އަންނަ އަހަރަށް ލަފާކޮށް ހުށަހަޅާފައިވާ ދައުލަތުގެ ބަޖެޓުގެ ބަހުސް މަރުހަލާތައް ނިންމައި، މާދަމާ ވޯޓަށް އެހުމަށް ތައްޔާރުވެއްޖެ އެވެ.
2024 އަަށް ލާފާކޮށް މަޖިލީހަށް ހުށަހެޅީ 49.5 ބިލިއަން ރުފިޔާގެ ބަޖެޓެއް ނަމަވެސް، 300 މިލިއަން ރުފިޔާ އިތުރުކޮށް ކޮމިޓީން ފާސް ކުރީ 49.8 ބިލިއަން ރުފިޔާގެ ބަޖެޓެކެވެ. މި ބަޖެޓުގެ މަސައްކަތް މަޖިލީހުގައި ކުރިޔަށް ގެންދިޔަ އިރު 44 މެމްބަރަކު ބަހުސްގައި ބައިވެރިވި އެވެ.
މި ދެ ދުވަހު ވެސް ކުރިޔަށް ގެންދިޔަ ބަޖެޓުގެ ބަހުސަށް ފަހު، މިއަދުގެ ޖަލްސާ ނިންމަވާލައްވަމުން ރިޔާސަތުގައި ހުންނެވި މުހައްމަދު އަސްލަމް ވިދާޅުވީ ދެން އޮންނާނީ ވޯޓަށް އެހުން ކަމަށެވެ.
ބަޖެޓު ކޮމިޓީގެ މެމްބަރަކީ ކިނބިދޫ ދާއިރާގެ މެމްބަރު މުހައްމަދު ނާޝިޒެވެ. އަދި ނައިބު މުގައްރިރަކީ އަލިފުށި ދާއިރާގެ މެމްބަރު މުހައްމަދު ރަޝީދު ހުސެއިން (ބިގޭ) އެވެ.
ސަރުކާރު މެމްބަރުންގެ ތެރެއިން ތިއްބަވަނީ އޭދަފުށި ދާއިރާގެ ޕީޕިއެމް މެމްބަރު އަހުމަދު ސަލީމާއި، މަހިބަދޫ ދާއިރާގެ ޕީޕީއެމް މެމްބަރު އަހުމަދު ތާރިގު، އަދި ތުލުސްދޫ ދާއިރާގެ ޕީއެންސީ މެންބަރު އިބްރާހިމް ނަސީރާއި، ފޮނަދޫ ދާއިރާގެ ޕީއެންސީ މެމްބަރު މޫސާ ސިރާޖެވެ.
ކޮމިޓީ މަރުހަލާގައި ބަޖެޓަށް ދެން ގެނައި އިތުރު ބަދަލަކީ ޕީއެސްއައިޕީ މަޝްރޫއުތަކުގެ ހަރަދުތައް ބޮޑުކުރުމެވެ. ޕީއެސްއައިޕީއަށް 249 މިލިއަން ރުފިޔާ އިތުރު ކުރިއިރު، އެއާއި ޖުމްލަ ޕީއެސްއައިޕީ ޕްރޮޖެކްޓުތަކަށް ހާއްސަ ކުރި ބަޖެޓު ވަނީ 8.9 ބިލިއަނަށް އިތުރުވެފަ އެވެ.
ބަޖެޓަށް ގެނައި އެކި ބަދަލުތަކާއި އެކު، ޑެފިސިޓް 16.3 ބިލިއަނަށް އަރަ އެވެ.
ބަޖެޓުގެ މަސައްކަތް ކުރިޔަށް ގެންދިޔަ އިރު، ކޮމިޓީން ވަނީ އަންނަ އަހަރަށް ލިބޭނެކަމަށް ލަފާކޮށްފައިވާ އަދަދާއި، އޮފީސްތަކުގެ ބަޖެޓާއި، މިނިވަން މުވައްސަސާތަކުގެ ބަޖެޓު އަދި ޕްބްލިކް ސެކްޓާރ އިންވެސްޓްމަންޓު ޕްރޮގްރާމުތަކާއި ގުޅޭގޮތުން ބަހުސްކޮށްފަ އެވެ.