ކަނޑުން ބައެއް ގެއްލިގެން ގޮސްފައިވާ ކަމަށާއި އެކަމުގައި އިހުމާލުވީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ކަމަށް އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މެދު ހެންވޭރު ދާއިރާގެ މެމްބަރު އަލީ އާޒިމް އެމްޑީޕީން ވަކި ކުރި މައްސަލައިގައި ރައީސް ނަޝީދު ގެންދަވަނީ ރައީސް ސާލިހަށް ވަރަށް ބޮޑަށް ފާޑުވިދާޅުވަމުންނެވެ.
ރައީސް ނަޝީދު ވިދާޅުވެފައިވަނީ މޮރިޝަސް އާއި ދިވެހި ރާއްޖެ އާއި ދެމެދު އޮތް ކަނޑުގެ ފުށުއަރާ ސަރަހައްދުގެ މައްސަލަ ހައްލުކުރުމަށް އެޑް ހޮކް އާބިޓްރޭޝަން އުސޫލުން ކުރިއަށް ގެންދިއުމަށް މޮރިޝަސް އިން 2019 ވަނަ އަހަރުގެ ޖޫންމަހު ހުށަހަޅާފައިވާ ކަމަށެވެ. ނަމަވެސް ރައީސް ސާލިހްގެ ނިންމެވުމުގެ މަތިން އެ މައްސަލަ އިޓްލޮސް އަށް ހުށަހެޅުމުން ރާއްޖޭގެ ބައެއް ވަނީ ގެއްލިފައެވެ.
— Mohamed Nasheed (@MohamedNasheed) May 16, 2023
ޗާގޮސްގެ މައްސަލަ ނިންމުމުގައި ރައްޔިތުންގެ މަޖިލީހުގެ ނިންމުމެއް ހޯދާފައި ނުވާ ކަމަށާ އެކަމުގައި ރައީސުލްޖުމްހޫރިއްޔާގެ އިހުމާލު އޮތް ކަމަށް ރައީސް ނަޝީދު ވިދާޅުވިއެވެ. އެހެންކަމުން ޕާޓީން ވަކިކުރަންވީ މެދު ހެންވޭރު ދާއިރާގެ މެމްބަރު ނޫން ކަަމަށްވެސް ރައީސް ނަޝީދު ވިދާޅުވިއެވެ.
އަލީ އާޒިމް އެމްޑީޕީން ވަކިކުރިކަން އާއްމުކޮށް އިއުލާންކޮށް ފިޔަވަޅު އަޅާ ކޮމިޓީން ވަނީ ރިޕޯޓް އާއްމުކޮށްފައެވެ. އެ ރިޕޯޓްގައިވާ ގޮތުން މައްސަލަ ލިބިފައި ވަނީ ޕާޓީގެ އަސާސީ ގަވައިދާއި ހިލާފަށް އާޒިމް ހަރަކާތްތެރިވާކަމާއި، އެކަންކަމަކީ ފިޔަވަޅު އަޅަން ޖެހޭ ސަބަބުތަކެއްކަން ފާހަގަކޮށް ފިޔަވަޅު އަޅައިދޭން އެދި ޕާލިމަންޓް ގުރޫޕުގެ ފަރާތުންނެވެ.
ޕީޖީން ހުށަހެޅި މައްސަލައިގައި ފާހަގަކޮށްފައިވާ ފުރަތަމަ ނުކުތާއަކީ އާޒިމް ރިފްއަތުގެ އިތުބާރު ނެތްކަމުގެ މައްސަލައިގައި ސޮއިކޮށްފައި ވުމެވެ. ދެވަނަ ނުކުތާއެއްގެ ގޮތުގައި ހުށަހަޅާފައި ވަނީ، ސިޔާސީ ގޮތުން އިދިކޮޅު ޕާޓީތަކުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ފާޑުކިއުންތައް އަމާޒުކޮށް ބޭއްވި ނޫސްވެރިންގެ ބައްދަލުވުމެއްގައި އާޒިމް ދެ ފަހަރެއްގެ މަތީން ބައިވެރިވެފައި ވުމެވެ.
އެއީ ޗާގޮސްގެ މައްސަލައިގައި މަޖިލީހުގެ އިދަރާގައި ބޭއްވި ޕްރެސް އާއި، ހޮޓެލް ޖެންގައި ދާދި ފަހުން ބޭސްވި ނޫސްވެރިންގެ ބައްދަލުވުމެވެ.
ކޮމިޓީގެ ރިޕޯޓުގައި ވަނީ ބަންޑާރަ ނައިބަކީ ސަރުކާރުގެ ސިޔާސަތުތަކުގެ ތެރެއިން، ތަންފިޒު ކުރުމަށް ބޭނުންވާ ކަންކަމުގެ ބިލުތައް ޑްރާފްޓު ކުރާ އިސްވެރިޔާ ކަމަށެވެ. އެހެންކަމުން ސަރުކާރުގެ ސިޔާސަތުތައް ތަންފީޒު ކުރުމަށް މަސައްކަތް ކުރައްވާ ބޭފުޅެއްގެ އިތުބާރު ނެތްކަމަށް ޕާޓީން ސޮއި ކުރުމަކީ ޕާޓީގެ އަސާސީ ގަވައިދާއި މުޅިން ހިލާފުކަމެއްގެ ގޮތުގައި މެމްބަރުން ވަނީ އިއްތިފާގުވެފަ އެވެ.
މައްސަލަ އެންމެ ބޮޑަށް ބިނާވެގެން ދިޔަ، ދެ ނޫސްވެރިންގެ ބައްދަލުވުމުގައި ވެސް އާޒިމް ޕާޓީގެ ސިޔާސަތުތަކަށް ނުރުހުންފާޅުކޮށް ވާހަކަ ދެއްކެވިކަމާއި، ރައީސުލްޖުމްހޫރިއްޔާއާއި މެދު ނަފްރަތު އުފެދޭ ގޮތަށް ވާހަކަ ދެއްކެވިކަމަށް ރިޕޯޓުގައި ވެއެވެ. ހާއްސަކޮށް އިދިކޮޅުން އިންތިޒާމު ކުރާ މިފަދަ ޕްރެސްއެއްގައި ބައިވެރިވުން އެއީ ޕާޓީގެ އަސާސީ ގަވައިދާއި ހިލާފުވުންކަމަށް ފިޔަވަޅު އަޅާ ކޮމިޓީގެ މެމްބަރުން އިއްތިފާގުވާކަން ފާހަގަކޮށް ބުނެފައި ވަނީ މިފަދަ ދަނޑިވަޅެއްގައި ސަރުކާރާއި ދެކޮޅު ހަރަކާތެއްގައި ބައިވެރިވުން އެއީ ޕާޓީގެ މަސްލަހަތަށް ލިބޭ ވަރަށް ބޮޑު ގެއްލުމެއް ކަމަށެވެ. އަދި މިއީ ޕާޓީން ވަކި ކުރުމަށް އެކަށީގެންވާ ސަބަބެއްކަމަށް ވެސް ބުނެފައި ވެއެވެ.
ކޮމިޓީ ރިޕޯޓުގައި ބުނެފައި ވަނީ، އާޒިމްގެ އަމަލުތަކަށް ބަލައި ޕާޓީން ވަކި ކުރެވިދާނެކަން އަސާސީ ގަވައިދުގެ 19 އާއި، 95 ވަނަ މާއްދާއިން އެނގެން އެބައޮތް ކަމަށެވެ.
ޕާޓީގެ އިސް މެމްބަރުންނާއި، ޕާލިމަންޓު މެމްބަރުންނަކީ ސީނިއާ މެމްބަރުންނަށްވާއިރު އެބޭފުޅުންގެ ފަރާތުން ނަމޫނާ ފެންނަން ޖެހުނު ނަމަވެސް އާޒިމްގެ އަމަލުތަކާއި ވާހަކައިގެ ސަބަބުން ލިބޭ ގެއްލުންތައް ސީރިއަސް ސިފައެއްގައި ބަލަން ޖެހޭކަމަށް ކޮމިޓީގެ ރިޕޯޓުގައި ވެއެވެ. އަދި އެ ސަބަބުތަކަށްޓަކައި އިސް މަގާމުތައް ފުރުއްވާ ބޭފުޅުން އަސާސީ ގަވައިދާއި ހިލާފަށް ކުރައްވާ ކަންކަމަކީ އެއީ ސީރިއަސް މައްސަލައެއްގެ ގޮތުގައި ބަލަން ޖެހޭކަން ކޮމިޓީގެ ރިޕޯޓުގައި ވެއެވެ.