ވަޒީރުންގެ މަސައްކަތްތައް ކަނޑައަޅަނީ އަމިއްލައަކަށް ނޫން، ޒިންމާ ހަވާލު ކުރަނީ މަޖިލީހުން: ރައީސް ނަޝީދު

ވަޒީރުންނާއި ހަވާލުކުރެވޭ މަސްއޫލިއްޔަތު ކަނޑައަޅުއްވާނީ ވަޒީރުން އަމިއްލަފުޅަށް ނޫންކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު ފިޝަރީޒް މިނިސްޓަރު ޑރ ހުސައިން ރަޝީދާއި ކުރެއްވި ސުވާލަކަށް މިނިސްޓަރު ވަނީ ޖަވާބު ދެއްވާފައެވެ. އިބްރާހިމް ރަޝީދު ސުވާލު ކުރެއްވީ އެކްސްޕޯޓު ކުރެވޭ ކަންނެލި މަސް ރިޖެކްޓުވާ މިންވަރާއި އެކަމާއި ގުޅުން ހުރި މާލީ މުއާމަލާތްތަކާއި ގުޅޭ މައުލޫމާތާއިމެދުއެވެ. އޭނާ ގެ ސުވާލަށް ޖަވާބު ދެއްވައި މިނިސްޓަރު ވިދާޅުވީ، އެ މައުލޫމާތަކީ މިނިސްޓްރީއިން އެއްކޮށް ބަލަހައްޓާ މައުލޫމާތު ނޫންކަމަށެވެ.

މިނިސްޓަރު ވިދާޅުވީ، އެ މައުލޫމާތަކީ މިފްކޯއިން ބަލަހައްޓާނެކަމަށް ބެލެވޭ އެ ކުންފުނީގެ ވިޔަފާރި އާއި ގުޅޭ މައުލޫމާތުކަމަށެވެ. މިނިސްޓަރުވަނީ އެ ކުންފުންޏަކީ މިނިސްޓްރީގެ ބެލުމުގެ ދަށުން ހިންގަމުންދާ ކުންފުންޏެއް ނޫންކަމަށްވެސް އިޝާރާތްކުރައްވާފައެވެ.

މިނިސްޓަރު ދެއްވި ޖަވާބު އިއްވުމާއިއެކު، ރައީސް ނަޝީދުވަނީ އެ ޖަވާބާއިމެދު އެ މަނިކުފާނު ހިތްހަމަޖެހިވަޑައިނުގަންނަވާކަން ހިއްސާކުރައްވާފައެވެ. ރައީސް ނަޝީދު ވިދާޅުވީ، ކުރެއްވި ސުވާލު އަދި މިފްކޯގެ ހިންގުމަކީ އެ ބޭފުޅާއާއި “ބެހޭ ކަމެއް ނޫންކަމަށް” ވަޒީރު ވިދާޅުވެފައިވާކަމަށެވެ. ރައީސް ނަޝީދު ވިދާޅުވީ، މަޖިލީހުން މިނިސްޓަރާއި ހަވާލު ކުރި މަސްއޫލިއްޔަތަކީ ކޮބައިކަން ދެނެގަތުމުގެ މަސައްކަތްތައް އެމަނިކުފާނު ކުރައްވަމުންދާކަމަށެވެ.

“އެ ބޭފުޅާއާއި ބެހޭ ކަންތަކާއި ނުބެހޭ ކަންތައް ކަނޑައަޅުއްވާނީ އެ ބޭފުޅާއެއް ނޫން، ވަޒީރު އަމިއްލަފުޅަށް ކުރައްވާ ކަމެއް ނޫން އެއީ” ރައީސް ނަޝީދު

ރައީސް ނަޝީދު ވިދާޅުވީ، ފިޝަރީޒް މިނިސްޓަރުގެ މަސްއޫލިއްޔަތަކީ މިނިސްޓަރަށް އަމިއްލައަށް ކަނޑައެޅުއްވޭނެކަމެއް ނޫންކަމަށެވެ. ރައީސް ނަޝީދު ވިދާޅުވީ، އަދާކުރައްވަންވީ ޒިންމާތައް ނިންމެވުމަކީ މިނިސްޓަރުން އަމިއްލައަށް ކުރައްވާ މަސައްކަތެއް ނޫންކަމަށެވެ. އެމަނިކުފާނު ވިދާޅުވީ، ކޮންމެ ވުޒާރާއަކާއިވެސް އެ ވުޒާރާއެއްގެ މަސައްކަތްތަކެއް ހަވާލު ކުރެވިފައިވާނެކަމަށެވެ. އެމަނިކުފާނު ވިދާޅުވީ، އެއީ މަޖިލީހުން ކަނޑައަޅާ ކަމެއްކަމަށެވެ.

ރައީސް ނަޝީދު ވިދާޅުވީ، އެހެންކަމަށްވުމުން، މިފްކޯގެ ތަފާސް ހިސާބުތައް ބެލެހެއްޓުމަކީ މިނިސްޓަރާއި ހަވާލު ކުރެވިފައިވާ މަސައްކަތެއްކަމަށްވާނަމަ ވަޒީރު ހުންނެވީ ނުބައި މަގެއްގައިކަމަށެވެ.