ގައުމުގެ އިގްތިސޯދު ހަރުދަނާ ވަމުންދާ މިންވަރަކުން ނުވަތަ އާމްދަނީ ލިބޭ މިންވަރަކުން މި ދައުރު ތެރޭގައި ހުރިހާ ސެކްޓަރ އެއްގެ މުސާރަ ބޮޑު ކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސްގެ އޮފީހުން ސިސްސިލާ ގޮތެއްގައި ގެންނަ “ރައީސްގެ ޖަވާބު” ސެގްމެންޓުގައި އާއްމުންގެ މީހަކު ކުރި ސުވާލަކަށް ޖަވާބު ދެއްވަމުން ރައިސް ވިދާޅުވީ ހުރިހާ ސެކްޓަރ އެއްގެ މުސާރަ ބޮޑު ކުރުމަކީ އެމަނިކުފާނުގެ ވައުދެއް ކަމަށެވެ. އަދި އިގްތިސާދުގައި ބުންވަރު ޖެހޭ މިންވަރަކުން މުސާރައަށްވެސް ބަދަލު ގެނެސްދެއްވާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ މިހާރު ބައެއް ސެކްޓަރ ތަކުގެ މުސާރަ ބޮޑުކޮށްދެއްވާފައިވާކަމަށެވެ. ސިފައިން ނާއިން ފުލުހުންގެ މުސާރަ ބޮޑު ކުރި ގޮތަށް އެހެން ސެކްޓަރ ތަކުގެ މުސާރަވެސް ބޮޑުކޮށް އެ ވައުދު ފުއްދައިދެއްވާނެ ކަމަށް ރައީސް ވިދާޅުވިއެވެ.
ރައީސްގެ ޖަވާބު
30 މާރިޗް 2024ރައީސްގެ ޖަވާބު ފަށްޓަވަމުން ރޯދައިގެ ފަހު 10 ގެ ސަރުކާރު ބަންދުކުރެއްވީ އަޅުކަމަށް ފުރުޞަތު ދެއްވުމަށްކަމަށް ވިދާޅުވި. ޖަވާބުދެއްވީ، ސަރުކާރު މުވައްޒަފުންގެ މުސާރަ ބޮޑުކުރުމާމެދު، ފުވައްމުލައް ސިޓީ، ނިއުވެލީ، ޢަލީ ޝަފީޢު ދެންނެވި ސުވާލަށް. pic.twitter.com/qb923rOjsP
— Government of Maldives (@governmentmv) March 30, 2024
މީގެއިތުރުން ރައީސް ވަނީ ރޯދަ މަހުގެ ފަހު 10 ގެ ހެޔޮ ދުއާ ހުރިހާ ރައްޔިތުންނަށް އަރިސް ކުރައްވާފައެވެ. އަދި ރޯދަ މަހުގެ ބަރަކަތާއި ސަވާބު ހޯދުމަށްޓަކައި ފަހު ދިހައަކީ ހާއްސަ ދުވަސްތަކެއް ކަމަށާއި އެހެންކަމުން ސަރުކާރުން ނިންމީ ފަހު ދިހައިގައި ރޭ އަޅުކަމުގައި ގިނަ ވަގުތު ހޭދަކުރުމަށް ފާސޭހަކޮށް ދިނުމުގެ ގޮތުން ފަހު ދިހަ ބަންދު ދުވަސްތަކެއް ގޮތުގައި ކަނޑައަޅުމަށް ކަމަށް ރައީސް ވިދާޅުވިއެވެ.
އެހެންކަމުން ސަރުކާރު ބަންދު ދުވަސް ތަކެއްގެ ގޮތުގައި ފަހު ދިހަ ކަނޑައެޅުމަށް ނިންމައިފައިވާ ކަމަށާއި ފަހު ދިހައިގެ ބޭނުން އެންމެ ފުރިހަމަގޮތުގައި ހިފާނެ ކަމަށް އުއްމީދު ކުރައްވާ ކަމަށް ރައީސް ވަނީ ވިދާޅުވެފައެވެ.