އަލީ ވަހީދު ރާއްޖެ ވަޑައިގެންފި

ކުރީގެ ޓޫރިޒަމް މިނިސްޓަރު އަލީ ވަހީދު ރާއްޖެ ވަޑައިގެންފިއެވެ.

އަލީ ވަހީދު ރާއްޖެއިން ފުރާ ވަޑައިގަތީ 10 ފެބްރުއަރީ 2021 އެވެ. އޭނާ ރާއްޖެ ދޫކޮށް ފިލީ ޖިންސީ ގޯނާގެ ދައުވާ އުފުލިފައި، ޕާސް ޕޯޓު ހިފެހެއްޓުމަށް ކޯޓުން ކުރި އަމުރު ބާޠިލް ކުރުމާއިއެކުއެވެ.

ޢަލީ ވަޙީދުގެ މައްޗަށް ކުރާ ޖިންސީ ފުރައްސާރައިގެ މައްސަލާގައި އޭނާގެ ޕާސްޓްޕޯޓް ހިފަހައްޓާފައި އޮތުމަށްފަހު، އަމުރު މުރާޖައާ ކުރަން ބޭއްވި ޝަރީއަތުގެ އަޑު އެހުމުގައި އަލީ ވަހީދުގެ ފަރާތުން ވަންނީ އޭނާގެ ސިއްހީ ހާލަތު ބަޔާން ކޮށްދިނުމަށް ޑޮކަޓަރަކު ހާޒިރުކޮށްފައެވެ. ޑޮކްޓަރު ވަނީ ޢަލީ ވަޙިދުގެ މައިބަދައިގެ ޑިސްކުތަކެއް ގުޑާފައިވާކަަމަށް ވިދާޅުވެފައެވެ. ޝަރީޢަތުން ވަނީ އެކަމަށް ރިޔާޢަތްކުރައްވާ އޭނާގެ ޕާސްޓްޕޯޓް ހިފެހެއްޓުމަށް ނެރުނު ޢަމުރު ބާޠިލްކޮށްފައެވެ.

އަލީ ވަހީދުގެ މަގާމުން ވަކި ކުރެވުނީ ޓޫރިޒަމް މިނިސްޓްރީގެ މުވައްޒަފުންތަކެއް ރައީސް އިބްރާހިމް މުހައްމަދު ސޯލިހާއި ޖެންޑާ މިނިސްޓަރު އާއިޝަތު މުހައްމަދު ދީދީއާ ބައްދަލުކޮށް ޓޫރިޒަމް މިނިސްޓަރު އަލީ ވަހީދުގެ ފަރާތުން ޖިންސީ ގޯނާތަކެއް ލިބުނު މައްސަލައެއް ހުށައެޅުމުން އެކަމާއި ގުޅިގެންނެވެ. އެގޮތުން ހަތް މައްސަލައެއްގައި ދައުވާކުރުމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ކްރިމިނަލް ކޯޓަށް ވަނީ މިދިޔަ އަހަރުގެ ނޮވެމްބަރު މަހުގެ ތެރޭގައި ހުށައަޅާފައެވެ.

ޢަލީ ވަހީދު ރާއްޖެ ދޫކުރައްވާ ވަޑައިގެންނެވި އިރު އޭނާގެ މައްޗަށް ކޮށްފައިވާ 7 ދަޢުވާ މިހާރު ވަނީ އަނބުރާ ގެންގޮސްފައެވެ. މިކަމުގެ ސަބަބުން ގިނަ ބަޔަކު އެކަމަށް ފާޑުވެސް ކިޔެވެ.

މީގެ އިތުރުން އަލީ ވަހީދުގެ މައްޗަށް ދައުލަތުން ވަނީ ކޯޓަށް ހާޒިރުނުވެގެން، ސްޕީރީމް ކޯޓުގެ ހުރުމަތް ކަނޑާލިކަމުގެ މައްސަލައިގައި ދެމަހާއި 12 ދުވަހަށް އޭނާ ބަންދުކުރަންވެސް ހުކުމްކޮށްފައެވެ. ނަމަވެސް އަލީ ވަހީދު ޖަލަށް ލާން ކުރި ހުކުމް ސުޕްރީމް ކޯޓުން މިހާރު ވަނީ ބާތިލް ކޮށްފައިވާކަން ވަނީ އިނގިފައެވެ.