ރައީސް ޢަބްދުﷲ ޔާމީން ޢަބްދުލްޤައްޔޫމްގެ މަންމާފުޅު އަވަހާރަވުމުގެ ހިތާމައިގައި ބައިވެރިވެ، އިދިކޮޅު ކޮންގްރެސް ކޯލިޝަނުން ތަޢުޒިޔާ ދަންނަވައިފިއެވެ.
އިދިކޮޅުން ރައީސް ޔާމީންގެ މަންމާފުޅު އަވަހާރަވުމާއި ގުޅިގެން ނެރުން ބަޔާނުގައި ބުނެފައިވަނީ ރައީސް ޔާމީންގެ މަންމާފުޅު ފާޠިމަތު ޙަސަން އަވަހާރަވި ޚަބަރު މިކޯލިޝަންގެ އެންމެހާ މެންބަރުން އެހީ ވަރަށްވެސް ފުން ހިތަމާއާއި އަސަރާއެކުކަމަށެވެ.
ރައީސް ޔާމީންގެ މަންމާފުޅު އަވަހާރަވިއިރު، އެމަނިކުފާނު މިސަރުކާރުގެ އަނިޔާވެރިކަމުގައި ޙައްޤު ނޫން ޙުކުމެއްގައި ޖަލުގައި ހުންނަވަން ޖެހިވަޑައިގަތުމާއި އެމަނިކުފާނަށް އެމަނިކުފާނުގެ މަންމާފުޅުގެ ޖަނާޒާގައި ބައިވެރިވެވަޑައިގަތުމުގެ ފުރުޞަތު ލިބިވަޑައިނުގަތުމަކީ ވަރަށް ބޮޑަށް ހިތާމައެއްކަމަށް އިިދިކޮޅުން ވަނީ ބުނެފައެވެ.
ރައީސް ޔާމީންގެ މަންމާފުޅު އަވަހާރަވުމުގެ ހިތާމައިގައި މިކޯލިޝަންގެ އެންމެހައި މެންބަރުން ބައިވެރިވާކަމަށް ބުނެފައިވާއިރު، ރައީސް ޔާމީނާއި އެމަނިކުފާނުގެ ލޮބުވެތި ޢާއިލާއަށް، އެ ކޯލިޝަންގެ ލީޑާރޝިޕާއި، ސެނެޓަރުންނާއި، ޕާލަމަންޓްރީ ގްރޫޕްގެ މެންބަރުންނާއި، ދާއިރާ ރައީސުންނާއި، ސްޓިއަރިންގ ކޮމިޓީތަކާއި އަދި މިކޯލިޝަނަށް ނިސްބަތްވާ ދެ ޕާޓީގެ އެންމެހާ މެންބަރުންގެ ނަމުގައި ތަޢުޒިޔާ ދަންނަވާކަމަށް ބުނެފައިވެއެވެ. އަދި މާތްﷲ އެމަރްޙޫމާގެ ޢާއިލާއަށާއި ރައީސް ޔާމީން އަށް ކެތްތެރިކަމާއި ސާބިތުކަން މިންވަރު ކުރެއްވުން އެދި ދުޢާ ކުރާކަމަށް ޕީޕިއެމްގެ ބަޔާނުގައި ފާހަގަކޮށްފައިވެއެވެ.