ސިޔާސަތުތައް ހިއްސާނުކޮށް ކޮންމެ މީހަކަށްވެސް ވައުދުތަކެއް ވެވިދާނެކަމަށް މަޖިލީހުގެ މަރަދޫ ދާއިރާގެ މެމްބަރު އިބްރާޙިމް ޝަރީފް ވިދާޅުވެއްޖެއެވެ.
ރިޔާސީ އިންތިހާބުގައި ވާދަކުރައްވާ ކެންޑިޑޭޓުން ގިނަ އަދަދެއްގެ ވައުދުތައް ވަމުންދާއިރު، އެކަމަށް އަލިއަޅުއްވައި ޝަރީފްވަނީ ކަންބޮޑުވުން ފާޅުކުރައްވާފައެވެ. ސިޔާސަތުތަކާއި ކަންކުރާނެ ގޮތުގެ މައުލޫމާތު ހިއްސާނުކޮށް ކޮންމެ މީހަކަށްވެސް ހަނދު ބާލުވައިދިނުމަށް ވައުދުތަކެއް ވެވިދާނެކަމަށެވެ. އޭނާ ވިދާޅުވީ، މިހާތަނަށް ހަމަޖެހޭ ތަންފީޒުކުރެވޭނެ މެނިފެސްޓޯއެއް ހިއްސާކޮށްފައިވާ ހަމަ އެކަނި ކެންޑިޑޭޓަކީ ރައީސް އިބްރާހިމް މުހައްމަދު ސާލިހުކަމަށެވެ.
އޭނާ ވިދާޅުވީ، ދުނިޔޭގެ އިގްތިސާދަށް ކުރިމަތިވެފައިވާ ގޮންޖެހުންތަކުގެ ތެރެއިން ރާއްޖެއަށް އިގްތިސާދީ ކުރިއެރުން ގެނެސްދެވޭނެ ހަމަ އެކަނި މެނިފެސްޓޯއެއް ހުށައަޅާފައިވަނީ ރައީސް ސާލިހުކަމަށެވެ.
Anyone can promise to deliver the moon without offering any policies or strategy to implement it. As far as we can see only @ibusolih has offered a viable manifesto that can lead to economic growth n get🇲🇻thru economic uncertainties caused by prevailing global economic slowdown
— Ibrahim Shareef (@AdduShareef) August 28, 2023
އޭނާ ވިދާޅުވީ، ރައީސް ސާލިހުގެ ސަރުކާރުންވަނީ ގާބިލިއްޔަތު ހުރި މިންވަރު ސާފުކޮށްދީފައިކަމަށެވެ. އެގޮތުން އިގްތިސާދީ ލުއިތައް ގެނެސްދިނުމުގެ ގޮތުން ސިޔާސަތުތައް އެކުލަވާލާ ތަންފީޒު ކުރުމާއި، ކޮވިޑްގެ ދަތި ހާލަތުން އަރައިގަތުމަށް ފިޔަވަޅުތަކެއް އެޅިކަން އޭނާ ފާހަގަކުރެއްވިއެވެ. ޝަރީފް ވިދާޅުވީ، ރާއްޖޭގެ ވެރިކަމާއި ހަވާލުވާ ކޮންމެ ސަރުކާރަކަށްވެސް ރއްޔިތުންގެ ދިރިއުޅުމުގެ ފެންވަރު އެއް ހަމައެއްގައި ހިފެހެއްޓުމަށް ރާއްޖޭގެ އިގްތިސާދު ފުޅާވަމުންދާ މިންގަނޑު 5 އިންސައްތައިގައި ދަމަހައްޓަން މަސައްކަތްކުރަންޖެހޭނެކަމަށެވެ.
އޭނާ ވިދާޅުވީ، އިގްތިސާދީ ދުވެލި ދެމެހެއްޓުމުގެ ގޮތުން، ގައުމުގައި އިންފްރާސްޓްރަކްޗާ ބިނާކުރުމަށް އިންވެސްޓުކުރަންޖެހޭނެކަމަށެވެ. އެެހެންކަމުން ވެރިކަމަށް ވާސިލުވާ ކޮންމެ ސަރުކާރަކަށްވެސް ގައުމުގެ އިގްތިސާދީ ކަންކަން ކުރިއަށް ގެންދަން ޕްލޭނެ އެކުލަވާލަންޖެހޭނެކަމަށާއި އެހެންނަމަވެސް އެފަދަ ޕްލޭނެއް ހިއްސާކޮށްފައިވަނީ ރައީސް ސާލިހު އެކަނިކަމަށާއި އެހެން ކެންޑިޑޭޓުންދަނީ ހަރަދުކުރުމުގެ ވާހަކަތައް ދައްކަވަމުންކަމަށް ޝަރީފް ފާހަގަކުރެއްވިއެވެ.