ރާއްޖޭގެ ވެރިކަމުގެ ނިޒާމް ބަދަލު ކުރުމަށް ފެންނަ ނުފެންނަ ވޯޓެއް ނެގުމުގެ ބާރަކީ ރައްޔިތުންގެ މަޖިލީހަށް ލިބިގެންވާ ބާރެއް ކަމަށާއި އެކަމުގައި ރައީސުލްޖުމްހޫރިއްޔާގެ ދައުރެއް ނޯންނާނެ ކަމަށް ރައްޔިތުންގެ މަޖިލީހުގެ ރައީސް ރައީސް މުހައްމަދު ނަޝީދު ވިދާޅުވެއްޖެއެވެ.
ރާއްޖޭގެ ވެރިކަމުގެ ނިޒާމް ރިޔާސީ ނިޒާމަކުން ބަރުލަމާނީ ނިޒާމަކަށް ބަދަލު ކުރުމަށް ރައްޔިތުންގެ ފެންނަ ނުފެންނަ ވޯޓެއް ނެގުމަށް ހުޅުދޫ ދާއިރާގެ މެމްބަރު އިލްޔާސް ލަބީބް ހުށަހަޅުއްވާފައިވާ ގަރާރާއި ގުޅިގެން ރައީސް ނަޝީދު ވިދާޅުވީ ގާނޫނުއަސާސީގައި ބުނެފައިވާ ގޮތުން ކަންކަމުގައި ރައްޔިތުންގެ ފެންނަ ނުފެނަ ވޯޓެއް ނެގުމަކީ ސީދާ ރައްޔިތުންގެ މަޖިލީހަށް ލިބިގެންވާ ބާރެއް ކަމަށާއި އެކަމުގައި ރައީސުލްޖުމްހޫރިއްޔާގެ ބާރެއް ނެތް ކަމަށެވެ.
ނިޒާމީ ވޯޓުނެގުމަކީ މަޖިލީހަށް ލިބިގެންވާ ބާރެއް ކަމަށް ނަޝީދު ވިދާޅުވުމސަށް ފަހު ނިންމެވީ ނިޒާމީ ވޯޓާއި ގުޅޭ ގޮތުން ހުށަހަޅާފައިވާ ގަރާރުގެ ބަހުސް ނިންމާ ކޮމެޓީގެ މަސައްކަތް ނިމެންދެން މަޖިލީޙުގެ ޖަލްސާތައް ކުރިއަށް ގެންދިއުމަށެވެ.
ގަރާރުގެ މަސައްކަތް ނިމެންދެން މަޖިލީހުގެ މިއަދުގެ ޖަލްސާގެ ވަގުތު އިތުރުކުރަން ފާސްވީ ވޯޓުގައި ބައިވެރިވެވަޑައިގެންނެވި 17 މެންބަރުންގެ އިއްތިފާގުންނެވެ.
މަޖިލީހަށް މި ގަރާރު ތައާރަފުކުރިިއިރު ހުށަހަޅާފައިވަނީ ނިޒާމު ބަދަލުކުރުމާ ގުޅޭ ގޮތުން ރައްޔިތުން ދެކޭ ގޮތް ބެލުމުގެ ވޯޓު ނޮވެމްބަރު 30 ގެ ކުރިން ނެގުމަށެވެ. ނަމަވެސް އިލްޔާސް މިއަދު އެ ގަރާރު މަޖިލީހަށް ހުށަހެޅުއްވީ އޮކްޓޫބަރު 30 ގެ ކުރިން އެ ވޯޓު ނެގުމަށެވެ.
advertisment