ހުސްވެފައިވާ ސިވިލް ސާވިސް ކޮމިޝަނުގެ މެމްބަރުކަމަށް އައްޔަނު ކުރުމަށް ތިން ބޭފުޅެއްގެ ނަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަޖިލީހަށް ފޮނުއްވައިފި އެވެ.
ސީއެސްސީގެ މެމްބަރުގެ މަގާމު ހުސްވެފައި ވަނީ، އެ ކޮމިޝަނުގެ މެމްބަރު ފާތިމަތު އާމިރާގެ ދައުރު ހަމަވާތީ އެވެ. އެގޮތުން ހުސްވެފައިވާ މަގާމަށް މެމްމަބަރަކު އައްޔަނު ކުރުމަށް އިއުލާނު ކުރުމުން ކުރިމަތި ބޭފުޅުންގެ ތެރެއިން ރައީސް މަޖިލީހުގެ ތަޅުމަށް ތިން ނަމެއް ފޮނުއްވި އެވެ.
އެއީ:
ދަފްތަރު ނަމްބަރު ރސ 7505، އަބްދުލް ހަސީބު އިސްމާއިލް
މއ. ފޮރެސްޓު، މަރިޔާމް ޝާހިދާ
ދަފްތަރު ނަމްބަރު ރސ 9472، ފާތިމަތު ހަބީބާ
މަޖިލީހުގެ މިއަދުގައި އޮތް އެޖެންޑާގެ ދަށުން، ތިން ނަން ވެސް ދިރާސާ ކުރުމަށް މިނިވަން މުވައްސަސާތަކާއި ބެހޭ ކޮމިޓީއަށް ވަނީ ފޮނުވާފަ އެވެ.
އާމިރާގެ ދައުރު ހަމަވާއިރު، އޭނާގެ އިތުރަށް ދެން ސީއެސްސީގައި ތިއްބެވި މެމްބަރުނަކީ ކޮމިޝަނުގެ ރައީސް މުހައްމަދު ނާސިހާއި، ނައިބު ރައީސް އިބްރާހިމް ރަޝީދުގެ އިތުރުން މުހައްމަދު ފަރުސަތު އަދި ފާތިމަތު ޝަރީފެވެ.
