ރިޔާސީ އިންތިހާބުގެ ދެވަނަ ބުރަށް ކުރައްވާ ކެމްޕެއިންގައި އިދިކޮޅުގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ބ ހިތާދޫއަށް ވަޑައިގަތުމުން، އެ ރަށުގެ އެމްޑީޕީ މެންބަރުން ނިކުމެ ޕީޕއެމްގެ ކުރީގެ ވެރިކަމުގައި ފުއްދަވައިނުދެއްވާ ހުރި ވައުދުތައް އެމަނިކުފާނާއި ހިއްސާކުރައްވައިފިއެވެ.
ރިޔާސީ އިންތިހާބުގެ ފުރަތަމަ ބުރުގައި ލައްކައަކަށްވުރެ ގިނަ ވޯޓު ކާމިޔާބު ކުރެއްވުމަށްފަހު، ދެވަނަ ބުރަށް ކުރައްވާ ކެމްޕެއިންގައި ޑރ މުއިއްޒު މިއަދު ދަތުރު ކުރައްވަމުން ގެންދަވަނީ ބ އަތޮޅުގެ ރަށްތަަކަށެވެ. އެގޮތުން މިއަދުގެ ހަތަރު ވަނަ މަންޒިލް ބ ހިތަދޫއަށް އެމަނިކުފާނު ވަޑައިގެންނެވިއިރު، އެ ރަށުގެ ސަޕޯޓަރުން ދިޔައީ އަޑުގަދަ ކުރަމުންނެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ކޮށްދެއްވާނެކަމަށް ވައުދުވެވަޑައިގެން ކަންތައްތަކުގެ ތެރެއިން ބައެއް ކަންކަންވެފައިނުވާކަމުގެ ޝަކުވާ އެމީހުންގެ އޮތެވެ. ޑރ މުއިއްޒު ވަނީ އެ ފަާރާތްތަކުގެ ކައިރިއަށް ގޮސް ޝަކުވާތައް އަޑު އައްސަވާފައެވެ.
އެ މައްސަލަތައް ހައްލުކޮށްދެއްވުމަށް ޑރ މުއިއްޒު ވަނީ އެއްބަސްވެވަޑައިގެންފައެވެ. އެރަށުގައި ބޭއްވި ޖަލްސާގައި ވާހަކަދައްކަވަމުން ޑރ މުއިއްޒު ވިދާޅުވީ ވެރިކަމަށް ވަޑައިގަންނަވަނީ ހުރިހާ ރައްޔިތުންނަށް، ހަމަހަމަކަމާއި އިންސާފުވެރިކަމާއިއެކު ވެރިކަން ކޮށްދިނުމަށްކަމަށެވެ. ސިޔާސީ ފިކުރަށް ބަލާ ތަފާތުކުރުން ނުގެންގުޅުއްވާނެކަމަށްވެސް އެމަނިކުފާނު ވިދާޅުވިއެވެ.
ރަށުގައި ކުރިއަށްދާ މަޝްރޫއުތަކާއި ގުޅިގެން ޑރ މުއިއްޒު ވިދާޅުވީ ފެނާއި ނަރުދަމާއާއި، ބަނދަރުގެ މަޝްރޫއުތައް ކުރިއަށް ނުގޮސް ހުރިކަމުގެ ޝަކުވާ އެބައޮތްކަމަށެވެ. މި މަޝްރޫއުތައް ބާރު މިނުގައި ކުރިއަށް ގެންދަވާ ދެއްވާނެކަމުގެ ޔަގީންކަން ދެއްވުމަށްފަހު، ސިއްހީ މަރުކަޒު ލެބޯޓްރީ ހިދުމަތް ލިބޭނެ ގޮތަށް ތަރައްގީކޮށްދެއްވުމާއި، ރަށު ސުކޫލުގެ ފެންވަރު ރަނގަޅުކުރުމަށްވެސް ޑރ މުއިއްޒު ވައުދުވެވަޑައިގެންނެވިއެވެ.
މެދު އަދި ދުރު ރާސްތާގެ ޕްލޭންއަކަށް ބަލައިގެން ރަށްރަށަށް ބޭނުންވާ ކަންކަން ކޮށްދެއްވާނެކަމަށް ފާހަގަކުރެއްވިއެވެ.
advertisment