ކުރީގެ ސަރުކާރުން މާލެ ސަރަހައްދުގައި ދިރިއުޅޭ މީހުންނަށް ފްލެޓު ދޫކުރި ”ގެދޮރުވެރިޔާ ސްކީމް“ އިން ފްލެޓު ލިބޭ މީހުންގެ ލިސްޓު ރިވިއު ކުރުމަށް ނިންމާފައިވާކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެ އެވެ.
އައު ހައުސިން މިނިސްޓަރު ބޭއްވި ނޫސްވެރިންގެ ބައްދަލުވުމުގައި ވިދާޅުވީ، ރައީސް އިބްރާހިމް މުހައްމަދު ސޯލިހުގެ ސަރުކާރުން ރައްޔިތުންނަށް ދީފައި ހުރި އެއްވެސް ބިމެއް ނުވަތަ ފްލެޓެއް ވެސް އަތުނުލާނެކަމަށް އަދި އެގްރިމަންޓުތަކަށް އިހުތިރާމު ކުރައްވާނެކަމަށް މީގެ ކުރިން ވިދާޅުވެފައިވެފައިވީ ނަމަވެސް މިހާރު ވިސްނުމަކީ އެއީ ނޫން ކަމަށެވެ.
ނޫސްވެރިންގެ ގިނަ ސުވާލުތަކެއް ވެސް އަމާޒުވި މި ނޫސްވެރިންގެ ބައްދަލުވުމުގައި އޭނާ ވިދާޅުވީ ފްލެޓު ލިސްޓުތަކާއި ގުޅިގެން އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅާފައިވާ ޝަކުވާތައް އެބަހުރި ކަމަށެވެ. އަދި ސަރުކާރުން އެ ހަވާލު ކުރީ ވެސް ކޮމިޝަނުން އެގޮތަށް އަމަލު ނުކުރުމަށް އަންގާފައިވަނިކޮށް އެއާއި ހިލާފުވިކަމަށް މިނިސްޓަރު ވިދާޅުވި އެވެ.
ރައީސް ސޯލިހު ސަރުކާރުގެ ނިޔަތާއި މެދު ސުވާލު އުފައްދައި އޭނާ ވިދާޅުވީ، މިހާރު އިންތިޒާރު ކުރަނީ އޭސީސީން ލަފައެއް ލިބެންދެން ކަމަށެވެ. އަދި އެ މައްސަލަތަކަކީ ކޮބައިތޯ ބެލުމަށް ފަހު ރިވިއު ކުރާނެކަން މިނިސްޓަރ ހާމަކުރެއްވި އެވެ.
މިނިސްޓަރ ވިދާޅުވި ގޮތުގައި ފްލެޓު ލިބިފައި ވަނީ ހައްގުވެރިންނަށް ތޯ ބެލުން މުހިންމެވެ.
މީގެއިތުރުން ސަންގު ޓީވީގެ ސުވާލަކަށް މިނިސްޓަރު ވިދާޅުވީ ފްލެޓު ދިނުމަށް ހަދާ ޕޯޓަލްއަށް ދޮގު މައުލޫމާތުތައް ދީގެން ފްލެޓުތައް ލިބިފައި ހުރުން އިންސާފުވެރިއެއް ނޫން ކަމަށެވެ.
