ޕްރޮގްރެސިވް ޕާޓީ އޮފް މޯލްޑިވްސް އާއި، ޕީޕަލްސް ނެޝަނަލް ކޮންގްރެސް އަބަދުވެސް އިސް ކުރާނީ އާންމު މެމްބަރުންގެ މަސްލަހަތުކަމަށް ހުޅުމާލެ ދާއިރާގެ ކައުންސިލް މެމްބަރު އިބްރާހިމް ޝުޖާއު ވިދާޅުވެއްޖެ އެވެ.
މާޗު މަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިހާބަށް ކޮންގްރެސް ކޯލިޝަނުގެ ޕާޓީއަށް އެދި ގިނަ ބަޔަކު ފޯމު ހުށަހެޅި އެވެ. އެކަމަކު ބައެއް ޝަރުތުތަކެއްގެ ސަބަބުން، ކެންޑިޑޭޓުންގެ ފޯމުތައް ބަލައިގަނެވެން ނެތްކަމަށް ނިންމައި އެކަން ރަސްމީކޮށް ރޭގެ ވަގުތެއްގައި އެންގި އެވެ. އެ މައްސަލައިގައި ގިނަ ކެންޑިޑޭޓުންނާއި، ޓީމުތަކުން ކަންބޮޑުވުންފާޅު ކުރުމުން ޕާޓީގެ ރައީސްގެ ހައިސިއްޔަތުން ރައީސް މުއިއްޒު ވަނީ އެ ނިންމެވުމަށް ބަދަލު ގެނެސްފަ އެވެ.
ޕްރައިމެރީއަށް ވާދަކުރުމަށް ފޯމު ހުށަހެޅި ހުރިހާ ކެންޑިޑޭޓުންނަށް ވެސް ވާދަކުރެވޭ ގޮތަށް ރައީސް ނިންމަވާފައިވާކަމަށް، ޗެއާޕާސަން އަބްދުއްރަހީމް އަބްދުﷲ ހާމަކުރެއްވުމުން ޝުޖާއު ވިދާޅުވީ ރައީސް މުއިއްޒު އަބަދުވެސް އިސްކުރައްވާނީ އާންމު މެމްބަރުންގެ މަސްލަހަތު ކަމަށެވެ. އަދި ހުރިހާކަމެއް ވެސް ދެން އަވަސް ސްޕީޑެއްގައި ކުރިޔަށްދާނެކަމަށާއި، ހުރިހާ ކެންޑިޑޭޓުން ވެސް ވޯޓާސް ލިސްޓުތައް ރަނގަޅަށް ބަލައި މައްސަލަތައް ހުރިތޯ ބެއްލެވުމަށް ޝުޖާއު އެދިވަޑައިގެންނެވި އެވެ. އޭނާ ވިދާޅުވީ މި ޕްރައިމެރީ ވެގެން ދާނީ މިހާތަނަށް ރާއްޖޭގައި ބާއްވާ އެންމެ އިންސާފުވެރި އިންތިހާބަށް ކަމަށެވެ.
ރައީސް ޑރ @MMuizzu އަބަދުވެސް އިސްކުރައްވާނީ ޕާޓީ އާންމު މެމްބަރުންގެ މަސްލަހަތު.ޝުކުރިއްޔާ ރައީސް!
ހާސްނުވޭ!ހުރިހާކަމެއް ދާނީ ބަރާބަރަށް.ލިސްޓްތައް ރަގަޅަށް ޗެކް ކުރައްވާ!ލިސްޓުގައި މައްސަލަހުރިތޯ ބައްލަވާތި!މިއުޅެނީ ދިވެހިރާއްޖޭގައި މިހާތަނަށް ބާއްވާ އެންމެ އިންސާފުވެެރި… https://t.co/3NNUzqct40
— Ibrahim Shujau (@IbrahimShujaau) January 22, 2024
ރައްޔިތުންގެ މަޖިލީހުގެ އިންތިހާބުގެ ތިންބައިކުޅަ، ދެބައި ގޮނޑިތައް ކާމިޔާބު ކުރެވޭނެކަމުގެ އުންމީދު އެބައޮތްކަމަށް ރައީސް ވިދާޅުވެފައި ވެއެވެ. އެމަނިކުފާނު ވިދާޅުވީ މަޖިލީހަށް އިންތިހާބުވުމަށް ބޭނުން ވަނީ ތައުލީމީ ގޮތުން ގާބިލު ޒުވާން މޫނުތަކެއް ކަމަށެވެ. އަދި ސަރުކާރުގެ ސިޔާސަތުތައް ތަންފީޒު ކުރުމަށް މަޖިލީހުގައި ސަރުކާރުގެ މެމްބަރުން ތިބުން މުހިންމުކަން ފާހަގަކުރައްވާފައި ވެއެވެ.
