ރައީސް މުއިއްޒު ނެޝަނަލް ސައިބާ ސެކިއުރިޓީ އެޖެންސީއެއް އުފައްދަވައިފި

އެ އިދާރާއިން ކުރަން ޖެހޭ ބައެއް މަސައްކަތްތަކުގެ ތެރޭގައި ސައިބަރ ސެކިއުރިޓީއާ ގުޅުންހުރި އެންމެހައި ކަންތައްތަކުގައި ޤައުމީ ފެންވަރުގައި ފޯކަލް ޕޮއިންޓެއް ގޮތުގައި މަސައްކަތްކުރުމާއި ސައިބަރ ވެށީގައި ހިނގަމުންދާ ކަންކަން ދިރާސާކޮށް، ދައުލަތަށް ނުރައްކާވެދާނެ ސައިބަރ ހަމަލާތައް ދުރާލައި ދެނެގަނެ، މިފަދަ ހަމަލާތަކާބެހޭ މައުލޫމާތު ދައުލަތުގެ ސަލާމަތީ މުއައްސަސާތަކާ ހިއްސާކުރުމާއި، މިފަދަ ހަމަލާތަކުން ރައްކާތެރިވުމަށް އަޅަންޖެހޭ ފިޔަވަޅުތައް އަޅަމުން ގެންދިޔުން ހިމެނެއެވެ.

ސަރުކާރުގެ އިދާރާތަކަށް ކުރިމަތިވާ ސައިބަރ ހަމަލާތައް ދީފައިވާގޮތްތައް ދެނެގަތުމަށް ތަޙުޤީޤުކުރުމާއި، އެ ހަމަލާތަކުން ލިބޭ ގެއްލުންތައް ވަޒަންކުރުމުގެ އިތުރުންވެސް ސަރުކާރުގެ އިދާރާތަކަށް ކުރިމަތިވާ ސައިބަރ ހަމަލާތައް ހިންގާފައިވާގޮތް ދެނެގަތުމުގެ ކަންކަންވެސް ކުރުމަކީ އެ އިދާރާއިން ކުރާ ބައެއްމަސައްކަތްތަކެވެ.

އޭގެ އިތުރުން ސަރުކާރުގެ އިދާރާތަކުން މައުލޫމާތު ފޯރުކޮށްދިނުމަށް އުފައްދާ ވެބްސައިޓްތަކާއި، ޑިޖިޓަލްކޮށް ހިދުމަތް ދިނުމަށް ފަރުމާކުރާ އިންފޮމޭޝަން ސިސްޓަމްތަކާއި، އެޕްލިކޭޝަންތަކާއި، ޑޭޓާބޭސްތައް ފަދަ އުފެއްދުންތަކުގައި ބޭނުންކުރާނެ ސެކިއުރިޓީ ސްޓޭންޑަޑްތައް ކަނޑައަޅައި އަދާހަމަކޮށް ޝާއިއު ކުރުމުގެ މަސައްކަތް ވެސް އެ އިދާރާއިން ކުރަން ޖެހޭނެއެވެ.

އަދި ސަރުކާރުގެ އިދާރާތަކަށް ކުރިމަތިވާ ސައިބާ ސެކިއުރިޓީ ހަމަލާތަކާއި ހާދިސާތަކުގައި ވަގުތުން އަޅަންޖެހޭ ފިޔަވަޅުތައް އެޅުމާއި، އެފަދަ ހަމަލާތަކުގެ ސަބަބުން އިތުރު ގެއްލުންތައް ވިޔަނުދިނުމަށް އަޅަންޖެހޭ ރައްކާތެރިކަމުގެ ފިޔަވަޅުތައް އެޅުން ވެސް ހިމެނެއެވެ.

ސައިބާ ހަމަލާއެއް ދިމާވެއްޖެނަމަ އިދާރާތަކުގެ މުހިންމު މަސައްކަތްތަކަށް ހުއްޓުމެއް ނައިސް ކުރިއަށް ގެންދިޔުމަށް ބޭނުންވާ ފަންނީ އެހީތެރިކަން އެ އިދާރާތަކަށް ފޯރުކޮށްދިނުމާއި، އެ އިދާރާތަކަށް ބޭނުންވާ ސެކިއުރިޓީ ޓޫލްސް އަދި އާލާތްތައް ވަގުތީ ގޮތުން ފޯރުކޮށްދިނުން ވެސް އެ އިދާރާއިން ކުރަން ޖެހޭނެ ކަމަށް ރައީސް އޮފީހުން ވަނީ ބުނެފައެވެ.