ރައީސް އިބްރާޙިމް މުހައްމަދު ސާލިހުގެ ސަރުކާރުގެ ”ސްލޯ“ ސިޔާސަތުތައް މުޅި ދައުލަތުގެ މައްޗަށް ވެރިވެގަނެފައިވާކަމަށް މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.
ސޯޝަލްމީޑިއާގައި ކުރެއްވި ޕޯސްޓެއްގައި ސައީދުވަނީ އިސްލާމީ މަރުކަޒުގެ ފޮޓޯއެއް ހިއްސާކުރައްވާފައެވެ. ސައީދު ޝާއިއުކުރެއްވި ފޮޓޯއިން ފެނިގެންދަނީ މަރުކަޒުގެ ފާރުގައި ހަރުކޮށްފައިވާ ގަޑި އަދި ސްޕީކަރުގެ އިތުރުން ފަންކާ ފަދަ އާލާތްތަކާއި ކަބަޑެވެ. އެ މަންޒަރަށް އިޝާރާތްކުރައްވާ ސައީދު ވިދާޅުވީ، އިސްލާމީ މަރުކަޒުގައި ހަރުކުރެވިފައިވާ ފޯޓޯއިން ފެނިގެންދާ ގަޑި 5:09 ގައި ހުއްޓިފައިވާތާ ދެމަސްދުވަސްވެފައިވާކަމަށޭވެ. އޭނާ ވިދާޅުވީ، ގަޑިއާއި އެއްފަދައިން ފޮޓޯއިން ފެނިގެންދާ ސްޕީކަރުވެސް ނެއްޓިގެންގޮސް އެލިފައި އޮންނަތާ ދެމަސްދުވަސްވެފައިވާކަމަށެވެ.
ސައީދު ވިދާޅުވީ، ރައީސް ސާލިހަށް ދައުލަތުގެ އެންމެހާ ކަންކަން އެނގިވަޑައިނުގަންނަވާނެކަމަށް ބުނާ ވާހަކަ ގަބޫލުކުރެއްވިދާނެކަމަށެވެ. އެހެންނަމަވެސް ސަރުކާރުން ގެންގުޅެމުންދަނީ ”ސްލޯ“ ”ކަންފަސޭހަ“ ”ގޮތެއްފޮތެއްނެތް“ ސިޔާސަތުތަކެއްކަމަށާއި އެ ސިޔާސަތުތައް މިއަދު މުޅި ދައުލަތަށާް ވެރިވެގަނެފައިވާކަމަށް ސައީދު ފާހަގަކުރެއްވިއެވެ.
އިސްލާމީމަރުކަޒުގެ މިގަޑި 5:09ގައި ހުއްޓި އަދި ސްޕީކަރުމިގޮތަށް އޮއްނަތާ މިވީ 2މަސް.
ތެދުފުޅެއް، ރ.ޖ އަކަށް ހުރިހާކަމެއްނޭނގިދާނެ، ނަމަވެސް މިސަރުކާރުގެ “ސްލޯ” “ކަންފަސޭހަ” “ގޮތެއްފޮތެއްނެތް” ސިޔާސަތު މިއަދުވަނީ މުޅިދައުލަތަށް ވެރިވެފަ!
މިކަންމިފެންނަނީ ބަލާލިކޮއްމެދިމާލަކުން.… pic.twitter.com/igfk0WDDzc— Mohamed Saeed (@em_saeed) August 18, 2023
ސައީދު ވިދާޅުވީ، ކޮންމެ ދިމާލަކަށް ބެލި ނަމަވެސް ފެނިގެންދަނީ އޭނާ ސޯޝަލްމީޑިއާގައި ޝާއިއުކުރެއްވި ފަދަ މަންޒަރުތަކެއްކަމަށެވެ. އެގޮތުން 500 މިލިއަން ޑޮލަރުގެ ލޯނެއް ނަގައިގެން ހިންގަމުންދާ ބުރިޖު މަޝްރޫއުގެ ތަނބުތަކުގެ މަސައްކަތްތަކުން ފެށިގެން ހުއްޓިގެންދާ ގަޑިއެއްގެ ބެޓަރި ބަދަލުކުރުމުގެ މަސައްކަތްތައްވެސް ސަރުކާރަށް ނުބެލެހެއްޓޭކަމަށް ސައީދު ސިފަކުރެއްވިއެވެ. އޭނާވަނީ ރައީސް ސާލިހު ދެވަނަ ދައުރެއް ކާމިޔާބުކުރެއްވުމަށް މަސައްކަތްކުރައްވަމުންދަނީ އިސްވެ ދެންނެވި ގޮތުގެ މަތިންކަންކަން ތަކުރާރުކުރައްވަންތޯ ސުވާލު އުފައްދަވާފައެވެ.
