އިންތިހާބީ މޭޔަރު އާޒިމް ސިޓީ ކައުންސިލްގެ އިސްބޭފުޅުންނާ ބައްދަލު ކުރައްވައިފި

އިންތިހާބީ މޭޔަރު އާދަމް އާޒިމް މާލެ ސިޓީ ކައުންސިލަށް ވަޑައިގެން އިދާރީ އިސް ބޭފުޅުންނާ މިއަދު ބައްދަލު ކުރައްވައިފި އެވެ.

މޭޔަރުކަމުގެ ހުސްވެފައިވާ ގޮނޑިއަށް ބޭފުޅަކު އިންތިހާބު ކުރުމަށް ހޮނިހިރު ދުވަހު ބޭއްވި ބައި އިލެކްޝަން އާދަމް އާޒިމް ކާމިޔާބު ކުރެއްވީ ބޮޑު ތަފާތަކުންނެވެ. އިދިކޮޅު މައި ޕާޓީ އެމްޑީޕީގެ ޓިކެޓުގައި ވާދަކޮށް، އާޒިމް މޭޔަރުކަމުގެ ގޮނޑި ކާމިޔާބު ކުރުމުން އެ ޕަޓީން ވަރަށް ކުލަގަދަކޮށް ފާހަގަވެސް ކުރި އެވެ.

މަސްއޫލިއްޔަތުތަކާއި ހަވާލުވެވަޑައިގަތުމުގެ ކުރިން، ކައުންސިލްގެ މަސައްކަތްތައް ކުރިޔަށް ދާގޮތާއި އަދި ބައެއް މަޝްވަރާތައް ކުރުމަށް އާޒިމް ވަނީ ކައުންސިލްގެ މެނޭޖްމަންޓާއި އެކު ބައްދަލުވުމެއް ކުރިޔަށް ގެންދަވާފަ އެވެ.

Mayor-elect @adamazim conducted a productive meeting with the senior management of the Council, discussing ongoing works and addressed crucial matters related to council operations. pic.twitter.com/93gI6pgs0K

— Malé City Council (@MaleCitymv) January 15, 2024

މި ބައްދަލުކުރެއްވުމުގައި ކައުންސިލްގެ އިދާރީ ހިންގުމާއި ގުޅޭ ގޮތުން ހުރި މައްސަލަތަކަށް ވާހަކަ ދައްކައި، ހައްލު ހޯދެއްވުމަށް ވާހަކަ ދެކެވުނުކަމަށް ކައުންސިލުން މައުލޫމާތު ދެއެވެ.

އިންތިހާބު ކާމިޔާބު ކުރައްވައި އާޒިމް ވިދާޅުވީ ރައްޔިތުން އެދޭ، އަދި އުޅޭ ހިތްވާ މާލެއެއް ތަރައްގީ ކުރުމަށް ހުރިހާ ރައްޔިތުންނާއި އިސް ބޭފުޅުންގެ ބައިވެރިވުމާއި އިތުބާރާއި އެކު ކުރިޔަށް ދިއުމަށް މަސައްކަތް ކުރައްވާނެ ކަމަށެވެ. އަދި ސިޔާސީ ޕާޓީތަކުން ކީ މަރުހަބާއާއި، ކުރެއްވި ތާއީދަށް އާޒިމް ޝުކުރު އަދާކުރެއްވި އެވެ.

އާޒިމް ވިދާޅުވީ ރައްޔިތުން ބޭނުންވަނީ ތަރައްގީގެ އުފާ އިހުސާސް ކުރުމަށްކަމަށާއި، އެމްޑީޕީން ރާއްޖެއަށް ގެނެސްދިން ތަރައްގީ ބާރު ސްޕީޑުގައި ކުރިޔަށް ދިއުމަށް ރައްޔިތުން ބޭނުންވާ ކަމަށެވެ. އަދި އެނާ އަބަދުވެސް ދެމި ހުންނާނީ ރައްޔިތުން ބޭނުންވާ ގޮތަށް ދެމެހެއްޓެނިވި ތަރައްގީ ގެނައުމުގައިކަމަށް ވެސް ވިދާޅުވި އެވެ.