ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ހާއްސަ މުޝީރު އަބްދުއްރަހީމް އަބްދުﷲ 20 ވަނަ ރައްޔިތުންގެ މަޖިލީހުގެ އިންތިހާބުގައި ވާދަކުރައްވަން ނިންމަވައިފިއެވެ.
މަޖިލީހަށް ވާދަކުރައްވާކަން އަބްދުއްރަހީމް އިއުލާނުކުރައްވާފައިވަނީ އެކްސްގައި ހިއްސާކުރެއްވި ޕޯސްޓެއްގައެވެ. އަބްދުއްރަހީމް ވިދާޅުވީ 2024 ވަނަ އަހަރު ބޭއްވުމަށް ހަމަ ޖެހިފައިވާ 20 ވަނަ ރައްޔިތުންގެ މަޖިލީހުގެ ލ.ފޮނަދޫ ދާއިރާއަށް ވާދަ ކުރުމަށް ނިންމާފައިވާ ކަމަށެވެ.
އެހެންކަމުން އެ ދާއިރާގެ ރައްޔިތުންގެ ތައީދު އަބްދުއްރަހީމްއަށް ދެއްވުމަށް ވަނީ އެދިވަޑައިގަންނަވާފައެވެ.
بسم اللہ الرحمن الرحیم
2024 ވަނަ އަހަރު ބޭއްވުމަށް ހަމަ ޖެހިފައިވާ 20 ވަނަ ރައްޔިތުންގެ މަޖިލީހުގެ ލ.ފޮނަދޫ ދާއިރާއަށް ވާދަ ކުރުމަށް އަޅުގަނޑު ނިންމައިފީމެވެ.ދާއިރާގެ ލޮބުވެތި ރައްޔިތުންގެ ފުރިހަމަ ތައީދު އަޅުގަނޑަށް ދެއްވުމަށް ނުހަނު އިޚްލާަޞްތެރިކަމާާއެކު އެދެމެވެ.— Abdul Raheem Abdulla (@Banafsaa) December 11, 2023
އަބްދުއްރަހީމަކީ ރަައީސްގެ މުޝީރެއްގެ ގޮތުގައި އައްޔަން ކުރެއްވުމުގެ ކުރިން ވެރިކަން ބަދަލުވުމުގެ މަރުހަލާގައި ޑިރެކްޓަރ ޖެނެރަލް އޮފް ޓަރާންސިޝަންގެ މަގާމުގައި ހުންނެވި ބޭފުޅާއެވެ. އަދި ޕީޕީއެމް/ޕީއެންސީގެ ހަރަކާތްތައް ކުރިއަށް ގެންދިއުމުގައި އިސްކޮށް އުޅުއްވީވެސް އަބްދުއްރަހީމްއެވެ.
މީގެއުތުރުން އަބްދުއްރަހީމް އަކީ ޕީއެންސީގެ ޗެއާރޕާސަންކަމުގެ މަގާމުވެސް ފުރުއްވަމުން އަންނަ ބޭފުޅެކެވެ.
advertisment