ރިޔާސީ އިންތިހާބުގައި ރައީސް އިބްރާހިމް މުހައްމަދު ސާލިހަށް އޮތްކަމަށް ފެނިގެންދާ ތާއީދަށް ރިއާޔަތްކޮށް ހެއްދެވި ހިސާބު ގޯސްކަމަށް އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެއެވެ.
ރިޔާސީ އިންތިހާބުގެ ފުރަމަތަ ބުރުގައި ޕީއެންސީގެ ކެންޑިޑޭޓު ޑރ މުހައްމަދު މުއިއްޒު ރައީސް ސާލިހުގެ މައްޗަށް ކުރި ހޯއްދެވުމާއިއެކު، ގިނަ އަދަދެއްގެ މީހުންދަނީ ސޯޝަލްމީޑިއާ މެދުވެރިކޮށް ފައްޔާޒްއަށް ފާޑުކިޔަމުންނެވެ. އޭނާ އަށް ފާޑުކިޔަމުންދަނީ އިންތިހާބު ކާމިޔާބުކުރެއްވޭނެކަމަށް ވިދާޅުވެފައިވުމާއިއެކުއެވެ. އެމްޑީޕީގެ ކެމްޕެއިން ހަރަކާތެއްގައި ފައްޔާޒުވަނީ ކެމެޕެއިން ޑާޓާ ބަލަހައްޓަވަނީ އޭނާކަަމަށް ވިދާޅުވެފައެވެ.
ފައްޔާޒު އަމިއްލަ ސޯޝަލްމީޑިއާ އެކައުންޓު މެދުވެރިކޮށް ކުރެއްވި ޕޯސްޓެއްގައި ވިދާޅުވީ، އޭނާ އަށް ހެއްދެވުނު ހިސާބުތައް ގޯސްކަމަށް އެއްބަސްވެވަޑައިގަންނަވާކަމަށެވެ. އެހެންނަމަވެސް އިންތިހާބު ކާމިޔާބުކުރެއްވުމަށް ކުރަންޖެހޭ ކަންކަމާއި އަޅަންޖެހޭ ފިޔަވަޅުތައް ސާފުވެފައިވާކަމަށް އޭނާ ވިދާޅުވިއެވެ.
ޖެހުނު ހިސާބު ގޯސް. 🤔 ކުރަންޖެހޭ ކަންކަން ސާފުކުރެވިއްޖެ. އިރާދަކުރެއްވިއްޔާ ކެމްޕޭން ރުކުރުވާލާ އަޅުގަޑުމެން މި ނިކުންނަނީ ބުރަ މަސައްކަތާއެކު މި އިންތިހާބު ކާމިޔާބު ކުރަން, މިރާއްޖެ އަނިޔާވެރިކަމާ ދިމާލައް އަނބުރާ ދިޔަނުދިނުމަށް ކުރަންޖެހޭ ކަންކަން ކުރަން.#IbuAslam2023
— Fayyaz Ismail (@faya_i) September 10, 2023
އެހެންކަމުން ކެމްޕެއިން ރުކުރުވާލާ ދެން ނުކުންނާނީ ބުރަ މަސައްކަތްތަކެއް ކޮށްގެން އިންތިހާބު ކާމިޔާބުކުރުމަށްކަމަށް އޭނާ ވިދާޅުވިއެވެ. ފައްޔާޒް ވިދާޅުވީ، ނުކުންނާނީ ދިވެހިރާއްޖެ އަނިޔާވެރިކަމާއި ދިމާލަށް އަނބުރާ ދިޔަނުދިނުމަށް ކުރަންޖެހޭ ކަންކަން ކުރަންކަމަށެވެ.
