ނިޒާމީ ވޯޓުގެ މަސައްކަތް މި ވަގުތަށް މަޑުޖައްސެވުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެދިވަޑައިގެންފިއެވެ.
އިންތިހާބީ ރައީސް ޑރ. މުހައްމަދު މުއިއްޒުއަށް ވެރިކަން ކުރުމުގެ ފުރުސަތު ދިނުމުގެ ގޮތުން ނިޒާމުގެ ވޯޓު މަޑުޖައްސާލަން ޑިމޮކްރެޓްސްއިން އެއްބަސްވެ މިއަދު މަޖިލީހުގައި ތާވަލުކޮށްފައި އޮތް ނިޒާމުގެ މައްސަލަ އެޖެންޑާއިން ވެސް ވަނީ ނަގާފައެވެ. ފެށިގެންދާ ރިޔާސީ ދައުރު ރީތިކޮށްފެށުމަށާއި އަދި މުއިއްޒުއަށް އެފުރުސަތު ދެއްވަން ބޭނުންފުޅުވާކަމަށް ރައީސް ނަޝީދު ވިދާޅުވިއެވެ. ރައީސް ނަޝީދު ވަނީ މަޖިލީހުގެ މެމްބަރުންގެ އަރިހުން ރިޔާސީ މި ދައުރު ރީތިކޮށް ފެށުމަށާއި އަދި ޑރ. މުއިއްޒުއަށް ރައީސްކަން ކުރުމަށް ރީތިކޮށް ފުރުސަތު އެބޭފުޅުންނަށް ވެސް ފަހިކޮށްދިނުމާއެކު އެ ޖާގަ މުއިއްޒުއަށް އެރުވުމަށް އެދިވަޑައިގަންނަވާފައެވެ.
ނަޝީދު ވިދާޅުވީ ނިޒާމީ ވާހަކަ ސިޔާސީ މަސްރަހުން އަދި ދިވެހި މުޖްތަމައުގެ ތެރެއިން ފިލައިގެން ގޮސްފައިނުވާކަމަށެވެ. އެހެންކަމުން އެކަމާ ގުޅޭ ގޮތުން މަސައްކަތް ކުރެއްވުމަށް ނަޝީދު އެދިވަޑައިގަންނަވާފައިވާ ކަމަށް ވެސް ވިދާޅުވިއެވެ. ނަޝީދު ވިދާޅުވީ މުއިއްޒުގެ ޖަވާބާ ދޭތެރޭ ހިތްހަމަ ޖެހިވަޑައިގަންނަވާ ކަމަށާއި އަދި ނިޒާމީ ވޯޓުގެ މަސައްކަތް މިވަގުތު ނުކުރި ނަމަވެސް ފަހުން ވެސް ކުރެވިދާނެ މަސައްކަތަކެއް ކަމަށް މުއިއްޒުވެސް ދެކެވަޑައިގަންނަވާ ކަމަށް ރައީސް ނަޝީދު ވިދާޅުވިއެވެ.