އިއްޔެ ހުޅުމާލޭގައި ހިނގި އެކްސިޑެންޓުގައި ހިމެނޭ މީހުންގެ ތެރެއިން ދެ މީހަކު ޝަރީއަތް ނިމެންދެން ބަންދު ކުރުމަށް ކްރިމިނަލް ކޯޓުން އުމުރުކޮށްފި އެވެ.
މި މައްސަލައިގައި ފުލުހުން ކޯޓު އަމުރެއްގެ ދަށުން ހައްޔަރުކޮށްފައި ވަނީ ހ. ނޫރަންމާގޭ، އިކްރާމުއްރަހްމާނާއި މ. ލޭންޑްއޮފްގާޑަން، އިބްރާހިމް އިކްރާމްގެ އިތުރުން ގއ. ކަނޑުހުޅުދޫ، އާޒާދުގޭ ޖިނާހް އިސްމާއީލެވެ.
މައްސަލައިގައި ޝަރީއަތް ނިމެން ދެން ބަންދުކުރީ އިކްރާމުއްރަހްމާނާއި އިބްރާހިމް އިކްރާމެވެ.
ތަފާތު އެކި މައްސަލަތަކުގައި ހައްޔަރު ކުރާ މީހުންގެ ވަނަވަރު އާންމު ކުރުން ކޮންމެވެސް ވަރަކަށް މަޑުޖެހިފައި އޮތް ނަމަވެސް އެކްސިޑެންޓަށް ފަހު ފިލި މީހުން ހައްޔަރުކޮށް ވަނަވަރު އާންމު ކުރީ އެ ހާދިސާއަށް ބޮޑު ސަމާލުކަމެއް ލިބުމުންކަމަށް ބެލެވެ އެވެ.
އެކްސިޑެންޓުގައި އަނިޔާވި، މީހާގެ ހާލު މިހާރު ސްޓޭބަލް ނަމަވެސް އާންމުވެފައިވާ ވީޑިއޯގައި ފެންނަ ގޮތުން ރޭސިން ކާރު ބާރު ސްޕީޑުގައި އައިސް އޭނާގެ ސައިކަލުގައި ޖެހުމުން ވިއްސައިގެން ދަނީ ކާރުގެ މަތީންނެވެ.
އެއަށް ފަހު ދެން އާންމުވި އެހެން ވީޑިއޯއެއްގައި، ތިން މީހަކު ކާރުން ފައިބައި އެ ސަރަހައްދު ދޫކޮށް ދާތަން ފެނެއެވެ. އޭގެ ތެރެއިން އެކަކު އެކްސިޑެންޓުގައި އަނިޔާވި މީހާ ކައިރިއަށް ދިއުމަށް ފަހު، އެތަނުން ދަނީ އެ ސަރަހައްދަށް ސައިކަލުގައި އައި ބައެއްގެ ފަހަތުގަ އެވެ.
މި މައްސަލައިގައި ހިމެނޭ ކާރުގެ ދައުރުވެފައިވާ ފޮޓޯތަކުން ފެންނަ ގޮތުން، އެ ކާރު ރެޖިސްޓްރީކޮށްފައި ވަނީ ބީ ޒޯނަށެވެ. ބީ ޒޯނަކީ މާލެ ސަރަހައްދެއް ނޫނެވެ.
