ޑެޕިއުޓީ މިނިސްޓަރ ހަމަދު ޖޭޕީ ދޫކޮށް، ސަރުކާރު ފަޅިއަށް

ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރ ހަމަދު އަބްދުލްގަނީ އެމްޑީޕީއާއި ގުޅިވަޑައިގެންފިއެވެ.

ހަމަދު މީގެ ކުރިން ހުންނެވީ (ޖޭޕީ) އާއިއެކުއެވެ. އެމްޑީޕީއާއި ގުޅިވަޑައިގެން ކުރެއްވި ޓުވީޓެއްގައި ހަމަދު ވިދާޅުވީ ރައީސުލްޖުމްހުރިއްޔާ އިބްރާހީމް މުހައްމަދު ސާލިހު ދެވަނަ ދައުރަކަށް ހޮވުމަކީ ގައުމަށް ފައިދާ ހުރި ގޮތްކަމަށެވެ. އަދި ރައީސް ސާލިހުގެ ސިޔާސަތުތަކަށް ހަމަދު ވަނީ ތައުރީފު ކުރައްވާފައެވެ.

I have decided to join @MDPSecretariat. 💛

I believe that re-electing HEP @ibusolih will benefit the nation. His principles and ethics align with mine.

The #IbuAslam2023 combination is a winning one, and one that will lead to an #UfaaveriAmaanRaaje. pic.twitter.com/QnyRT1xy7v

— Hamadh Abdul Ghanee (@GhaneeHamadh) August 15, 2023

ރައީސް ސާލިހާއި، އެމަނިކުފާނުގެ ރަނިން މޭޓު ހިތަދޫ އުތުރު ދާއިރާގެ މެންބަރަކީ އިންތިހާބު ކާމިޔާބު ކުރެވޭނެ ދެބޭފުޅުންކަމަށް ހަމަދު ވަނީ ވިދާޅުވެފައެވެ.

ޖޭޕީއިން އެމްޑިޕީއާއިއެކު ކޯލިޝަން ނަހަދަން ނިންމި ނިންމުމަށްފަހު، ޖޭޕީގެ އިސް ސަފުގައި ތިއްބެވި ބައެއް ބޭފުޅުން އަދި ސަރުކާރުގައި ޖޭޕީގެ ސްލޮޓުތަކުގައި ތިއްބެވި މެންބަރުންވެސް ވަނީ އެ ޕާޓީއާއި ވަކިވެވަޑައިގެންފައެވެ.

އެގޮތުން ޖޭޕީގެ ލީޑަރު ގާސިމް އިބްރާހީމްގެ އެޑްވައިޒަރ ކަން ހަވާލުކޮށްފައިވަނިކޮށް މުހައްމަދު އަހްމަދު (ހަނަފީ) ވެސް ވަނީ އެ ޕާޓީއިން ވަކިވެފައެވެ. އޭނާ ޕާޓީއިން ވަކިވީ އެޑްވައިޒަރކަމަށް އައްޔަނުކުރިތާ މާ ގިނަ އިރުތަކެއް ނުވެއެވެ. ހަނަފީގެ ފަރާތުން ފޮނުވި ސިޓީގައި ވަނީ މިއަދު ޛޭޕީގެ ވިސްނުން ހުރީ ގައުމަށް އެންމެ ފައިދާ ހުރި ގޮތަށް ނޫންކަމަށެވެ. އަދި ދާދިފަހުން ޓޫރިޒަމް މިނިސްޓަރ ޑރ.އަބްދުﷲ މައުސޫމްވެސް ވަނީ ޖޭޕީއާއި ވަކިވެވަޑައިގެންފައެވެ.