިކޮޅުން އެ މައްސަލަ މަޖިލީހަށް ހުށަހެޅުމަށް ފަހު މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމެއްގައި ބުނެފައިވަނީ އެ މަސައްކަތަކީ ގައުމީ މަސައްކަތެއް ކަމަށާއި އެކަމުގައި ވީހާ ގިނަ މެމްބަރުން ބައިވެރި ވުމަށް އެދޭ ކަމަށެވެ. އަދި ބަންޑާރަ ނައިބުގެ ޒިންމާ އަކީ ރައްޔިތުންނަށް އިންސާފު ހޯދައިދިނުން ކަމަށާއި ނަމަވެސް ބަންޑާރަ ނައިބު ރައްޔިތުންގެ ހައްގު އެހެން ބަޔަކަށް ޓަކައި ގުރުބާން ކޮށްފައިވާ ކަމަށެވެ.
އެކަމާ ގުޅިގެން އެމްޑީޕީން ބުނެފައިވަނީ އެމްޑީޕީ މެމްބަރުންގެ ގޮތުގައި ތިބެ އެހެން ޕާޓީއަކާ އެކު މަސައްކަތް ކުރުމަކީ ޕާޓީގެ މެމްބަރުކަން ގެއްލޭ ކަމެއް ކަމަށެވެ.