އިންޑިއާ އާއި ގުޅުވައި ބައެއް ކެންޑިޑޭޓުން ދައްކާ ވާހަކަތަކަކީ ރާއްޖޭގެ މަސްލަހަތަށް އެންމެ ރަނގަޅު ވާހަކަތަކެއް ނޫން: ޝަރީފް

ރިޔާސީ އިންތިހާބުގައި ވާދަކުރައްވާ ބައެއް ކެންޑިޑޭޓުން އިންޑިއާ އާއި ގުޅުވައި ދައްކަވަމުންދާ ވާހަކަތަކަކީ ރާއްޖޭގެ މަސްލަހަތަށް އެންމެ ރަނގަޅު ވާހަކަތަކެއް ނޫންކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.

ރައީސް އިބްރާހިމް މުހައްމަދު ސާލިހުގެ ސަރުކާރުގެ މައްޗަށް އިންޑިއާގެ ނުފޫޒު ގަދަކަމަށް ސިފަކޮށް ކެމްޕެއިން ހަރަކާތްތަކުގައި ވާހަކަތައް ދެކެވެމުންދާއިރު، ޝަރީފް ވަނީ އެ ގައުމާއި ރާއްޖެ ދެމެދު އޮންނަ ގުޅުމުގެ މުހިންމުކަމަށް ވިދާޅުވެފަ އެވެ. އެގޮތުން ރާއްޖެ އަދި އިންޑިއާ ދެމެދު އޮންނަ ގުޅުން އިތުރަށް ހަރުދަނާވެފައިވާކަމަށާއި އެކަމުގެ ސަބަބުން ރާއްޖޭގެ އިގްތިސާދީ ސިނާއަތަށް ބޮޑެތި ކުރިއެރުންތަކެއް ލިބިފައިވާކަމަށް ވިދާޅުވިއެވެ. އޭނާ ވިދާޅުވީ، ދެ ގައުމުގެ ދެމެދު އޮންނަ ގުޅުމަކީ އިންޑިއާ ކަނޑުގެ ސަރަހައްދުގެ އަމާންކަން އަދި ރައްކައުތެރިކަން ދެމެހެއްޓިފައި އޮތުމުގައިވެސް މުހިންމު ރޯލެއް އަދާކުރާ ކަމެއް ކަމަށެވެ.

improved relations btwn Maldives n India not only has greatly helped our country on d economic front but it is also critical for peace n security in d Indian Ocean.Populist rhetoric employed by some presidential candidates against India z alarming n not in d best interests of MDV

— Ibrahim Shareef (@AdduShareef) September 3, 2023

ޝަރީފް ވިދާޅުވީ، ބައެއް ކެންޑިޑޭޓުން އިންޑިއާ އާއި ގުޅުވައި ގައުމު ތެރޭގައި ބައިބައިވުން އުފެދޭ ވާހަކަތައް ދައްކަވަމުންދާކަމަށެވެ. އޭނާ ވިދާޅުވީ، އެއީ ކަންބޮޑުވާ ކަންކަން ކަމަށާއި، އެ ވާހަކަތަކަކީ ރާއްޖޭގެ މަސްލަހަތު ހިފެހެއްޓިގެންދާ ފަދަ ގޮތަކަށް ދެކެވެމުންދާ ވާހަކަތަކެއް ނޫންކަމަށެވެ. އޭނާ ވިދާޅުވީ، އިންޑިއާ ކަނޑުގެ ސަރަހައްދުގައި އަމާންކަން ގާއިމުވެފައި އޮތުމަކީ ސަރަހައްދީ އެންމެހާ ގައުމުތަކުގެ އިގްތިސާދީ ކުރިއެރުމަށްވެސް ކޮންމެހެންވެސް މުހިންމު ކަމެއްކަމަށެވެ. އަދި ބައިނައްލަގުވާމީ ދުނިޔެއާއި އޮންނަ ގުޅުމުގެ އިތުރުން ސަރަހައްދީ ގޮތުން އެންމެ ބާރުގަދަ ގައުމާއި ދެމެދު ގާތް ގުޅުމެއް ބޭއްވުމަކީ ރާއްޖޭގެ މިނިވަންކަން ކަށަވަރުވެފައި އޮތުމުގައިވެސް މުހިންމު ރޯލެއް އަދާކުރާ ކަމެއްކަމަށެވެ.

އޭނާ ވިދާޅުވީ، މުހިންމު ވިސްނުންތަކެއްގެ މައްޗަށް ބިނާކޮށް އިންޑިއާއިން މަސައްކަތްކުރަމުންދަނީ އަވައްޓެރި ގައުމުތަކާއި ގާތް ގުޅުމެއް ދެމެހެއްޓުމަށްކަމަށާއި، އެ ގައުމުގެ އެ ޝައުގުވެރިކަމަކީ ކަނޑު ދަތުރުފަތުރުކުރުމުގެ މަގުތައް ހިމާޔަތްކުރުމާއި ޗައިނާއިން ސަރަހައްދީ ބާރުވެރިކަން ހޯދުމަށް ކުރަމުންދާ މަސައްކަތްތަކުގެ ސަބަބުން އޮންނަ ޝައުގުވެރިކަމެއްކަމަށެވެ.