މައްސަލައެއް ބަލަމުންދާކަމަށްވުމުން ރައީސް އޮފީހުގެ މިނިސްޓަރު އާދަމް ރަމީޒު ސަސްޕެންޑުކޮށްފައިވާކަމަށް ތަރުޖަމާނު ހީނާ ވަލީދު ވިދާޅުވެއްޖެއެވެ.
ރައީސް ޑރ މުއިއްޒު އާއި ގާތްވުމަށް މިނިސްޓަރ ރަމީޒުގެ ކުރީގެ އަންހެނުން ޝަމްނާޒް ސިހުރު ހަދާފައިވާކަމުގެ އަޑު ރަށުތެރޭގައި ފެތުރިފައިވާއިރު، ހީނާވަނީ ރަމީޒުވެސް ސަސްޕެންޑުކޮށްފައިވާކަން މީޑިއާތަކަށް ކަށަވަރުކޮށްދެއްވާފައެވެ. އެހެންނަމަވެސް މީގެ ކުރިން ރައީސް ޑރ މުއިއްޒު އާއި އިންތިހާއަށް ގާތްކޮށް ފެނިގޮސްފައިވާ ރަމީޒުގެ މައްޗަށް ކުރެވިފައިވާ ތުހުމަތާއި ގުޅޭ މައުލޫމާތެއް ހިއްސާކުރައްވާފައިނުވެއެވެ.
ރަމީޒުގެ ކުރީގެ އަންހެނުން އެންވައިރަމެންޓު މިނިސްޓްރީގެ ސްޓޭޓް މިިނިސްޓަރު ޝަމްނާޒް ވަނީ ސިހުރު ހެދި މައްސަލައެއްގައި ހައްޔަރުކޮށްފައެވެ. ޝަމްނާޒްގެ އިތުރުންވެސް ދެ މީހަކު މި މައްސަލައާއި ގުޅިގެން ފުލުހުންގެ ބެލުމުގެ ދަށަށް ގެންގޮސްފައިވެއެވެ.
ޝަމްނާޒްއަކީ ސްޓޭޓް މިނިސްޓަރުކަމަށް ވަޑައިގަތުމުގެ ކުރިން ރައީސް ޑރ މުއިއްޒުގެ މާލެ ސިޓީ ކައުންސިލުގެ މޭޔަރުގެ ގޮތުގައި ހުންނެވި އިރު ހެންވޭރު ދެކުނު ދާއިރާގެ ކައުންސިލަރުގެ މަގާމުގައި ހުންނެވި މީހާކަން ފާހަގަކުރެވެއެވެ.
