ސަރަހައްދުގެ ހުރިހާ ގައުމަކަށްވެސް އިންޑިއާ ކަނޑުގެ ރައްކައުތެރިކަން ކަށަވަރުވެފައި އޮތުން މުހިންމުކަމަށް އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެއެވެ.
އިންޑިއާގެ 78 ވަނަ މިނިވަންދުވަހުގެ މުނާސަބާގައި ފައްޔާޒް ވަނީ އެކްސްގައި ޕޯސްޓެއް ކުރައްވާފައެވެ. ރާއްޖޭގައި ހުންނަ އިންޑިއާގެ ހައިކޮމިޝަން ޓެގްކޮށް ކުރެއްވި މި ޕޯސްޓުގައި ކުރީގެ އިގްތިސާދީ ވަޒީރު ފައްޔާޒް ވިދާޅުވީ، ދުވަހުގެ ތަހުނިޔާ އިންޑިއާގެ ހުރިހާ ރައްޔިތުންނަށް ފޮނުއްވާކަމަށެވެ.
އޭނާ ވިދާޅުވީ، އިންޑިއާ ކަނޑު ސަރަހައްދުގެ ސަލާމަތީ ކަންކަމާއި އަމަންކަން ކަށަވަރުވެފައި އޮތުމަކީ މި ސަރަހައްދުގެ ހުރިހާ ގައުމެއްގެ ރައްކައުތެރިކަމާއި މިނިވަންކަން ކަށަވަރުވެފައި އޮތުމަށް ކޮންމެހެންވެސް މުހިންމު ކަމެއްކަމަށެވެ. އަދި ހުރިހާ ގައުމެއް ގުޅިގެން އެއްބައިވަންތަ ދެމެހެއްޓިނިިވި އަވަށެއްގެ ގޮތުގައި ހަރަކާތްތެރިވާންޖެހޭކަމަށްވެސް ވިދާޅުވިއެވެ.
