ކުރީގެ ރައީސް އަބްދުﷲ ޔާމީން އަބްދުލްގައްޔޫމް ހައިކޯޓުގައި އިސްތިއުނާފުކޮށްފައިވާ މައްސަލައިގެ ޝަރިއަތް ލަސްވަމުންދާތީ އިދިކޮޅުން ހައިކޯޓަށް ވަޑައިގެން ކަންބޮޑުވުން ފާޅުކުރައްވައިފިއެވެ.
އެމަނިކުފާނުގެ ފަރާތުން ހައިކޯޓުގައި އިސްތިއުނާފުކޮށްފައިވަނީ ވ އާރަށް ކުއްޔަށް ދިނުމުގައި ރިޝްވަތާއި މަނީ ލޯންޑްރިންގެ ކުށް ސާބިތުވުމާ ގުޅިގެން 11 އަހަރުގެ ޖަލު ހުކުމެއް އިއްވާފައިވާތީ އެ މައްސަލައެވެ
މިއީ ފެބުރުއަރީ މަހުގެ ތެރޭގައި އިސްތިއުނާފުކުރި މައްސަލައަކަށްވާއިރު، ރިޔާސީ އިންތިހާބުގައި ރައީސް ޔާމީން އަށް ވާދަ ނުކުރެއްވޭނެކަމަށް ސްޕްރީމް ކޯޓުން ކަނޑައެޅުމާއި ހަމައަށް އިދިކޮޅު ލީޑަރޝިޕްއިން ދިޔައީ ވަރަށް ގިނައިން ހައިކޯޓަށް ވަޑައިގަންނަވަމުންނެވެ. އަދި މި މައްސަލަ އަވަސްކޮށްދިނުމަށްވެސް އެދިވަޑައިގެންފައިވެއެވެ. ނަމަވެސް މައްސަލަ ބައްލަވާ އެއް ފަނޑިޔާރަކު ޗުއްޓީއަށް ވަޑައިގަތުމާއި ގުޅިގެން މައްސަލަ ވަނީ ލަސްވެފައެވެ.
މިކަމާއި ގުޅޭ ގޮތުން ޕީއެންސީގެ ރައީސް އަބްދުލްރަހީމް އަބްދުﷲ ވިދާޅުވީ މިއީ ރޭވިގެންކުރާކަމެއްކަމަށެވެ. އަދި މަގްސަދަކީ ރައީސް ޔާމީންއަށް އަނިޔާކުރުންކަމަށް ފާހަގަކުރައްވާ ވިދާޅުވީ މިއީ ލައްކައަކަށްވުރެ ގިނަ ރައްޔިތުންގެ ކަންބޮޑުވުން އޮތްކަމެއްކަމަށެވެ. އަދި ރިޔާސީ އިންތިހާބުގެ ފުރަތަމަ ބުރުގެ ނަތީޖާއިންވެސް މިކަން ފެނިގެން ދިޔަކަމަށް އަބްދުލްރަހީމް ވިދާޅުވިއެވެ.