ޑިމޮކްރެޓްސްއަށް ކެމްޕެއިން ކޮށްދެއްވި އެންމެހާ ފަރާތްތަކަށް އަމްރުގެ ޝުކުރު!

ޑިމޮކްރެޓްސްއަށް ރިޔާސީ އިންތިހާބުގެ ކެމްޕެއިންގައި އެހީތެރިކަން ފޯރުކޮށްދެއްވި އެންމެހާ ފަރާތްތަކަށް ރިޔާސީ ކެންޑިޑޭޓުގެ ރަނިންގް މޭޓު ހުސައިން އަމްރު ޝުކުރު ދަންނަވައިފިއެވެ.

އަމްރު އަމިއްލަ ސޯޝަލްމީޑިއާއަށް ކުރެއްވި ޕޯސްޓެއްގައި އޭނާވަނީ ޑިމޮކްރެޓްސްގެ ރިޔާސީ ކެމްޕެއިންގެ ނަތީޖާއާއިމެދު ހިތްހަމަޖެހިވަޑައިގަންނަވާކަން ހިއްސާކުރައްވާފައެވެ. އެގޮތުން ޑިމޮކްރެޓްސްއިން ޕާޓީ އުފެއްދިތާ ދެމަސްދުވަހުގެ ތެރޭގައި ހިންގާފައިވަނީ ހަލުވި ކެމްޕެއިނެއްކަމަށާއި ހާސިލުކުރެވުނު ކޮންމެ ކާމިޔާބީއެއްގެ ފަހަތުގައިވެސް ކެމްޕެއިން ޓީމުތަކުގެ ބުރަ މަސައްކަތްތައް ވާކަމަށް އަމްރު ވިދާޅުވިއެވެ.

އަމްރު ވިދާޅުވީ، ކެމްޕެއިން ކޯޑިނޭޓަރުންނާއި މެމްބަރުން އަދި ދޮރުން ދޮރަށް ހިންގެވުމުގައި ޑިމޮކްރެޓްސްއާއިއެކު ވަރުބަލިކަމެއް ނެތި ހަރަކާތްތެރިވެވަޑައިގެންނެވި މީހުންނާއި ސޯޝަލްމީޑިއާއަށް ބޭނުންވާ ސާމާނު އުފެއްދުމުގައި ޝާމިލުވި އެންމެހާ މީހުންނަށްވެސް ޝުކުރު ދަންނަވާކަމަށެވެ.

އަޅުގަޑުމެނާ ބައިވެރިވެ ވަޑައިގަތް އަދި އެހީތެރިވެދެއްވި ހުރިހާ ފަރާތްތަކަށް އިޚްލާސްތެރި ކަމާއެކު ޝުކުރު ދަންނަވަން.
އިރާދަކުރެއްވިއްޔާ މީ އާ ފެށުމެއް.
އަޅުގަޑުމެން ދާނީ ކުރިޔަށް.
3/3#WeTheDemocrats

— Amr 🎈 (@HusenAmr) September 9, 2023

އަމްރު ވިދާޅުވީ، އިންތިހާބާއިއެކު އެ ޕާޓީއަށް އައު ފެށުމެއް އައިސްފައިވާކަމަށާއި ޑިމޮކްރެޓްސްއިން ދާނީ ކުރިއަށްކަމަށެވެ.

ޑިމޮކްރެޓްސްގެ ކެމްޕެއިންގައި ބައިވެރިވެވަޑައިގެންނެވި އެންމެހާ ފަރާތްތަކަށް އަމްރު ޝުކުރު އަދާކުރެއްވިއިރު، ރިޔާސީ އިންތިހާބުގެ ފުރަތަމަ ބުރުގެ ވަގުތީ ނަތީޖާ ދައްކާގޮތުން ޑިމޮކްރެޓްސްގެ ކެންޑިޑޭޓު އިލްޔާސް ލަބީބަށް ލިބިވަޑައިގެންނެވީ 15،000 އާއި ގާތް ކުރާ އަދަދެއްގެ ވޯޓެވެ.