ކުރިއަށް އޮތް މޭ މަހުގެ ނިޔަލަށް އެންމެ ލަސްވެގެން އީވޮލެޓުގެ ހިދުމަތް ތައާރަފްކުރާނެކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެއެވެ.
ރައީސް އޮފީހުން ކުރިއަށް ގެންދާ ރައީސްގެ ޖަވާބު ޕްރޮގްރާމްގައި އީވޮލެޓުގެ ހިދުމަތް ތައާރަފްކުރުމާއި ގުޅޭގޮތުން ސުވާލުކުރުމުން އެމަނިކުފާނުވަނީ މިހާރުވެސް އެކަން ރައްޔިތުންނާއި ހިސާބަށް ގެނެސްދިނުމުގެ ގޮތުން މަސައްކަތްތައް ކުރެވެމުންދާކަން ހިއްސާކުރައްވާފައެވެ. އަދި އެންމެ ލަސްވެގެން ކުރިއަށް އޮތް މޭ މަހުގެ ނިޔަލަށް ހިދުމަތް ފެށިގެންދާނެކަމަށް ބެލެވޭކަަމަށްވެސް ވިދާޅުވިއެވެ.
އީވޮލެޓު ތައާރަފްކުރުމަކީ މި ސަރުކާރުގެ އަމާޒެކެވެ. ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ޒުވާނުން ބާރުވެރިކުރުމާއި، މައުލޫމާތާއި ފަންނާއި ބެހޭ ވުޒާރާގެ ފަރާތުން ބާއްވާ ޔޫތު ހެކަތޯން ފެށުމުގެ ރަސްމިއްޔާތުގައި ވިދާޅުވީ، ސަރުކާރުގެ ވިސްނުމަކީ ރާއްޖެއަށް އީ–ވޮލެޓު ތަޢާރަފްކޮށް، ބޭރުގެ ފަރާތްތަކަށް ޚިދުމަތްތައް ވިއްކައިގެން ދިވެހިންނަށް އެކަމުގެ މަންފާ ލިބިގެންދާނެ ފަދަ ގޮތަކަށް އިންތިޒާމުތައް ހަމަޖެއްސުންކަމަށެވެ.