ނަމުން ބޮޑު ކަމުން ކުޑަ މުޒާހަރާއަކަށް ސަރުކާރު ގުޑުވާނުލެވޭނެކަމަށް ފާހަގަކުރައްވާ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް އިދިކޮޅު ފަރާތްތަކަށް ފާޑުވިދާޅުވެއްޖެއެވެ.
އިދިކޮޅުން ބޮޑު ބައްދަލުވުމެއް އިންތިޒާމުކުރަމުންދާއިރު، ބައެއް ފަރާތްތަކުންދަނީ އިދިކޮޅުގެ ހަރަކާތާއި މީގެ އަހަރުތަކެއް ކުރިން އެމްޑީޕީއިން ކުރިއަށް ގެންދިޔަ މޭޑޭ މުޒާހަރާ އާއި އެއް ފަދަ ކޮށްފައެވެ. ޖުމްހޫރީ ޕާޓީގެ ލީޑަރު ގާސިމް އިބްރާހިމް ވަނީ އެ ޕާޓީގެ މެމްބަރުންނަށް އިދިކޮޅު ކޮންގްރެސް ކޯލިޝަނުން ކުރިއަށް ގެންދިއުމަށް ހަމަޖެހިފައިވާ ހަރަކާތުގައި ބައިވެރިނުވުމަށް އިލްތިމާޒްކުރައްވާފައެވެ.
އިދިކޮޅުން ސަރުކާރާއި ދެކޮޅަށް ހިންގުމަށް ހަމަޖެހިފައިވާ ހަރަކާތަށް އިޝާރާތްކުރައްވާ ޝަރީފްވަނީ އެންމެހާ އިދިކޮޅު ފަރާތްތަކަށް ފާޑުވިދާޅުވެފައެވެ. އޭނާ ވިދާޅުވީ، މޭޑޭގައި އެމްޑީޕީއިން ބޭއްވި ވަރުގެ މުޒާހަރާއެއް ކިތަންމެ މަސައްކަތްތަކެއް ކުރިނަމަވެސް، އަދި ހުރިހާ އިދިކޮޅު ޕާޓީތަކެއް އެކުގައި ހިންގި ނަމަވެސް، ހިންގުމުގެ ގާބިލުކަން ނެތްކަމަށެވެ. އަދި އިދިކޮޅު ކޯލިޝަނަށް އެވަރުގެ ތާއީދެއްވެސް ނެތްކަމަށް އޭނާ ފާހަގަކުރެއްވިއެވެ.
ޝަރީފް ވިދާޅުވީ، ސަރުކާރާއި އިދިކޮޅު ހުރިހާ ޕާޓީތަކެއް އަދި ރައީސް ނަޝީދުގެ ފިކުރެއްގެ ދިރުން ގުޅިގެން ކުރިއަށް ދިޔަނަމަވެސް، ނަމުން ބޮޑު އަދި ކަމުން ކުޑަ މުޒާހަރާއެއް މެދުވެރިކޮށް ސަރުކާރު ގުޑުވާނުލެވޭނެކަމަށެވެ. އޭނާ ވިދާޅުވީ، ރާއްޖޭގެ ތަރައްގީއަށް ރައީސް ސާލިހުވަނީ ގިނަ މަސައްކަތްތަކެއް ކޮށްދެއްވާފައިކަމަށެވެ. އަދި ރައްޔިތުން އެ މަސައްކަތްތައް ބަލައިގަންނަކަމަށާއި، ރައްޔިތުން ދިވެހިރާއްޖެ ހަލަބޮލި ކުރުމަށް ބޭނުންނުވާކަމަށް އޭނާ ފާހަގަކުރެއްވިއެވެ.