ރާއްޖޭގެ ފެނާއި ނަރުދަމާގެ ނިޒާމު ތަރައްގީކުރުމަށްޓަކައި ތުރުކީގެ އިސްތަންބޫލުގެ ވޯޓާ އެންޑް ސުވަރެޖް އެޑްމިނިސްޓްރޭޝަންއާއެކީ އެމްއޯޔޫއެއްގައި ސޮއިކޮށްފިއެވެ.
މި އެމްއޯޔޫގައި ދިވެހި ސަރުކާރުގެ ފަރާތުން ސޮއިކުރެއްވީ އެންވަޔަރަމަންޓު މިނިސްޓަރު ޑރ. ތޯރިގު އިބްރާހިމެވެ. ތުރުކީ ސަރުކާރުގެ ފަރާތުން ސޮއިކުރީ އިސްތަންބޫލުގެ ވޯޓާ އެންޑް ސްވްރެޖް އެޑްމިނިސްޓްރޭޝަންގެ ޑެޕިއުޓީ ޖެނެރަލް ޑިރެކްޓަރެވެ. އެމްއޯޔޫގައި ސޮއިކުރުމުގެ ރަސްމިއްޔާތު ކުރިއަށް ދިޔައީ އޮންލައިންކޮށެވެ.
މި އެމްއޯޔޫއާއި ގުޅިގެން އެންވަޔަރަމަންޓު މިނިސްޓްރީން ބުނީ މިއީ ދިވެހި ސަރުކާރާއި ތުރުކީ ސަރުކާރާ ދެމެދު ވެވުނު އެމްއޯޔޫއެއް ކަމަށެވެ.
މި އެމްއޯޔޫގެ ދަށުން ފެނާއި ނަރުދަމާ ދާއިރާ ތަރައްގީ ކުރުމަށްޓަކައި ދެ ގައުމުގެ ދެމެދުގައި ފަންނީ ތަޖުރިބާ ބަދަލުކުރެވޭނެކަމަށް މައުލޫމާތުދިނެވެ. އަދި މި އެމްއޯޔޫގެ ދަށުން މީހުން ބިނާކުރަން ތަމްރީނު ޕްރޮގްރާމްތައް ކުރިއަށް ގެންދެވޭނެކަމަށް ބުންޏެވެ.
ދާއިރާއާ ގުޅޭ ބައިނަލް އަގުވާމީ ކޮންފަރަންސްތަކުގައި ދެ ގައުމުން ގުޅިގެން ބައިވެރިވެ ދާއިރާއަށް ކުރިއެރުން ހޯދުމަށް ކުރެވެން ހުރި މަސައްކަތްތައްވެސް މި އެމްއޯޔޫގެ ދަށުން ކުރެވޭނެ ކަމަށް އެ މިނިސްޓްރީން ބުންޏެވެ.
މި އެއްބަސްވުމުގައި ތުރުކީގެ ފަރާތުން ސޮއި ކުރި އިސްތަންބޫލުގެ ވޯޓާ އެންޑް ސްވަރޭޖް އެޑްމިނިސްޓްރޭޝަނަކީ ތުރުކީގެ އެންމެ އާބާދީ ބޮޑު އިސްތަންބޫލުގެ ފެނާއި ނަރުދަމާގެ ކަންކަން ބަލަހައްޓަން 1981 ގައި އުފައްދާފައިވާ ދައުލަތުގެ އިދާރާއެކެވެ. އެ އިދާރާގެ މައިގަނޑު ޒިންމާއަކީ އިސްތަންބޫލަށް ސާފު ބޯފެން ފޯރުކޮށްދިނުމާއި ނަރުދަމާ ބެލަހެއްޓުމެވެ.
